Di lbit n Anir, mani mfertakent tsurarin kulha mani yemẓeryaḍ… Ttuɣa din atilifun miɣis igeɛgeɛ x tassut, iqabel adlis i ttuɣa ilebten deg weɛɛan-nnes, yessutara melmi x-as ɣa mmersent tḍewḍin n Anir, melmi ɣa yesseɛdu mummu n tiṭṭawin-nnes x tewciwin i zi beɣbɣent tefray-nnes.
Arendad-nsen, ttuɣa din mass atilibizyun, iqellez di lḥiḍ, yesɛeddu-dd deg uɛeddis-nnes qeɛ min yifen ɣer Anir, d min yexs lxaḍer-nnes.
Yenḍeq-dd utilifun, amen ittecḍiḍiḥ deg umkan-nnes: “necc, wer ɣer-i yelli wemtil! D necc i kenniw-yifen!”.
Yeḍsa-dd utilibizyun zeg uɛebbuḍ n lḥiḍ, yenna-as: “tiwecca zik x-ak, tzemmard-ayi i necc? Xzer necc anict, txezred cekk anict!”
Yekɛa utilifun, yenna-as: “maɣar teqqim-itt-dd di tiddi niɣ di tiru? Necc d miɣis x-ak! Ɛawed waxxa tqellzed din di lḥiḍ, aqa tkerfed din s ibulunen, wer tettenhezzid, walli am necc d ilelli!”.
Yeqqes-as lḥal i utilibizyun, yerra x-as s ujeɛjeɛ: “cekk tesḍerɣiled iwdan waha, cekk anict n tkemmict, tettemɛerrid-dd akid-i necc i di ixezzar Anir, axmi ixezzar deg yewdan aqqa-ten akid-s! Ɛawed cekk mli ɣa tegged inadan, ili walli kul twala ad tehrubbzed di tisi, a dac-yerreẓ wudem!”…
Yexzer-dd deg-sen wedlis, yewta tifray-nnes aked wayawya, yenna-sen:” ggem leɛqel-nwen, maɣar tettemseksim? Tettum-ayi necc niɣ ? Wer tessinem aqa mli walli d necc, ili kenniw wer tettilim! Necc d tala n tussna, zeg-i i ttalyen yegduden, ttawḍen tqiccit! D necc i yessalayen di ccan n yewdan d tmura. Wenni i dayi-ɣa yemmexsen necc, a ɣer-wem dd-yerr s uɣembub, ihekkʷa ɣer tisi!”
Anir i ttuɣa ibedden ɣer tewwurt, ittesla-dd i wemsawal-nnsen d wemseksi-nsen, yudef-dd, yenna-sen:
” kul ijjen zeg-wem, ɣer-s amkan-nnes di tudert-inu. Merra tneffɛem. Necc, akud-inu beṭṭiɣ-t x-awem s tlata idwem. Maca tasɣart tameqqrant, tticceɣ-tt i wedlis. D tidett min awem-yenna, mli walli d netta, ili kenniw wer tettilim!”.