Yura-tt: Ɛebdelɛaziz ḤANNUN
Zzman, teẓẓi-dd yijjen temɣart aceffay zi tfunast , teccur taqduḥt. Tegga-tt x uzellif teṭṭef abrid ad traḥ ad tezzenz aceffay-nni. Amen teggur txarres ” min ɣa ggeɣ i tenεacin i dd-ɣa rreɣ zeg uceffay..? Ad sɣeɣ cway n tyaẓiḍin a dayi-dd-arunt timellalin, a tent-zzenzeɣ ad sɣeɣ lmelf ( min yerrḍen sḥab agla) ad ggeɣ tiseɣnas isekkʷan… Ataf xmi dd-ɣa εedduɣ ɣer ssuq ad zzenzeɣ timellalin, qeε iḥudriyen n ddcar a dayi-xsen ad rzun a dd ɣer-i awḍen.
Timeddukal-inu ad asment a dayi-ḥesdent, maca necc lexdenni wer ttsewwiqeɣ i ḥed, wen dayi-ɣa yinin ca, ad hezzeɣ tiɣerḍin-inu ad zelyeɣ aɣembub-inu ammu..” qeε wer tsili awal aked yexf-nnes, tettwala taqduḥt-nni tewḍa-dd tefrikkʷes di tmurt, aceffay iseyyeḥ. Wer tufi aceffay di teqduḥt ula d timellalin deg uyennir ula d tiseɣnas x yedmaren…
Zeg-s i dd-yeqqim wawal : “wer ḥesseb tifellusin ( tiyaziḍin) , al ɣa tessdel tyaẓiḍt ad tessefruri.”