Jjet-aneɣ abrid a neɛdu, mayemmi i daneɣ-tettaggʷdem ?
Din ca n yewdan, ttexsen a sen-bellɛen aqemmum, a x-asen bellɛen, a ten ḥebbsen. Maca awal-nsen yettɣima wer yettwattu. Yettɣima tterran-t-idd idurar, ittenneḍ di twengimt n weydud, deg yezlan, deg yebriden, deg ul n yewdan.
Ass-a, lbal-inu, yewwey-ayi ɣer inekraf – Nasser Zefzafi, Mohamed Jelloul, Nabil Ahamjik, Ighid d merra yinneɣni – i yettxellasen s tlelli-nsen bac aydud-nsen ad yili mliḥ, ad idder di lehna d laman. Bellɛen x-asen. Ḥebbsen-ten, maca awal-nsen, tiɣuyyatin-nsen, d min rezzun yedwel yettsara, yeggur, ittraḥ mani yexs, wer din wi t-ɣa-yesbedden.
Nzemmer a nḥebbes bnadem maca wer nzemmar a nbelleɛ abrid ɣer tlelli.
Afuṭu n Ɛli ideflawen tettwaksi-dd x Berbère TV
Deg ussan-a i yeɛdun, yemmut umeɣnuj aqbayli Ɛli Ideflawen, i daneɣ-dd-yejjin awalen-a deg ij uɣennij-nnes : ǧǧet-iyi abrid ad ɛeddiɣ i wumi ara iyi-tugadem ? « Jjet-ayi abrid ad ɛduɣ mayemmi i dayi-ɣa-taggʷdem ? ».
Deg uɣennij-a, wer ittettar la igelwan ula d leḥkam. Yeqqar deg-s :
« Wer tufid min dd-leqḍeɣ
Illa tizemmar iɣallen
Wer tufid min dd-uwyeɣ
Illa ifassen xxwan
Wer tufid min rezzuɣ
Illa tafawt i tiṭṭawin »
Waxxa amenni, qeṭṭɛen x-as abrid. Mayemmi i yessaggʷad ?
Aɣennij ittawey-aneɣ ɣer tudert inekraf irifiyen.
Mayemmi i ɣa naggʷed zi bnadem i yessawalen ?
Mayemmi i ɣa naggʷed zi bnadem i irezzun tilelli ?
Mayemmi i ɣa naggʷed zeg wenni i irezzun tudert yeknan i yexf-nnes d wi yellan-nnes ?
Ɛli Ideflawen yeqqar ɛawed deg uɣennij-nnes :
Ifassen-inu, wer cciten
Illa i tira umi zemren
Iḍaren wer ttrikkʷilen ca
Maca i ubeddi zemren
Xmi i dd ɣa tesseqsam
A dayi-tafem da
A dayi-tafem jer-awem
→ Tcuni n lewsifet : ifassen i tira, tamijja i wawal, iḍaren i ubeddi.
D manaya i ggin iḥudriyen irifiyen :
Uguren ;
Sɣuyyen ;
Ɣennjen ;
Rzun tilelli ;
Rzun tuder i yeknan.
Umi awal-nsen yettmunistir, aṭṭas zeg-sen ttwaḥebbsen. Maca awal i yettwaḥebbsen yettɣima d awal. Bnadem i yettwaḥebbsen yettɣima yedder di twengimt n weydud. Awalen ẓẓekkʷan igmiren, leḥbusat, ɛeddun zeg umeqqran ɣer umeẓẓyan.
Yeqqar ɛawed deg uɣnnij :
Merra minzi i tetteggʷdem
Aqqa-t deg uzellif-inu
Mala ɣer-i ca igezzem
Aqqa-t x tixeft n yiles-inu
Walli d necc i ɣa tḥebbsem
Ruḥet ad tḥebbsem awalen-inu
Awalen-a, ixess ad awḍen i merra wi yexsen ad yerr awal d ljarima. Minzi yinni i iḥekkmen s tdiktaturit, ttaggʷden kter s jjehd n wawal zi min ttaggʷden zi jjehd iɣallen.
Ixerrisen wer tzemrem a ten-teggem di leḥbes. S minzi i dayi-yewwey leɛqel-inu, ass-a, ɣer Ɛli Ideflawen d merra yinni i yesxedmen tmijja-nsen maḥend iwdan ad ilin d ilelliyen.
Deg wass-a, tewwey-ayi ɛawed ɣer yayetma i yettwaḥebbsen baṭel, qqareɣ-awem : wer nettettu ismawen-nwem, udmawen-nwem ula d amenɣi-nwem x-anem bac Arif-nneɣ ad yili mliḥ.
Min ɣa yekk bnadem ibedd, afus izmer ad yari, tamijja tzemmer ad tɣennej, ula d ij leḥbes wer izemmer ad ibelleɛ x tlelli.