Tsaft (TIFRAY) – Tessemɣar tamesmunt n Tziri i tyumi d tdelsa ass n ssebt 18 yennayer i yeɛdan di Tsaft s uselmad d umeɣnas Amaziɣ Muḥemmed Maɣuti.
Asemɣer-a yus-d ɛlaḥsab abrid-nnes i yewwi deg yiger n lxedmet n tmesmunin d uswizi-nnes aked lxedmet tameddant di Tsaft d Arrif d tecli-nnes deg uselmed n tfilusuft i di yekka ca n 17 n iseggʷasen di Tsaft.
Yerẓem Ɛebdelmunɛim Acbuq, i yellan di tmesmunt n Tziri, taɣimit-a s ubarek n useggʷas Amaziɣ, qbel ma ad yessiwel x usentel n tinawt-a umi tegga Taziri “tasertit tasnilest di Lmuɣrib: Man amkan n Tmaziɣt?”.
Yessiwel di tinawt-a Xamis Butekmant d Muḥemmed Maɣuti, ameggaru-a ijbed-d imxumbal n Tmaziɣt awerni 14 n iseggusa zegga i d-tessidfen di ddustur d min ɛnan iɛenkraf ittbeddan deg wudem-nnes maḥend ad teṭṭef amkan-nnes i testahell.
Am mamec i d-issken ila amussu Amaziɣ ixess-as ad yerzu x tesrtratijiyin d jjdid d yebriden-nniḍen n lxedmet.
Zeg uɣezdis-nnes, ikrtika Xamis Butekmant amsurruf n ddewla n Lmuɣrib aked Tmaziɣt mani i d-tettegg di texxamt n ufulklur maḥend ad tzewweq ddewla udem-nnes n berra.
Zi senni ibedd ɣer nnumru n imessiwlen n Tmaziɣt deg ustatistik ameggaru, mani ijbed imeẓẓuɣen i umussu Amaziɣ maḥend ad yegg tizemmar-nneḍni zzat i min isemma “asmaḍal n ilsawen”.
Imutti wemsagar-a, awern-as, ɣer uzgen-nnes wis tnayen, mani issmeɣren s Muḥemmed Maɣuti. Uca, ksin imeḥḍaren-nnes iqdimen d imeddukal-nnes awal nnan-d di tesɣart-nnes timegga-nnes tisebḥanin i yegga deg yiger n uselmed d lxedmet n tmesmunin.
Ad d-neydar ila Taziri tewwec-as ijjen tufqit i mass Maɣuti i isfekkaran s tmegga-nnes tisebḥanin d anɛam s tzemmar-nnes, am mamec tegga ijjen ficta n watay x wuddur-nnes.
Amek nessen ila Muḥemmed Maɣuti d ameɣnas n umussu Amaziɣ d aselmad n tfilusuft, imutti, azzɣat, ɣer Taza, zegga yekka ca n 17 n iseggusa nettad aselmad di Tsaft.
