23.1 C
Nador
Ttlat 28 Mayyu 2024

Zi min ttɛawaden irifiyen x sidna Ɛali d lalla Faṭima

Lalla Faṭima tedɛa x tserdunt.

Ij n twala, tenya lalla Faṭima x tserdunt awern i baba-s, maca taserdunt-nni tugi qeɛ ma ad tenhezz. Lexdenni yenna-s baba-s i lalla Faṭima: “ḍer a yelli, ejj taserdunt ad tugur”.
Lalla Faṭima ttuɣa yusa-dd x-as usired, uca tefḍeḥ-tt tserdunt zzat i baba-s, lexdenni, tedɛa x-as s weḥgan. Zi lweqt-nni, taserdunt wer tettiru.

Lalla Faṭima terḍa x sidna Ɛali.

Deg yij n lweqt, ttuɣa kulma irewweḥ-dd sidna Ɛali, ittaf tzelleɛ-as lalla Faṭima andu n yirden niɣ n imendi ɣer tnebdat n tewwurt, xenni netta waxxa ittili yuḥel, wer das-itticc yexf-nnes ad yessurf irden d imendi, niɣ a x-asen yeɛfes, ittɣima ijemmeɛ-dd taḥebbuyt taḥebbuyt, ar dd-ɣa yegrew qeɛ min din izellɛen.
Ij n wass, tekka lalla Faṭima zzat i yij n wemsiqḍi n yemselmen aked irumiyen, tettwala ijjen yessenḍaw ayis-nnes x tnayen n iḍaren, yeqḍa ḥaja deg irumiyen, uca tenna aked yexf-nnes: “win raḍiɣ x-as waxxa ɣa yili d Ɛali”. Umi ɣa tḥeqqeq, tufa nican d Ɛali.
Ass nni, wami dd-irewweḥ ɣer taddart, yufa tessu-as tizerbiyin ɣer tewwurt n taddart, telqa-t-idd s tlewliwin. Lexdenni, sidna Ɛali tẓeyyer x-as tziba. Wer jjin wi wer dd-iwiyen a x-as yekkes tziba-nni, wer izemmar.
Yiweḍ lexber ɣer yij n wuday, yenna-sen: “aqqa-yi da, d necc i dawem-ɣa ufekken amxumbel-a”.
Iwyen-as-dd uday-nni, yudef x-as, yenna-s: “lexxu aqa tettmettid a Ɛali, wer zemmreɣ a c-jjeɣ ad temmted amen wer dayi-dd terrid amerwas i dac-tturseɣ.”
Lexdenni, yennexleɛ sidna Ɛali, uca terxu x-as tziba. Yenna-s i wuday-nni: cekk tettursed-ayi i necc amerwas? “
Yenna-s wuday: ” wer dac-tturseɣ ca, maca aqqa-c sserxuɣ x-ak tziba”.

Timaynutin

Ɛebdelwaḥid
Ɛebdelwaḥid
Abdelouahid Hennu

Fser-itt