Deg wass n 28 cutenbir i dd-ɣa-asen, iggur ad dd-mmlen deg uɣawas n “iẓewran d wafriwen” (des racines et des ailes), ass n 28 cutebnir, mamec yegga wudem n uferɛun, aya xedment x-as ca n tmussnawin.
Mamec ttuɣa yegga uferɛun, aked 103 n iḥenjiren, d 200 n txeddamin d 11 n temɣarin, zzag-sent ula d Nifertiti ittwassnen? Manaya iggur ad iẓer tfawt s lxedmet tazdadt n ijjen tseḍma n tmussnawin i ɣa-yejjen amaḍal amen yekmel ad issen mamec yegga wudem n Ramsis II, 3300 n useggʷas awerni i lmewt-nnes.
Aya yus-dd deg yiger n wektay wis mitayen ɛam zeg wami i yewweḍ umussnaw Champollion ad yessen tira n tihiruglifiyin, s uya aɣawas n “iẓewran d wafriwen” ass n 28 cutenbir ɣer tseɛɛet n 21h10, x France 3, ad dag-s mmlen tafizyunumit n uferɛun wami ila ɣer-s 25 n useggʷas d wami iwweḍ 95 n useggʷas. Ca n ttsawar-nnsen yalleh mamec i ten-dd-fesren x France Info.
Taseḍma-ya n tmussnawin i di ttuɣa Caroline Wilkinson i yellan d tanṭrupulujit tazerfant di tesdawit n John Moores di Liverpool, d Sahar Saleem, i yellan d taplyuradyulugt di tesdawit n Lqahira, xedment x tmumit ittwaḥsan deg usalay n tɣermiwin di Lqahira.
Umi tatiknulujit tugur ɣer zzat, iwwḍent “ad fekkent aqcac n Ramsis II maḥend ad as-ssirḍent acewwaf”, d aya i yenna ijjen usiweḍ x tbadut. Sahar Saleem, izwar-as texdem di ca n tɣuriwin-nnes x waṭṭas n tmumiyin-nniḍen am Séthi I d tutɛenxamun.
“Xminni nxezzer di ca n weqcac di twalat tamezwarut, nrezzu di beddu x ifruriyen i zi t-nezferraz” D aya i tenna Caroline Wlikinson deg udukumuntir, min xef texdem France info. Qbel ma ad terni ad tini: “Ameknaw n manaya, wenni n Ramsis II, ɣer-s ijjen wanẓar d miriw. Aqqa-t, jar waṭṭawen, yuɛla, iban mliḥ”. Awern-i ijjen lxedmet d tazdadt, tiweḍ ad tessen mani llant teksmuin n wudem n uferɛun. “Cḥal ma temten ca n teksumt, cḥal mma tejja izumal-nnes x tzeqqa n weqcac”. Aya i tenna Caroline Wilkinson. Tenna France Info, ila tamussnawt-a teswiza s ca n tetiknulujit i zi tiweḍ ad tessen tefras n wudem n Ramsis II. Tumlayin i tewca Sahar Saleem, x twiza n lexdayem n arradyuluji, jjint abrid maḥend a nessen kulur n yilem-nnes.