Ḥennu Waḥid
Nessen ila zzman yeggur ɣer zzat, ittlemmaẓ later n wussan, ḥuma a dd-lulen wussan nniḍen, s tefras nniḍen…
Di lwesṭ n manaya, din amun itteqnunnuy, ineḥḥed ula d netta tifras-nnes, ittenḍbara aked wakud, ḥuma a t-idd-yeffu iweḍḍer ticli-nnes, yettu isuraf-nnes, yemḥa tifras-nnes… Ittḥaz-aneɣ uya, ḥuma a dd-nesseɣrey iseqsan zi tdiset n tidet-nneɣ, a nengez tiseḍḥac i di nemxumbel,…
A naɣ x mindi nella d mani neggur, amen nettaɣ x mamec daneɣ-ttuɣa… Iseqsan d iḥḍiḍen… D iqubbaniyen… Maca tteqqsen… Gezzmen… Qbel i manaya, wadmem-ayi; min teɛna tenni i ttuɣa wer dd-yenniyen x weɣyul ? Ssneɣ ila tessnem-tt… D tenni d nettat, d tubbuhelya… I lexxu ? Ɛad wer dd-tenniy x weɣyul ? Niɣ wer neqqim ca nettaɣar-as i tubbuhelya, wer neqqim ca nessenhemma… Ataɣ temqudda aked tiɣit? Niɣ nemḥa igmiren i ibeṭṭan jer-asent, wer nessin mani tettkemmal ta, ula d manis tbedda tin?!… Wi yessinen?… Tubbuhelya, lexxu tbeddel iɣyal… Zi lebda ttuɣa wer x-asen tenniy… Lexxu tettacem-iten… Wer ten tettsedḥi…
Iḥesrah x wi ttuɣa i ittsedḥan iɣyal, ittacem tiberdiwin… Lexxu wer qqimen bu yeɣyal i yesdahellen leḥya… Qqimen illa yeɣyal i dd-teẓẓuɣɣara tubbuhelya, ad sqaden teɣyel-nsen zi tiṭṭ n kamira n wetliffu-nsen, sekkfen-tt waraqen n wemsawaḍ anamun, uca ili sɛillten azzerg-nni i wer yeddurryen x ḥedd… Man taksart i yejjin amunen tteqnunnuyen s tazzla, s deɣya deɣya, al awḍen fessyen di teɣyel, icekkʷyen di tubbuhelya?.. Man ddeɛwet i ileqfen nnɛawat-a i yennufeslen zeg yexf-nsen, dewlen wer ɛnin, wer yeḍhir min tteggen, ula d min rezzun?…
Min ɣa yejjen bnadem ittemqabal aked bnadem, kul ijjen yessajja-dd zi tburjet n kamira-nnes, ittetter zeg yewdan ad ɛebbẓen, a dd-ssekken ayyraden d nnwar… Ɣer uneggar, ad ḥekmen x yij d wenneɣni, ijjen ittkebba zzɛefran x yexf-nnes, ijjen ittreẓẓa timellalin x uzellif-nnes, ijjen yessexnunnus aɣembub-nnes di tmelli… Ttexnunnusen, deḥḥan kter zeg yiṭan…
Min yessiwḍen aterras, wer ɣer-s tettɣimi lqimet ? Wer yessenhemmi ? Ɣer-s tasawent d teysart d icten !.. Min yejjin bnadem ad yehdem igmiren n wamun s tuḍḍerɣelt, ad yehda ixf-nnes i kamira n utilifun, i t-yezzuzzuran d tiseḍḥac di qeɛ izurag?… Min yejjin bnadem yennufsel zi tebnademit-nnes ? Min t-yejjin yeffeɣ-it nnefs?
Ewc-as-dd a dd-yessiḍef isuldan waha, waxxa ɣa yedḥa am ubaɣus n jameɛ lefna, wer das-tewqiɛ… Maca deg uɣezdis nniḍen, din wi ideffɛen amunen n umaḍal amen yekmel, ḥuma ad rewyen ixf-nsen deg uberyuḍ-a, a dd-saqaren ij n bnadem d merẓem-qemmuc, ij n bnadem d abaɣus, niɣ yif-it ubaɣus… Din bnadem acemlal, i ttuɣa ittwalan qeɛ imezdaɣ n ccerq, d Tefriqt, qeflen, wer fehhmen, ittxessa-ten ad ttwaḥewwsen, ḥuma ad adfen di tɣerma n ayt Uruppa… Ḥewwsen min ḥewwsen.. Ukren min ukren … Teqqim ɣir tɣerma-nsen am teqzint i ineddhen ulli n teɣyel n wamunen i yettwaḥewwsen, ittzellaɛ-itt di legɛudi n waraqen n wemsawaḍ anamun…
Diha, di texxamt-nnes i ɣer tella tẓeqqa am weɛrur n weɣyul… Tersa x-as temlel n wedfel… Aqqa-t din, yegga aḍar x uḍar, yeẓẓɣal s lgaz n yegduden i di ssefruryen teɣyel… Yeqqar, ittxarres, ḥuma a dd-isaqar ca n kamirat d timaynutin, i ɣa yejjen tubbuhelya tzelleɛ… I dd-ɣa yessefruryen xarebbi n ibaɣusen… Lḥasul, a daneɣ-yejj rebbi di teqcurt-nneɣ… Ɛad a neɛqel i ca…