Yura-t: Mimun Amsebrid
Mayemmi i ttariɣ s tmaziɣt? iles-a i yerrẓen, inewwcen; iles-a i umi weḍḍren waṭṭas n wawalen; iles-a i yellan netta “wer yelli”, yeddren netta ” yemmut”?
Iles-a i wer yessinen ad yessiwel, i wer yettwafarsen, i wer ssuydint tsatarin n imariwen; iles-a i yemsebḍan x yilsawen; iles-a i ittalyen yeṭṭar am buḥbel di rrimet n umessiwel (locuteur) ittedder akid-s, ittmetta akid-s: am tɣuyyit, am taḍesa.
Mayemmi ttariɣ deg yiles-a i wer yettwarin? Ma d “ilsawen n tira” i wer ssineɣ? niɣ d tamazucit (masochisme) i deg-i?
Wer telli d ta ula d tin!
Zeggami i ssentiɣ ad xarrseɣ di tira, necc ttwaliɣ-tent d aseɣdi, d aweḍḍer n wawal; niɣ d tarewla zeg wawal: Awal mamek ma yegga d miẓiḍ niɣ d amerẓag. Tira ɣer-i d twakkit awarn i tisit n wawal: Mani wer tettwilid tifras-nnec amen dac-tent-idd-tetterra tisit n wawalen.
Tira d zekkʷu ɣer yexf/iman (inu) di mani yezdeɣ, deg wansa-nnes: Mani wer t-ttiweḍ “tfawt” n wawal. Tira d ufuɣ zeg wawal; d aguji zeg wawal, s wawalen i yettwarin, ɣer mani wer ttiwḍen wawalen i yettwannan. Tira d tikli yettneqraḍen, yesteftufen di tebambast n yexf, di tɣemmar-nnes i yerrin tili, deg iyeddimen-nnes d izabuqen-nnes…
I tmaziɣt di marra manaya? Ttuɣa ffɣeɣ zeg useqsi: Mayemmi i ttariɣ s tmaziɣt (warlli s ca n yiles zeg “ilsawen n tira”)?
Tamaziɣt, amen nniɣ sennej, d ijjen yiles i di wer urin ayt bab-nnes. S tefras-a tina, tamaziɣt teqqim tudes i useɣdi (le silence); tudes i temlel tamezwarut, temlel n tmezwura. Ssawaleɣ x tira warlli x wawal. Tamaziɣt tessiwel, tessiwel aṭṭas!. Tenna wer tejji min wer tenni: tessiwel, tesɣuyy, tɣennej… Maca wer turi. Wer tenni di/s tira. Wer dd-tessgem bu tmuddurin di tira; wer dag-sent tessuydi bu yebriden. Tidet n tira tesseɣd xaf-s tmaziɣt; twadja-tt i useɣdi (tira d useɣdi wer llin d ijjen?!).
Xminni i ttariɣ s tmaziɣt, ttariɣ s yiles n useɣdi. Xminni i ttariɣ tamaziɣt, ttariɣ aseɣdi s yiles n useɣdi.
Xminni i ttariɣ deg ilsawen nniḍen, ssawaleɣ. Xminni i ttariɣ tamaziɣt, tteddreɣ (ssɣadeɣ ḥuma ad tessiwel tudert).
S uyenni i ttariɣ s tmaziɣt.
(Mimun Amsbrid,09/2002)
Ajurnal n Tawiza, uṭṭun 80. Dujanbir 2003.