19.1 C
Nador
Letnayen 17 Febrayer 2025

Tawiza n tibbi (tanfust i imeẓẓyanen)

Deg yij n tebḥirt tetturfi, tuzzegzewt ttuɣa tessfi-dd x tmewwa-nnes, tlellec s iɣemmuyen zi mkul aklasi. Ttuɣa din aɣeddu n teyzint, iceṭṭeḥ aked leɛwin, d uɣeddu n tbitast yemḥeḍ ixf-nnes, iqellec, tɛejb-as tnesnast i x-as ittfajan kul tuffut. Jer-asen di aɣeddu n yermullec ula d netta, ixezzar min ittemsaren di tebḥirt.

Deg yij n wass, yenḍeq-dd uɣeddu n yermullec, yenna-s i teyzint : « min am-ibanen a taɛcirt a nmun necc d cem, d tmeddukkelt-nneɣ tabitast, a dd-nsaqer ij n tẓewḍa n tibbi tledd, a zeg-s nessefreḥ afellaḥ d tarwa-nnes ? ».

Tqellec teyzint tirit, temxetway s tbaccaḍin di leɛwin, tenna-s : « mala texsed ad traḥed ad tebbuẓẓled di tebqeyt, a c-qessen ixedmiyen, ruḥ weḥd-c, necc wer xaf-i icedd rebbi ! necc ɛad tazegzawt, rezzuɣ ad rreɣ mezri, wenni dd-ɣer-i ɣa iqerrben, a das-qqseɣ ! »

Teḍhek tbitast, tenna-s : « d tidet a tajjart-inu tayzint, min aneɣ-iruḥen deg ufellaḥ ? uyac a wer-yecc ! »

Ixeyyeq uɣeddu n yermullec, minzi yessen aqa netta wer izemmer ad isaqar tibbi weḥd-s i ufellaḥ, tayzint d tbitast ugint a das-wcent afus !

Ɛdun cwayt n wussan, tebda teyzint ad tegg ifadden, tabitast ula d nettat bdan wafriwen-nnes ad werɣen, tteslan i wesbeɛɛi n txeswin d wesmuhret n tfunasin deg yegran i ten-yudsen. Lexdenni, yecca-ten-dd leḥmu, ssnen min ɣer-sen dd-yegguren.

Yeksi uɣeddu n tbitast s wesqinfet, yenna-s i yermullec : « al lexxu i ssneɣ aqa min aneɣ-tennid d tidet. Afellaḥ i daneɣ-ittsesswen, i x-aneɣ yesserḍiben tamurt, wer kid-s nbedd ca umi ttuɣa nerḍeb, lexxu nettraḥ nettewsir, a daneɣ-ffẓen ifunasen ! »

Tenḍeq-dd teyzint s wesḥissef ula d nettat, tenna-s : « ɣer-k lḥeqq ay aɣeddu n tbitast, necc ndemmeɣ umi wer neswizi aked yermullec a nili d tibbi tledd i ɣa iɛejben i ufellaḥ d tarwa-nnes ! ».

Yeswiẓẓeḍ-dd yermullec s tbaccaḍin-nnes, iderreɛ i teyzint d tbitast, yenna-sen s lefraḥet : « ɛad wer yeɛdu bu lḥal, ɛad deg-neɣ min ɣa yilin d macca d tasebḥant i ufellaḥ i x-aneɣ iɛizzen. »

Ferḥen iɣedduten umi smunen rray-nsen, dewlen d ij n lḥajet ad tenfeɛ afellaḥ i ixeddmen tamurt.

Timaynutin

Ɛebdelwaḥid
Ɛebdelwaḥid
Abdelouahid Hennu

Fser-itt