Ma d necc ig ifsusen
Niɣ netnin iɣisen?
Iḍennaḍṭ ma d ass-a
Niɣ deɣya mrawasen(1)?!
Ma d agercal i dḥiɣ
x undu n yifillusen
Neqqben ussan-inu
Ila beṭṭiɣ xaf-sen?!
Niɣ d aslem imxumbel
Gi tracciwin-nsen
Ttmezlageɣ deg-sent
Niɣ d aselguṭ ɣur-sen?!
Tiqqest n wenn yudsen
D uzzal itteqsasen..
Ittmuda-t usemmiḍ
D aseddi iqqersen!
Agezzum i ɣa jjen
Deg wul ittnixsisen,
D abrid i bab-ines
Wenni wer yumisen!
Tikliyin ha ugureɣ
Ma llan yimeɣnasen?!
Ha ssurfeɣ ɣer tagant
Ma ɣur-i iɣilasen?!
Man tikli ɛad ɣa geɣ
Qa kksen-ay ifassen?!
Man uḍuf i ɣa geɣ
Iḍaren qa qessen?!
Ma ibriden weddren,
Gi tekliyin, ɣennsen..
S usurif ikmummsen
G umeɣnas i deg-sen!
Ad inin min xsen,
Imeẓẓuɣen jersen!
Ad kken mani xsen,
Imummuten ɣemsen!
Ma ad innegzem, ɛad, wul
Anect min t-isewwsen?!
Niɣ ɛad ad tali tfuyt
Xef yimal iferrsen?!
Iyya ma a das-tinid:
Qa ksiɣ da imnusen..
Niɣ ad tinid: qa necc
I kid-sen dd-ittasen!
Qa netnin ẓaren-cekk
D izi n yifunasen..
Teddebdubed s wass
Gi tdabut(2) jar-asen!
Qqen-itt mani tudes
Ɣur-k ad ɣar-s adsen!
Imal xezr-it mliḥ
ḥuma wer x-ak sessen!
Mala texsi tmessi
Nḍar inifisen(3)!
Enɣ aɣyul i dag-k
D unelli(4) ixnunnsen,
D min dak-dd-ssersen,
Xettes min ttarsen
S tɣuyyit ittlaɣan
I tmexsa yususen!
Sɛulla ixf-inek..
Qa talayt yudrusen
Tendu(5) min yiriwen
X ucal ittususen!
Cekk tellid gi tagant,
Iwdan d iqessasen
Ticuni ha teggid-tt
Qa wer tellid zeg-sen!
Ili min ma tilid
Mrussen niɣ ssen..
Egg-itt amux tt-xsen
ɛemmars ad cekk-xsen!
Sifaw Lhanis
—————-
1- mrawasen: mcabahen, ttawin-dd deg wayawya.
2- tadabut: missa, ṭabla, taṭifurt.
3- Inifisen: tinifas d timeqqranin, tinifas ict ines d “tnifest / tanifest”.
4- anelli: leɛqel.
5- tendu: tenti.