Yekfa ac-yexs ij n wul; deg yefran n buḥbel-nnes i yullɣen, ammu ttuɣa teqqar tettɛawad, i mmi-s nni abuhali, i ɣer yella 4 n iseggusa, amen das-tedderreɛ, ɣer weḍbib n teɣmas, tmesseḥ-as ilegzazen i das-dd-ittseyylen zi tqemmumt-nnes ig iferyen.
Wer ɣer-s tizemmar, ad telqa lxezrat n useḥqar, i dd-ittekken zeg yewdan, xmi jeɛɛren di mmi-s, i ten-itejjan sṭiyyaḥen zzay-s; ca yestemtum, ca yessawal deg wudem. D tinni d lxezrat i yeddakkʷalen d tixedmiyyin, ɣzant deg wul-nnes, i yiccuren s tayri n uḥenjir-a ameẓẓyan, i wer ɣer yelli ufus di tubbuhelya-nnes.
Amec it tuɣa teṭṭef zeg idmaren, yennufsel zzay-s, iruḥ s ca n tekli qeɛ tefreɣ, am xmi das-ttlexluxen yexsan, yeswaẓẓaḍ ɣer yijj n weḥram d aqrin-nnes, ibedd qibal-nnes, itthemhim, yexs ad yini ca n tawalin seggḍent, maca axmi yismuhrut waha. Yennexleɛ weḥram-nni, yeɛlef ɣer yemma-s yesɣuyyu: yemma… saggʷej xaf-i wanita, wer yeḥli. Tesḥinneb-as yemma-s: wer tteggʷed ca, qa wer dac-yesxussari walu!
Tekker tyemmat umi yettwayzem wul s txedmect, 4 n iseggusa zeg wami, ad ɣer-s tarr ttebliyyet-nni n mmi-s, am tesɣellay ca n imeṭṭawen, tennum aked tarẓugi-nsen, tettemseqsa ak yixef-nnes: maɣar iɛeṭṭar weḍbib? Maci yegga kid-s ɣer 17:30?!
Yelbet ubuhali ameẓyan deg uḥerwal n yemmas, itthemhim, ittemxetway s tfassin-nnes, nettat teffer udem-nnes, deg ucuwwaf-nnes aberkan, d tarewla zi tmuɣliwin-nni xaf-s iqebbsen.
Ɛemmers wer tɣil, ad tili d yemma-s n ca uḥenjir d aneɛḍub, d ameynun, d abuhali; amek das-nnan yeḍbiben, arryen umi ɣa yewc rebbi nneɛlet, tekreh-iten. Tessen belli mmi-s zelɣent zzay-s falṭat-nsen, d tzemmar tineqsiyyin. Ma nettat tejj-it-idd yessbeḥ, tesla i iɣuyyan-nnes, umi xaf-s t-bḍan; terr-it ɣer-s, tuka aked tayri mamek idd-tesfuffi zeg idmaren-nnes.
Bu-seffar i t-ileqfen, awerni cway n wussan zeg wami ilul tuɣa-t yewɛar, al ami yedwel kulur-nnes, d aleccini yeḥdeq, ixess ili ssidfent di zzaj lexdenni, maca 3 n tkaxatin n zzaj i ttuɣa yeɛlam seppiṭar-nni, xsarent marra; teẓra s tiṭṭawin-nnes, mamek day-sen ttsaran yebjijen imeẓyanen. Tesɣuyy s uɛiffi: ibjijen di zzijan n isiyman?! Terr-dd xas firmira s umeɛgen: ɛdun 2 n iseggusa zeg wami bedden!
Issenta usiymi-nni ittberkikkid, ineṭṭer tifassin barra i taddut-nnes, am xmi ineṭṭer ca n ddqel, yesɣufa-as tarut, mummu-nnes ittunnuḍ di tiṭṭawin, al d-yeɣli, ad teqqim mɣer temlel. ɣer uneggar umi das ufin ij n zzaj, deg ij n wemkan, yeggʷej x temdint n LWALID s 2 n tseɛɛatin d wezyen, tuɣa alli-nnes iparder.
Aḍbib n iẓewran, umi das-yewca i temɣert nni lexbar-a aɛeffan n mmi-s, yeɣḍel zzay-s azyen, teqqim tesɣuyyu s tefqeḥt, am tyaẓiṭ umi ɣersen: wellah ila nedder di tleɣwin n jjnun, nedder di tudert-a useḥqar, wer ssineɣ minzi?!
Ɛemmers wer tɣil di ca n wass, ad tili d tayemmat ubuhali. Qeɛ ibuhaliyyen i ked temselqa deg ibriden, wer ttuɣa daysen tt-tiwi, am xmi wer llin d iwdan, illa mala ca n yejj zzay-sen, tenneqleb ɣer-s uɣil, s tubbuhelya-nnes, d tseḍḥak ig itegg; i lexxu mamek, umi tedḥa d yemma-s n ubuhali d ameẓyan, wer ɣer-s fus di mindi yella?!
Lwacun marra, ssitmen-as tamennawt i usiymi-nni, amen wer yeɛdu char zeg wussan-nnes. Aryaz-nnes i zi ttuɣa tekkal teccat ɣer yedmaren s leḥnuniyyet-nnes, jer tmeddukal, yedwel yesɣuyyu s uɛeffer: nec wer xseɣ bu weḥram d aneɛḍub… mli i ɣa yemmet, mli i ɣa yemmet. Tetterra xaf-s s tḥessect, am xmi tessawal aked yexf-nnes: maca cek d baba-s! Itegg day-s malaqara, yeqqer-as: iwa xzer day-s, wa d bnadem wa?!
Nettat tedderraɛ-as, axmi tessitim ad t-terr ɣer uɛeddis-nnes, tettar-as-dd imeṭṭawen jer tfassin-nnes, tettxebber-it belli tettexs-it aṭṭas, wer tzemmer a das-tetter lmewt. Awerni aṭṭas n iyuren, tettu mmi-s ameqran, tettewwet ɣer x uneɛḍub-nni ameẓyan, wer yuyur al ami yegga 2 n iseggusa d wezgen, awal wer t-yelmid qeɛ. Ma baba-s, yedder aked uyezzim s min ihewnen; qeɛ wer day-s tt-ittiwi, yenfa-t zi tudert-nnes, yelha ḥa aked mmi-s nni iseḥḥen.
Mɣer tayemmat weḥdes, i ttuɣa das-yessaɣen arruḍ n lɛid i umeynun, amen wer tettiḥel zeg usebben n warruḍ-nnes, ig ittwessex neɛmada, xmi t-ttaɣen inni n wadu tmurt, ittmarreɣ deg ikalen, niɣ ittferreɣ tabdiɛt n macca, x yexf-nnes. Ttuɣa teccat mmi-s ameqran, xmi s ittic aɛmud i uma-s, tessaggʷad-it belli ad xaf-s tḥedd pastili-nnes, i das- tettegg mesteɛmal i ubuhari ameẓyan.
Tegga tizemmar mɣarent, ḥenja a das-tesselmed awal, waxxa marra yeḍbiben qeḍɛen-as layas, maca aked wussan, terr-it itthemhim cway, nettat waha ifehhmen min i texs ad yini. Aryaz-nnes, wer iqebbel umi tlehha mɣer ak umeẓyan-nni aminun, lebda ittmenɣa kid-s, tehmel lwacun-nnes: inadan n tidett i marra itneɣ, ad yemmet lemsex-a.
Wer tzemmer ad txarres di tudert i di wer yelli netta, iɛizz xa-s aṭṭas, tettaka-t d azgen zzay-s, wah, abuhali-ya ameẓyan, i dd xaf-s ineggzen di ca n wakuden, mamek day-s dd-ixezzer s ca n tmuɣri ccurent s tmexsa. Wer iteṭṭes, ar yeqqim yesmuqqul deg udem n yemma-s, macḥal i knant tiṭṭawin-nnes, zzat ma x-as yekk yiḍes, tettaka aked leḥnuniyyet teṭṭaw sennej-nnes, amaknaw tiḥjijatin n tfawt. Ij n twalat, isiɣi ixezzer day-s, al mani das- dd-hwan imeṭṭawen; xmi t-ttaggʷej, ittegg ca n tnixt tesruba, uka ili tudes-it. Nettat waha, i yellan d ddunect-nnes, i ilellcen s tayri, wer iwiḍen ayt uxarres yefran, i yeccaten ɣer yedmarn s tiɣit-nsen, ad ssnen tidett n tmexsa n ibuhaliyyen i tudert.
Ula d ijj zi lwacun wer tt-itimen, xmi dasen-tettɛawad x tiɣit-nnes, teqqer-asen qa yerhef aṭṭas… deg ij n wass, yewwet-it baba-s s jjehd, umi yerẓa ict n tbuqalt n KRISTAL. Icencel-it zi tɣerḍin-nnes tizzdadin, yetjeɛjiɛ: ad yenɛel rebbi ass-nni di teẓrid tudert; terrid-tt xaf-neɣ d jahennama, maca aɛmud wer illi i cek, yuss-dd i yemma-c nni i c-yujern di tubbuhelya.
Ass nni iruḥ itazzer, s tekli-nnes tmufriɣt, ɣer uḥerwal n yemma-s, iterjiji s tigʷda, am ca n uwarrud, yennufsel-d zeg wamẓiw yexs ad t-yecc.
Tuɣa yettru, iẓehhar s ca n tmijja tebbuxsi, axmi d asmuhert, aqemmum-nnes ittnesses s ilegzazen, tarr-it ɣer-s, temseḥ-as imeṭṭawen s ufus n tqendurt, teswa-ten s yencicen-nnes, tegga-s hellararu, al mani yeṭṭes… qa war tt-tettiwi di lxezrat iceyyḍen n weryaz-nnes, umi ɣer-s yuẓa lḥal, ihezz-itt zeg uɣil, yenna s: tudert-nneɣ wer teqqim d tudert, ttpinsareɣ ad t-ssekkeɣ, ɣer tmezyida n ibuhaliyyen.
– Tesɣuyy: lla, wer c-ttejjiɣ, maḥend aqa-ayi danita.
– Maca ita xzer, ɛad wer yeggi 4 n iseggusa, netta yerẓa ayzen n leqcuɛ n taddart!
– Terra xa-s s imeṭṭawen: lla, ɛafak, wer ittedder ca di sepiṭar ibuhaliyyen!
– Mayemmi (amen yesɣuyyu)
Wer tt-iɣiwel yexf-nnes a xaf-s terr lexdenni, maca awerni cway n wakuḍen, teyrw taycit-nnes yezzuzzren, tuka belli tnesses s tayri, tessilid mmi-s, tenna-s: minzi ttexseɣ-t kter zi marra min ɛlameɣ di tudert-inu. Yexsi utarras-nni, yuka aked wawal-nnes yessefcel-it am ttbaxur, melmi ma yeskef-it, ili yerni lfeclan. Awal n temɣert-nnes, ttuɣa-t yessur aked lefwaḥ n buḥbel-nnes yettweɛɛḍen?! Tedwel tettlehma aṭṭas i ibuhaliyyen n barra, tettseqsa s uzillez: i nitni min ggin?!
Lebda ttuɣa tettpinsar di tebridt i zi txarres ḥenna-s deg wudmawen n ibuhaliyyen d ineɛḍab: ḥenja ad iɛulla yisem n rebbi, ad yemmerni lɛezz-nnes. Ttuɣa wer ttimen zeg wawal-a, tetterra x ḥenna-s s uẓunfeḍ: maca ḥenja ad iɛulla yisem n wakuc, netta wer yeḥdij ad yegg iwdan d imeɛḍar, ttmarrten nitni, tmarrten wi zzay-sen yellan. Waxxa amenni, ḥenna-s tettexs a das-tessefsi aceddi-ya, tettawi-as-dd timsarin zi Linjil, umi yejjen isseqsa Yeccu: i min yegga netta upubri-ya, i zedɣen yenni n wadu tmurt, umi yeffeɣ d abuhali? Yerra xaf-s: wer yeggi walu, ḥenja ad iɛulla yisem n rebbi, ad yemmerni lɛezz-nnes.
Tennurẓem tuwwert n wexxam n uraji, yessijj-dd weḍbib, yexzer di tseɛɛet-nnes, yetter zzay-s ssmaḥet: wer ɣileɣ lḥal n temɣer-a, ad yili yewɛer anict uya.
Teffeɣ-dd tmeṭṭut-nni zeg weḍbib, yeɛdu ɣar-s rehẓuṭ, teṭṭef leqṭen jer teɣmas, mɣer tecleḍ aḥram nni, tennexleɛ, deɣya tegga tteɛlimet n kruc x yedmarn-nnes. Tayemmat ḥḥman day-s idammen, tewca-s ij n umeḍḍerḍer mɣer deg uxarres-nnes, maca di tidet, teksi mmi-s, teḍfer aḍbib ɣer wexxam n useɛdu.
Yessewc-as-dd s weɛrur, yelha yessilid leqcuɛ-nnes, yesrusa-ten di ssiniyyet n wezzal, zat-i tsebbalt, yenna s:
– D lxir, tiɣmest-nni tetteqqes-am ɛawed?!
– Terra xaf-s: twalat-a, usiɣ-d ɛla ḥsab mmi!
Tennum ak tiyyita n uniyzem, hekkʷant-id xaf-s, ttqessasent-as ul, marra steɛjiben xmi tetthilla di mmi-s abuhali, ca n imuren tesɣuyyu xaf-sen: maca qa day-s buḥbel, buḥbel!
Am wi yexsen ad yini: lemsex-a wanita, yestahell ahilli-nnem?!
Ameynun ameẓyan, wer yejji aḍbib at yexzer, illa amen yella deg uḥerwal n yemma-s; melmi ma yerni yesmuqqel deg uqemmum n weḥram-nni zi daxel, ili yebberken-as wudem, umi isala, yenna-s: yexxelweḍ lḥal-nnes, itteḥdaja ttmenyat d timeqqranin, ɣer-s aṭṭas n tferɣi deg iɣesmiren, d teɣmas. Nec ttwaliɣ-t d tubbuhelya waha, ad tpinsared deg useggem n mana uya…
Tegga yexf-nnes, axmi wer-as tesli, tesseqsa-t: macḥal ɣa iguṭṭar uparasyun-a a Dduktur?!
Yeksi day-s tiṭṭawin, uca yenna-s: day-s aṭṭas n ssayar, mala texsed, am ggeɣ leḥsab. Yugi ad isiɣi deg umsawal, ca di lallaɣ-nnes yerra-s-dd taynit, belli d tayemmat i tella.
Terra xaf-s: wer day-i cqint ttmenyat, ad asent-wenniɣ!
Ihezz weḍbib tiɣerḍin s umiyyek, yenna-s: mamec ma texsed, maca uɣil xafi a dam-iniɣ, afites n ttmenyat wer ittguzi.
Teksi mmi-s deg uɣil-nnes, teffeɣ-dd zeg weḍbib; tfust-nnes taẓelmaḍt, yessunneḍ-as-t i yili, ittxettec zzay-s deg ucuwwaf n yemma-s, tafusect ig iqarrmen cwayt, yessarxut-id x yedmaren-nnes. Tmudrust-nni n taddudt-nnes ttuɣa tesɛeddu tiyyita n wul-nnes ɣer yemma-s, usint-idd tiyyita n wulawen, aked isuraf n tekli d ijj, tessen di lxaṭer-nnes, amek ittwaqqnent tira-nsen ɣer tmexsa; timexsa d kruc, ij n kruc yekna.
Mquddant tiyyita n wulawen-nsen s tnayen, al mani dlint arrjef n webrid, d ẓẓhir yuɛɛlan n arradyu. Anexbeḍ n wul, yedwel d awalen ffren, melmi ma tqelleq di tekli, ili ḍehren-dd, ttissfan.
Teggur, buḥbel-nnes yeddendun, jer lefraḥet d imeṭṭawen: a mmi-inu yecnan, yekfa ac-yexs ij n wul ḥenja ad teddred!
Ttuɣa tbedd ɣer STOP, umi s terra taynit, belli yiwi-it yiḍes x teɣruṭ-nnes, tessudem-it di tgemmiẓt i yuffen s ilegzazen, tuka am xmi teqqas tamment. Teccur-dd tiṭṭawin, amen das- tessitim turjatin n lehna.
YURA-T S TAƐRABT: HAYFA BAYṬAR – TARR-IT ƔER TMAZIƔT: MARIEME