Ttɛawaden di min yeɛdun, yekker Umaziɣ iraḥ ad iɣewweɣ x tutlayt d tnettit-nnes, Yenya x ij n uyis d aɛrab, yeksi ibanduten recmen s taɛrabt, yeksi deg iɣuyyan s taɛrabt, yeṭṭef abrid ad yemmneɣ aked taɛrabt, maḥend a dd-yerr tamaziɣt. Iseggusa n tecri, timedditin n useqsi, d wussan n umenɣi.
Lami ɣa yaweḍ ɣer ddemnet mani ɣa yemquṭṭes x wawal-nnes, yufa din ij n weydud la d netta yenya x uyis d aɛrab, yeksi ibanduten recmen s taɛrabt, ikessi deg iɣuyyan s taɛrabt. Lami ten ɣa-yesseqsa min ɛnan, (s taɛrabt), yufa d Imaziɣen (rrin-dd x-as s taɛrabt d wejbad n yiri) .. usin-dd la d nitni a dd-rren tmaziɣt-nsen.
Iyduden-a s tnayen wtin tiɛiccwin di ddemnet-nni, qqimen din ttmenɣan jer-asen, s taɛrabt, manwen i ɣer tella tmazigt n tidett, man tamaziɣt idd-ɣa-rren? manwen yettursen aṭṭas qaɛ di tmaziɣt (idd-ɣa-rren)?.. Nhar umi feqden ixef-nsen, ufin tweḍḍer-asen cwayt nni n tmaziɣt i ttuɣa ssawalen. Maca qqimen sniɛmilen x wayawya, mkul ij yeqqar tmaziɣt-inu tifa tenni-nwem, s taɛrabt!
kkiɣ-dd ssa d ssiha, jjiɣten ɛad din, Maziɣ yessawal aked umaziɣ x tmaziɣt, s taɛrabt!