Wa d lexber, yettwafser deg ujurnal Le Petit Haut-Marnais aseggas n 1921, awern i txessart n lɛesker n useppanyu deg Uɛerwi d Selwan. Yesskan lhimmet n Arif di tiṭṭawin n uruppawiyen, kter ɛad, Aliman d Fransa, i ttuɣa ixezzaren ɣer temsarin s min ixeddmen tizi-nsen. Nerra-dd lexber-a ɣer tmaziɣt, ha min deg-s dd-yusin :
Tiggʷdi i ttuɣa yellan di Madrid, x min ittemsaran di Selwan d Uɛerwi, zixent ttuɣa din mayemmi.
Imendah iseppunya n ṭeyyarat, i dd-yuguren zi Mlilt, ẓrin ij n sskat n am wenni n imeḍlan di tnayen-a n imukan i umi dd-qewwren irifiyen.
Ij n ɣezzu yemɣar
Ca n iɛeskriyen i yiwḍen a dd-rewlen zi Selwan, ssnen tidet : « di tuffut n wass n lexmis, kksen awal aked iɣewwaɣen bac ad yeffeɣ lɛesker zeg imukan-nni bla amsinɣi, zegga i ɣa nessers lesnaḥ. Maca, umi i nessers lesnaḥ, ṭeḥḥan irifiyen ɛlaḥal merra wi ttuɣa din di teqseft, ɛad aqqa-ten ayenni ma iwḍen, ttgerfaḍen, ssekmaḍen tudrin di Selwan ». Ajiniral Bérenguer i ittrayen di Mlilt, aqa yessekk liɣata.
Maca, ma zemmren ad ssizedgen Lmeɣrib n Seppanya ?
Deg yij n tidet, Mlilt wer x-as bu tiggʷdi zeg usugi n yegrawliyen. Lexxu, tedwel d ij n lmerget n lɛesker, tefreg. Di min yeqqnen ɣer imukan i dd-yennḍen, ɛad ajiniral Bérenguer wer ɣer-s bu jjehd, xessen-t ɛad lɛesker. Iɛeskriyen i dd-ittasen zi Seppanya, wer derrben ca mliḥ. Zi jjihet nniḍen, irifiyen bedden x uḍar, ɣer-sen lmedfeɛ, tiyti-nnes tessaggʷad. Ittxessa-neɣ a nessen aqa Selwan d Uɛerwi, waxxa wer iggʷijen ca aṭṭas x Mlilt, waxxa amenni, nnḥit-a teqseḥ aṭṭas. Wer din bu ttasiɛ i di afen lɛesker rraḥet-nsen, ad ggen min x-asen, manaya, ittejja girra ad tennuḥsar deg imukan d imeẓẓyanen, d manaya iqesḥen.
Afus n uliman.
abeddi n irifiyen, d lemḥeḍ i deg-sen, d usegged i ggin i yexf-nsen, manaya, teqqar “Le Tournant” ; wer ittili illa d aliman i din awern-as. « Le temps » ula d nettat tessken s uḍaḍ ɣer uliman. Tenna aqa Arif, ttuɣa ittegg-it uliman deg wakud n girra, d ij n lmerger i zi ɣa yewwet Fransa di Lmeɣrib. Lxedmet-nni i yegga uliman, lexxu merra tenneqleb x Seppanya, d nettat i deg-s yeccin tiyti. Deg uɣezdis-nneɣni, ijurnalen n uliman qqaren aqa taxessart n Seppanya, d fayu n Fransa.
Manaya, wer t-iqebbel leɛqel, wer izemmer ad yili nican, minzi ula d Fransa, tzemmer ad tecc tiyti s temsarin ittemsaran di Lmeɣrib aseppanyu.
Le Petit Haut-Marnais, 19ème année, n°188, dimanche 7 et lundi 8 aout 1921