Deg ussan i yeɛdan kkren-d iɣuyyan jar imsexdam n “Social Media” x uḥewwes i tteggen ayt wagla x tesɣart-nsen deg wawal mamec xsen. X wenni umi ttuɣa qqaren “Twitter” d “Facebook” wer yelli d amur ula d tnayen jjin imsexdam ad ggʷden zeg uslili n uzellif i zemmren ad yili adu wafar n tlelli.
S minzi mala applikasyunat-a ina aqqa-yen deg ifassen n iburjwaziyyen izemmren a zzag-sen ggen mamec xsen, bac ad awḍen mani xsen. Din mani llehmen iwdan i “BlueSky” i di ɣa bdan a ɣer-s negzen.
Min yeɛna BlueSky?
BlueSky d ijj n wapplikasyun d amaynu n “Social Media” i dd-yusin bac ad tesbedd aḥewwes-nni i yeggin wapplikasyunat-nneɣni am “X” d “Facebook”. “BlueSky” wer yelli ca am yenneɣni mani kulci imun deg ufus n ijj n bnadem niɣ deg ijjen wegdud (yenni ɣer yella wagla).
BlueSky qqaren illa yerẓem, wer yeqqen bu ɣer ca n ḥedd i t-yessegguren, wer izemmer ad dag-s yeḥkem ḥedd. awal amezwar d wawal aneggar ittɣima ɣer imsexdam-nnes bac ad t-ssuyuren mamek xsen. bac ad tili ijjen tteswirt n mani yessegura ccɣel tessfa ɣer iwdan wer ɣar-sen min ɣer snuffren.
Wen yeggin BlueSky?
BlueSky yexdem xaf-s Jack Dorsey i ttuɣa yellan zeg izellifen imezwura ixedmen x “Twitter”, yenna ila yexdem x BlueSky bac ad yili d acniw n “Twitter” wer dag-s irewsen. Mala ttuɣa “Twitter” sseggurent ayt bab-nnes i yecqa duru, BlueSky ataf sseggurent imsexdam-nnes.
Ataf netta wer ɣer-s la bab la ayt-nnes. Ad yiri yerẓem deg wudem n tlelli n wawaḍ n wanfurmasyun ɣer iwdan bla ma ttuɣa din ula d ijj n twalat i di izemmer ḥedd ad ixarres ad yeslil azellif i ḥedd nneɣni. S minzi di BlueSky qaɛ ad teffeɣ s arrwand-nsen.
Yeweḍ BlueSky a ɣar-s ilin 28 melyun n imsexdam deg umaḍal amen yekmel. Aṭṭas n yewdan bdan ad gajen ad negzen ɣer BlueSky zeg “X” d min zzag-s d-ittassen. Maca Irifiyen mamek d-itban aqqa-ren ɛad adu teɣruḍt n “Facebook” drust zzag-sen waha i yellan di “X”, yenni yellan di “X” drust zzag-sen i t-yecqa useqsi n uslili n uzellif niɣ n tlelli.
Ad yili BlueSky netta i ɣa yeṭṭfen amkan i “Social Media”, ddeg-a wer yessin ḥedd wer xaf-s yergib ḥedd, weḥdes akud i d-aneɣ-ɣa-yesseknen.
Iyyat ɣer BlueSky!