Yura‑t: Ridouan Pakhrou
Twalat-a ad nessreɣ tfawt xef ijn wudem zeg udmawn irifyyen i yewḍen ad sseknen udem n arrif deg umadal. Ad zemmen isem‑nsen s twuri d tawada‑nsen deg waṭṭas n yegran, nssiwel deg ijjen texrast xef umirar n tcamma Brahim afellay, irecmen isem‑nnes di tunnunt n Urupa d umaḍal.
Ass-a ad nssiwel xef ijen wudem ɣer-s min ɣa yini deg iger n tira tisklanin, temjer xirebbi d tsemɣurin. Twalat-a ad nssiwel xef tamarut tarifiyt Najat Lhacmi. Min teεna Najat Lhacemi ? Manis tssenter isuraf‑nnes ?
Man tɣawsinin tunudent tira nnes ? Man amcan n tawuri n Najat di tskla takatalant ? D yina d iseqsan xef ɣa nerr deg umegrad-a.
Najat LHACMi..Ticri zi arrif ɣer katalunya
Najat terzef-dd ɣer tudert deg useggʷas n 1979 di teqbilt n ayt sidal, di arrif.
Di teqbilt n unaẓur amaziɣ Lwalid mimun itedder Najat cwayt zi temẓi nnes, qber ma ad tt‑yeksi baba-s yellan d amtluε di katalunya, wami twwed 8 n iseggʷusa.
Twacunt n lhacmi tezdeɣ di temdint n Fik (Vic) yudsen i Barsiluna, mani ɣa tessenter Najat ussan-nnes imzgura di Ssekwila mani ɣa telmed tutlayt Taseppanyut d Tkatalant, aked yiles n Tmaziɣt ittɣaster di taddart aked yemma-s d baba-s am ict n tutlayt d tayemmat.
Awarni ma ad teṭṭef najat bakalurya teɣra tafilulujit taɛrabt di tseddawit n Barsiluna.
« Ura d nec d Takaṭalant ».. asurif amzwaru ɣer tsekla Takatalant
Najat am wattas n irifeyyen d trifiyyin i dd‑ymeɣren deg ijjen tmurt war telli n lejdud-nsen, deg ijjen tusna war telli d tadelsa-nsen, Tamarirt najat war teqḍiε bu aked iẓewran- nnes, maca tudert-nnes deg ijjen wegdud n midden yejja-t rebda ad txarres di tnettint d tmagit d tdelsa yellan nnes. Najat tugem‑dd zi tala n waṭṭas n tusnawin, d tamaziɣt, d tarifiyt, d tameslemt, d tafrikant, d takaṭalant, d taseppanyut… Suya tawwuri-nnes tamzwarut deg igger n tira tsemma-s « ura d nec d takatalant » adellis-a tssufeɣ‑it-idd deg useggʷas n 2004.
Najat lhacmi zeg idurar n arrif ɣer ruεra ujenna di katalunya
Asurif wis tnayen ad yili d ameqqran ɣer tmarut Najat Lhacmi.
Ungal « Patrirk anggaru » ɣa yemmarnyen di 2008, yewwi attas n ccenεet, mamek yegga amkan-nnes jer idellisn ytmenzan attas di tsedlisin n Kaṭalunya ula d Seppanya ammen tekmel. Ungal-a ad yejj ssaḥafa ad tessreɣ attas d tifawin xef ict tmarut ttuɣa tnnuffer di tili qqarenn-as Najat lhacmi . s twuri-ya yecnin tiwi tmarut tarifiyt, tasrmɣurt « Ramun YUL » yellan d tasemɣurt tasklant tamqqrant di Kaṭalunya.
Tilelli n temɣart, tanttint, aεraq… Zi tɣawsiwin xef tessawal aṭṭas Najat Lhacmi di tira-nnes. Waxxa temɣer-dd di lwest n wegdud wer itteg bu wefrag d yegmiren xef tseqqar n temɣart, maca εad tamarut tettmuɣẓar aked umukris n wefrag d ujiyyef n tlelli i tmaɣart idd‑yusin zi tussna d tmeslemt, ujar ɣer yessis n imtlaε imselmen di Urupa. Mamek yettɣima useqsi n tnettint (identity) rebda yeḥder di tira n yellis n arrif. Zeg seqsan yeqnen ɣer yemxumbal i tteddren imtlaε di tmura n bara, d mara nerni-dd ɣer‑s aseḥqar d lxezrat tanqsit, ittedder umetluε ameslem d ufrikan jer wagdudn n urupa.
S wengal wis tlata umi tsemma « yellis n midden » (la fille étrangere) i dd-yeffɣen deg useggʷas n 2015 ad tili najat lhacmi tegga amcan-nes suɣir deg uzzarg n tsekla takatalant. « Yellis n midden » d ijen wengal ɣa yewyen ict tessemɣurt-nniɣen di jjiht n Kaṭalunya, « tasemɣurt tasklant n Saint Juan ». mamec ɣa yerni ungal-a s yixf-nnes tasemɣurt n temdint n Barsiluna deg useggʷas n 2016.
« ad daneɣ xsen ass n rtnayn » d ungal amaynu yuran s tutlayt Takatalnt d Tseppanyut, yessawal xef tnayen n tmeddukal yessis n imtlaε zedɣent deg unuḍ n temdint, d wemnus i ksint ḥuma ad ddrent tudert-nsent mamek xsen-t.
Ungal-a yeksi ijen ccan yemɣer di tsekla takaṭalant, zzag-s ɣa tawi twalat-nniḍen ict tesemɣurt ɣer‑s min ɣa tini, Deg uyur yeεdun n usggas-a (2021) ad tawi najat s unagal-a tasemɣurt « NADAL » iwngal di tawalat-nnes wis 77.
D anfarar
Najat lhacmi d ict zi tmaɣarin tirifiyyin, yiwḍen ad tkkes afrag xef wattas n imxumbal d ixemrawen, i di teddren imetlaε, niɣ tamɣart tamtluεt deg Urupa, mamek tiweḍ najat ad tejj tiggezt tercem deg ungal yuran s tutlayt Takaṭalant, deg igger n tsekla d tudart tasklant di katalunya amen tkmer.
Ɣer ɛawd:
Najat Lhacmi, twwi awardi « Nadal » n tskla.
Anas Assanoussi d ijjen umari d Afransis zi Arrif