Ɛlaḥsab min teqqar l’UNESCO, llan ca n 7000 n yilsawen i zi ssawalen yewdan deg umaḍal. 40% deg-sen gguren ad mmten. Di lqern i yeɛdun, mmuten ca n 600. Kul tnayen n simanat, ittmetta ij n yiles. Kul iles i ɣa yemmten, yettawi kid-s min yeksi deg uḥsi-nnes n twengint, n tussna, n leɣnuj, n yismawen imukan d ca nneɣni. Tamettant (lmewt) n mkul iles, tettawi kid-s ij n lxezrat temsebḍa x tinneɣni ɣer ddunit.
S uya, ḥeṭṭu n tmaziɣt n Arif – i ssawalen ca n 4 melyun n yewdan, Ɛlaḥsab Lafkioui (2017) – zi tmettant-a, ixess ad yili d amnus n kul Amaziɣ i yexsen ad yeqqim yiles-nnes yedder ibedd. Ijjen zeg ibriden i yezemren ad yejj tamaziɣt ad tedder, ad tneɛneɛ, ad temɣer d asexdem-nnes di tetiknulujit n yiḍa.
Deg ubrid-a, nettaf Majid Aqalai, i yebdan di manaya kter zi 10 iseggʷasen zeggami. S tzemmar d tiquḍaḍin d waṭṭas n tmexsa, yewca aṭṭas i tmaziɣt n Arif.
Cwayt zi min yegga :
- Ibedd x uraq n LERIFAIN, i idewlen ass-a d TIFRAY, ij uraq mani i nettari 100% s tmaziɣt ;
- Yegga tagrawt AƔENNIJ di YouTube ((https://www.youtube.com/@aennij299), mani i irenney tira i waṭṭas iɣennijen irifiyen (sous-titrage). Tira-ya ttɛawanent-aneɣ deg uselmed d welmad n tira n tmaziɣt, minzi teqqenent jer min nettesla d min ttwalant tiṭṭawin-nneɣ ;
- Ittari izlan, yeqqar-iten (ẓret youtube-nnes : @MajidAkalai );
- Yeqqar i yewdan, ittegg-asen tira
- D amuṭur n tkadimit n tmaziɣt di Frankfurt ;
- Yeslmmad tira n tmaziɣt i yewdan ;
- Ad tafem mani ma yella ca ubeddi x tmaziɣt…
Min ittegg Majid Akalai, wer yelli d min yefsusen ula ihewnen ! d tizemmar d timeqqranin ! Ittegg-it s tukkerḍa n wakud i yexf-nnes d tudert-nnes. S uya yeḥdaj a s-negg ccan, a t-ncekkar aṭṭas. Necc beɛda, tteḥtarameɣ-t aṭṭas u ttqadiɣ-t x merra min ittegg i yiles-nneɣ !!!
Majid d ij uḥudri zeg yinni i yeṭṭfen abrid n weɛraq netta ɛad d aɣeddu. Yerzu weḥḥed-s, yelmed weḥḥed-s, yebna timesna-nnes s yexf-nnes. Ɛemmers wer yetter a x-as yessiwel ḥedd. D ij uterras i yumnen s min ittegg, wer t-ttiwyen isemmiḍen wer t-ḥebbsent tḥeryaḍin.
Majid Aqelɛi d tafawt tameqqrant i tmaziɣt n Arif. Ssittimeɣ ad ssnen irifiyen lqimet n min yegga, a das-uwcen ccan d uraq i yeḥwaj, ad kemmlen x webrid-nnes.
Ttqadiɣ-cek a Majid AQALAI, x min tewcid i tmaziɣt n Arif. Ad teqqimed d tafawt i wi dd ɣa yasen, ad ilint tzemmar-nnec d tala i zi dd ɣa nagem i ysurifen n tiwecca.
Khalid BOUYAALA