S wezwel “a nedder s tutlayt-nneɣ”, qḍant ass n lḥedd i yeɛdan (12 zi yulyuz) tɣimitin n wemsegraw agraɣlan amezwaru n tsekla d tutlayt tamaziɣt i xef tbedd tmesmunt Adlis Amaziɣ s wecrak akked tmesmunt Garabide d tmesmunt Plazara zi tmurt n ibaskuten.
Manaya yettwagg di temdint n Nnaḍur zi 09 ar 12 zeg uyur n yulyuz. amsegraw-a ttuɣa-t d ij n tisi d tagraɣlant wer ɣer-s telli weltma-s, tesmun mummu n ikadimiyen d imesneflulen d imerzuten d imariten zi daxel n Arrif d berra-nnes.
Zi tmeslayin i ɣer yeswiẓẓeḍ wemsegraw-a: a dd-isaqar tifras n yij n yimal d amaynu n tsekla tamaziɣt, s tsetratijin kessint iri n wesneflul, swizant deg wefsar, gguren di tgumi n welmad d uselmed n tutlayt d min ɣer-s yeqqnen, akked uɣezdis n wadaf ɣer yegran n ttiknulujit d tiɣist tasemgurt (IA), d ubeṭṭu n yirimen deg weswir anamur niɣ amaḍlan.
Amsegraw-a, wer day-s ttwaqqnent ca tiṭṭawin x tɛenkraf n yiger n uselmed n tmaziɣt di tmurt-nneɣ, d mamec tzemmer tsekla ad teswiza deg yiger-a. Amen day-s temmelz tɛejjajt x isuraf iqaden i zi tzemmer ad tessurf tutlayt-nneɣ tamaziɣt mala nennurẓem x tiɣist tasemgurt d usayrar amuṭṭun.
Rni x manaya, twasit n yegmamen n “PEN Amaḍlan” yerẓem tiwura d timaynutin bac a nessgem tasekla-nneɣ, a nesmersel afsar amaziɣ s usenfar “PEN Amazigh”.
X rebɛa n wussan, msebḍant tɣimitin timassanin, yewqeɛ wemsawal x tɣawsiwin i yeqqnen ɣer tsekla d tutlayt:
Asmersel n wefsar d weswizi n tmesmunin: yettwawc wawal i tmesmunin ixeddmen deg yiger n tsekla tamaziɣt, ḥma ad yili uxarres di tmunitin iɣa yessiriwen zi tisi n teɣri n tsekla tamaziɣt.
Aseqsi n uselmed: Ssiwlen imerzuten x tɛenkraf n uselmed di tmersal niɣ berra i tmersal, ssersen fus x mamec i tzemmer tsekla ad texdem aselmed n tmaziɣt.
Asayrar amuṭṭun d tiɣist tasemgurt (IA): iger n ttiknulujit ttuɣa ɣer-s lhimmet-nnes deg wemsegraw-a, yewqeɛ wawal x isenfar imuṭṭunen, zzay-sen “Awal Degital” bac ad teṭṭef tutlayt tamaziɣt amkan-nnes deg wazzerg n ttiknulujit tatrart.
Aturjem d wemsawal jer legnus: ssiwlen imerzuten d tmerzutin x lhimmet n uturjem am yij n lqenḍert n wemsedlas, tesseggur di ḥeṭṭu n yilsawen uqlilen, tessufuɣ asneflul amaziɣ ɣer wesmaḍal.
Ɣer uneggar, tessemɣer tmsemunt Adlis Amaziɣ s wecrak aked tmesmunt Garabide d tmesmunt Plazara, s mass Abdelhad Emharraf, i yellan d aselmad d ameqqran n tesnilest tamaziɣt di tɣiwant n tsekliwin d tmessniwin tinefganin di Tiṭṭawin, d ijjen zeg idurar n tussna d tmessna i yewcin aṭṭas i tɣawsa tamaziɣt, yessiriw tisi n trezzutin tikadimiyin timaziɣin di tesdawit tameɣrabit.
