Deg ijjen ddcar, di lkampu arusi, ttuɣa tettɛic din ijjen tneybut d tayujilt, wer ɣer-s bu yemma-s. Baba-s, iɛawed lemlak, maca tamɣart-nnes n jjdid ila tella d tamcumt. Tekreh taḥenjirt-nni, lebda tesɣeṭṭal zzag-s. Ijjen wass tfekker tamɣart-nni uca tenna : “mamec ɣa ggeɣ a xaf-i swesqeɣ taneybut-a?“.
Ijjen wass, argaz-nnes ila yruḥ ɣer ssuq ḥma ad izzenz imendi, uca tenna-as i tḥenjirt-nni: “Raḥ ɣer weltma, xalt-m tabbaḥt, awi-d zɣer-s ijjen tsegneft ḥma ad gnuɣ ijjen teqmijjat”.
Iwa xenni, taḥenjirt-nni, tessers ijjen uḥewwaq x uzellif-nnes uca traḥ ɣer-s. Deg webrid, tfekker aked ixef-nnes: “D amezwaru ad ẓreɣ min dayi ɣa tini xalti n tidett, ultma-s n yemma nican”. Uca amenni nnit, tessnewj-itt xalt-s.
Tenna-as : “Xalti, mama n jjdid tessek-ayi ɣer weltma-s ḥma ad zzag-s ttreɣ tasegneft d ufilu maḥend ad ayi-tegnu ijjen teqmijjat. Maca lux, usiɣ-d ɣer-m cem, ḥma ad cem-cawreɣ.
– Ɣer-m lḥeqq. Aqqa ultma-s n temɣart n baba-m d Baba-Yaga, tamẓa-nni tamcumt!
Maca sel-ayi: aqqa din di tebḥirt-nnes ijjen tzemmurt, ad cem-tesderɣel s tseḍwin-nnes, cedd ijjen ufilu x uẓɣer-nnes. Xenni, ad tettwalid ijjen tjarrect d tameqqrant ittzehhiren, tettxes ad tbelleɛ zɣer-s waha. Ferreɣ zziyt x ẓẓekkrun-nnes. Ad din ilin iṭan a x-am d-zun, wc-asen tileqqa n weɣrum-a iḥman. Ɣer umeggaru ad din teẓred ijjen tmuccewt ad cem-tessru, wc-as taqeddidt n yikerri.
– Ɛafak a xalti.” Terra x-as tḥenjirt-nni.
Uca teṭṭef abrid, ar mani tiweḍ ɣer taddart n Baba-Yaga. Tameggarut-a ila tẓeṭṭa ijjen tzerbit:
“-Ahlan a xalti.
– Ahlan a tayyawt.
– Yemma tessekk-ayi-d ijjen ɣer tsegneft d ufilu ḥuma ad ayi-tegnu ijjen teqmijjat.
– Waxxa, raja ad raḥeɣ ad am-rzuɣ x ca n tsegneft d ca n ufilu d acemlal. Lux, cem qqim deg wemkan-inu, ẓẓeḍ din.”
Tebda txeddem taḥenjirt-nni x uẓeṭṭa, d nettat iɛejb-as lḥal.
Ijjen cwayt, tesla i Baba-Yagna teqqar i txeddamt-nnes deg wesqif: “Siḥma lburmet uca slil tayyawt mliḥ. Qa xseɣ ad zzag-s mmunsweɣ llilet-a.”
Tebda taḥenjirt-nni tetterjiji s tiggʷdi. Teẓra taxeddamt tezdem-d ikecwaḍ d izeɣran d tseḍwin i yuzɣen d ca n teqnucin ccurent s waman. Xenni tesniɛmel tessiwel s leḥnunniyet ɣer txeddamt-nni: “Hi a Tabbaḥt-a; awi-d drus n ikecwaḍ waha, aɣ-am aɣerbal-a ḥuma ad ayi-tettawyed aman!”. Uca tewca-as aḥewwaq-nnes azeggʷaɣ asebḥan.
Xenni tebda txezzer taḥenjirt di min das-d-yunuḍen. Ijjen tmessi tegga ḥaduq deg ucimini, bdan waman ttbeqbiqen di lburmet, waxxa ttuɣa-ten d aman n temẓa, maca ila ttɣennjen s ubeqbeq-nni, ijjen uɣennij yessbeḥ.
Maca yebda ssber n Baba-Yaga iqeṭṭa. Zeg usqif teqqar-as-d: “ma tẓeṭṭad, a tayyawt? Ma tẓeṭṭad a temɛizzit-inu?
– Wah ẓeṭṭaɣ, a xalt-i, aqqa-ayi ẓeṭṭaɣ.”
Tekker tḥenjirt bla ma ad tegg lḥess, teffeɣ zi tewwurt… Maca muc-nni ttuɣa-t din, yezded, d aberkan, issaggʷad! Tiṭṭawin-nnes d tizegzawin uca ixezzer di tiṭṭawin tiḥmaymiyin n tḥenjirt tameẓẓyant. Ila issufeɣ-d ibecxaḍ-nnes ḥuma ad tt-yexbec. Maca tewc-as ijjen tqeddidt n uḥuli uca tenna-as: “Iwa luxa ini-ayi, ɛafak, mamec ɣa ggeɣ ad as-rewleɣ i Baba-Yaga?”.
Yeqqim umuc ittett di tqeddidt-nni n uḥuli, illeɣ ccnabar-nnes uca yenna-as: “ksi tamceḍt-a d sribita-ya, xenni ksi s tazzla. Ad cem-teḍfer Baba-Yaga. Maca sers ameẓẓuɣ-nnem x tmurt, mala tetteslid-as tettqarrab-d, nḍer sirbita, uca ad teẓred! Mala ɛad teqqim tḍeffer-icem, sers imeẓẓuɣen-nnem x tmurt, xmi i das ɣa tesled x webrid, nḍar tamceḍt uca ad teẓred!”.
Tqada taḥenjirt-nni mucc, teksi sirbita d temceḍt, uca teksi s tazzla.
Maca ḥa teffeɣ zi taddart, tebreq ijjen tnayen n yiṭan d izdaden kṭer zeg umuc, wejden ḥuma ad tt-zeɛfen. Tenḍar-asen aɣrum ireḍben, uca wer das-ggin walu.
Zi senni, ila din tajarrect-nni tameqqrant ittexsen ad tbelleɛ x ixef-nnes ḥuma ad tt-tejj wer tɛeddi. Mamec i das-tenna xalt-s, tzelleɛ x-as cwayt n zziyt x ẓẓekkrun, uca tennurẓem tjarrect ḥma ad tejj ad teɛda. X webrid, tebda tettnhezza tazemmurt-nni ḥma ad as-tessek tiseḍwin x tiṭṭawin. Maca tcedd-as ijjen ufilu x uẓɣer-nnes, xenni temmel-as abrid.
Tebda tettazzel, tettazzel, tettazzel. Yebda umuc iẓeṭṭeḍ deg wemkan-nnes. Zeg wesqif, tettseqsa-d Baba-Yaga ijjen tawlat-nneɣni: “
ma tẓeṭṭad, a tayyawt? Ma tẓeṭṭad a temɛizzit-inu?
– Wah ẓeṭṭaɣ, a xalt-i, aqqa-ayi ẓeṭṭaɣ. Itterra-d x-as umuc s ijjen ssuṭ yegdar.”
Tcekk Baba-Yaga, tessij-d x-as. Qaɛ wer din taḥenjirt-nni! Tewseq muc-nni amen i x-as tesɣuyyu: “Mayemmi wer das-texbiced aṭṭawen, ay axewwan?
– Hih! i das-yenna umuc. Wer ssineɣ mecḥal zeg wami nec aqqa-ayi xeddmeɣ-am i cem, uca ɛemmer-s wer dayi-tewcid iɣes abezkukkuḥ, nettat tewc-ayi taqeddidt n uḥuli!”.
Tewseq Baba-Yaga iṭan-nni. “Hih! nnan-d iṭan. Aṭṭas zi mani nxeddem ɣer-m uca ɛemmer-s ma tewcid-aneɣ ula d taleqquzt n weɣrum i yuẓɣen? Maca nettat tewc-aneɣ aɣrum yeḥma!”.
Tessenhezz Baba-Yaga tajarrect. “Hih! tenna tjarrect. Iwa aṭṭas zi mani nec xeddmeɣ-am, maca ɛemmer-s wer texwid ula d taneqqiḍt n zziyt x ẓẓekkrum-inu, nettat tkebb x-as abarru zzag-s!”.
Teṭṭef Baba-Yaga di tzemmurt-nni. “Hih! i tenna tzemmurt. Iwa aṭṭas zi mani nec tticceɣ-am zziyt, maca ɛemmer-s xer xaf-i tcedded filu, maca nettat tcedd xaf-i ijjen ufilu n leḥrir!.
– I nec, i tenna txeddamt, umi lebda tettred timeslayin? I nec. Tessned ila nec aṭṭas zi mani d nnec xeddmeɣ-am, merra min zzay-m ẓriɣ, yalleh ijjen uḥlas, maca nettat tewc-ayi ijjen uḥewwaq d azeggʷaɣ!”.
Tlaɣa-d Baba-Yaga x umehraz-nnes, yus-d s tazzla, tenḍu dag-s. Tirar s udeydey-nnes uca temḥa later-nnes s tmedwast, uca tebda traḥ ad teḍfer taḥenjirt-nni di ddmani.
Maca taḥenjirt-nni tegga imejjan-nnes x tmurt: tettesla i Baba-Yaga tettades-d. Xenni tenḍar sirbita uca tedwel d ijjen yeɣzer d ameqqran! Ttuɣa Baba-Yaga uɣil x-as ad tbedd.
Tezɛef deg iyencicen-nnes, dewlen aṭṭawen-nnes d iwraɣen, tuzzel ɣer taddart-nnes, tessufeɣ-d tlata n igenduzen-nnes zeg ufital uca tgewwed-iten ɣer yeɣzer! Swin igenduzen-nnes merra aman n yeɣzer-nni ar taneqqiḍt tameggarut. Uca tebda tḍeffer-itt ɛawed.
Ttuɣa tiggʷej tḥenjirt. Maca waxxa amenni tessrs imejjan-nnes x tmurt. Tesla i ideydey x webrid. Tenḍer tamceḍt-nni uca tedwel d ijjen tiẓgi d tameqqrant! Txes Baba-Yaga ad tadef di tiẓgi-nni, ad tqess tiseḍwin-nnes imcebbaken s teɣmas-nnes, maca walu!. Tebda tettesla ɛawed tḥenjirt maca walu. Tesla mɣar i waḍu ittsuḍ di taydiwin tizegzawin n teẓgi.
Xelli amenni, teksi s tazzla, minzi tebda tneddel-d tallest, tfekker aked ixef-nnes; “Ayyaw, ad yettɣil baba ḥa weḍḍreɣ.”
Afellaḥ-nni awessar, zegga i d-idwel zi ssuq, isseqsa tamɣart-nnes: “Mani tella tḥenjirt-a?
– Wi issnen! terra-d x-as tamɣart-nnes. Wer ssineɣ mecḥal zi mani i tt-sekkeɣ ɣer xalt-s.” Ɣer umeggaru qaɛ, taḥenjirt-nni, s igemmizen d izeggʷaɣen s tazzla, tedwel-d ɣer baba-s. Isseqsa-tt:
” Mani ila tellid a yelli”
– Ah! a baba, i das-tenna, mama tessek-ayi ɣer xalt-i ḥma ad as-d-awyeɣ ijjen tsegneft d ufilu ḥma ad ayi-tegnu taqmijjat, maca xalti, tessned min teɛna? D utma-s n Baba-Yaga, tamẓa-nni taɛeffant!”
Tɛawed-as merra min das-yemsaren akid-s. Awessar-nni ila iɛesseb bezzaf. Uca iwseq tamɣart-nni zi taddart-nnes, yenna-as aqqa ad tdewled ɛad.
Zi senni, tɛic taḥenjirt-nni d baba-s di laman d wefra. Kkiɣ x ubilaj-nnsen, ɛerḍen-ayi ɣer taddart, sswejden-ayi-d amensi, uca kulci ila aqqa-t mliḥ x-as.