33.1 C
Nador
Ssebt 13 Yulyu 2024

Amari Saɛid Belɣerbi yeṭṭef amasṭer g tsekla tamaziɣt

Yemsar wemḍakar n wuḍuf n umasṭer n tsekla d tussna tamaziɣt, ass n larbeɛ 03 zi yulyuz 2024, di tɣiwant n Nnaḍur, awarn i yij n trezzut d tamassant yeswejd-itt-dd umerzu Saɛid Belɣerbi, ibedd x-as uduktur Lyamani Qessuḥ, asentel-nnes: “tangalt n rrimet deg yezli amiwan arifi: tamyadast d tasimyutikt”.

Amari d umerzu Saɛid Belɣerbi i yettwassnen s tiɣist-nnes, amen yettwassnen zeg yewdan i yeqqimen ɛad deg wejɣul n leḥya d uweqqer, s manaya, iɛizz x qeɛ wi t-yessnen zi ladas niɣ zeg waggʷaj.

Tarzut-a nnes, teksi tasɣart-nnes n tiyyita deg wuru zeg iselmaden i tt-yeɣrin, d yinni x-as ibedden, minzi, yegru-dd deg-s xarebbi n yezlan n Arif i yeqqnen ɣer usentel n rrimet n bnadem, tamɣart kter.

Zi ssenni, yegga-sen ij n usefsi d asimyutik. Tarzut deg usentel-a, wer tehwi ca, maca tufa amerzu i ifafan deg yefran-nnes, yezzelz taɛejjajt x tsekla n Arif i yeḥdajen ɛad tirezzutin am tina.

Tayemmunt n umḍakar ttuɣa deg-s, aked uɣezdis n Lyamani Qessuḥ, Jawad zzubeɛ d Muḥemmed Saduqi, i yellan d iselmaden deg umasṭer n tsekla d tussna tamaziɣt.

Di leḥsab-nnes di Facebook, yura Belɣerbi: “ttuɣa-t d ij n wass yecna s waṭṭas, mani yemsar wemḍakar n weṭṭaf n umaṣter di tsekla d tussna tamaziɣt di tesdawit n Nnaḍur.”

Saɛid Belɣerbi, aked uɣezdis n min yettwassen s trezzut-nnes deg wazzerg n tsekla tamaziɣt, ttuɣa ttwafesrent-as trezzutin di tesɣunin d ijurnalen, yesserɣ deg-sen tifawin x waṭṭas n isental yeqqnen ɣer tsekla tamaziɣt, taqdimt s umata. Ttuɣa yizwar-as ɛawed yefser ij n wedlis x tɣemsa tamaziɣt.

Aked uɣezdis n qeɛ manaya, yettwassen s tira-nnes icewwren deg yiger n wallas aseklan (tullisin, ungal) , am “aswaḍ yebbuyebḥen”, “asfillet”, “nunja tanecruft n izerfan” … Amen ttuɣa-t zeg imezwura i yuɣren i lhimmet n uturjem ɣer tmaziɣt, s uyenni, iturjem tullisin d tikurdiyin ɣer tmaziɣt n Arif, azwel-nsent “anfarar”.
Belɣerbi, d ij n weẓwer n tmurt i wer ittmettin. D ij n weẓwer i di tleddu tussna d tsekla n tmaziɣt…

Timaynutin

Ɛebdelwaḥid
Ɛebdelwaḥid
Abdelouahid Hennu

Fser-itt