Yura-tt: ƐISA (AISSA EL GOURARI)
Ass-a ad ariɣ x yijj n tnamit tteggent taqbilt n Igzennayen, a nessiwel x wurar-nsen. Tanamit-a Ɛemmers wer tt-zriɣ di cra n uraq nneɣni.
Ass amezwaru ɣer wesli (Mulay), tteggen ij n tnamit qqaren-as: “Yirden n Baba“, niɣ “Acmin“.
Umi qqaren Yarden n Baba? d min deg-s nettegg?Manaya i ɣa nessen deg wedris-a. (Artikel)
Amezwaru ixessa a nessen melmi nettegg tanamit-a?
Tanamit-a tteggen-tt deg wass n rraziq ɣer wesli (Mulay), ass-nni di tnegraw twacumt n wesli (Mulay). Ad kkerent temɣarin zik ad fernent yirdan, d marra min ɣa sɣawsent (ḥwajent).
Xminni ad tqareb aa teɣli tfuyt ad munent temɣarin marra, timezyanin d tmeqranin. Asli i yirred qubbu netta d wewzir-nnes.
Timɣarin ad ggent taxrazt x ij uḥebbi iri deg-s aman, ad sunnudent yarden x uḥabbi-nni.
Timɣarin ttilint d tirbiɛin, ya tyuya ya kṭr, ad ggent taxrazt x yirden-nni ad fernent akid-s qqarent izlan-a:
awint-idd aḍil a tizuyer-a
awint-idd aman a tiseynan-a
Timɣarin-nni azgen iqqar asḍḍar amezwaru. Azgen-nneɣni iterrad s ueḍḍar wis tnayen.
A dd-rrent i izri-nni xemsa n twalatin, xmini ɣa kemmlent zeg wis xemsa, ad mḥizwarent x yirden-nni, ad xezrent ug ikessin taseqqert temɣar x tenneɣni, ammu i ɣa qqiment ij n sebɛa n twalatin.
Ag uneggaru ad awyent idegdeg ḥuma ad ddzent yirden-nni ar ɣa idwel d Acmin, nitenti tteddzent, timɣarin ceṭṭaḥent qqarent izlan n zik x Ralla Buya d tlewliwin d (sala u slam x rassul). Xminni ɣa kemmlent ad ksint Acmin-nni a t-snennent a x-as ggent aksum d lxuḍert, ḥuma a zeg-s mmuneswen yirgazen-nni i ɣa yeggen rraziq i wesli.