Tanfust n Gianni Rodari – Tasuɣelt n Asmaa Aouattah
Ixemmem ijj n ukurẓemmiw, ijj n wass, inna deg wul-ines: “Ussa maɣar leḥbab-inu qqaɛ gguren metkermin? Nec mli ufiɣ ataf ggureɣ ar dat am ijerwan. Ad lemdeɣ, mala ur wwiḍeɣ, ejj ad ay-iwḍa unewwar!”.
Issenta almad n tikli ar dat, gi tnuffra, jer n yeẓra n yeɣzar. Ussan imezgura iweṭṭa-dd iwehhen s lweḥlan. Ittmuzguḥ mani ma, ittkunsur-as yilem, ttadfen-as iḍaren deg wayawya. Maca ass x wenneɣni, ibda ittseggad tikli s umeḍrun. Kulci x ulmad, awi-dd ad ixes bnadem waha.
Wami yumen ixef-ines ila iggur nican, inna-sen i leḥbab-ines:
—Xzaret deg-i mliḥ.
Uka iwwi tanekkayt ar dat.
—Ih ya mmi tsa-inu! —teksi yemma-s deg imeṭṭwaen—, yak ma txeṭṭer-ak? Err-dd lbal-inek, ugur amuk dak-slemden baba-k d yemma-k, ugur amuk tteggen ayetma-k min xef tɛizzed.
Ayetma-s, maca, rran-tt x tḍeḥḥakt waha.
Baba-s indi deg-s tiṭawin, ikres deg-s twarna, inna-as:
—Ikfa-s i tubbuhliyya-ya! Mala texsed ad tiɛiced akid-neɣ, ugur amuk gguren qqaɛ ikurẓemmiwen. Mala trezzud ad tegged rray-inek, aɣzar imɣar: Nnettleɛ, ur dd-terri s inuraz ɛemmars!
Akurẓemmiw ɛizzen xaf-s leḥbab-ines bezzaf, maca yumen ktar s ubrid i yexḍar, ur t-tudif ula d tuddimt n ccek: iderreɛ yemma-s, isellem x baba-s d ayetma-s uka iksi deg uḍar.
X ubrid, rran-as taynit ci n ijerwan zi yenni umi itteɛjib ad ttkan tinzar-nsen gi kulci, ila munen x ijjt n tifert n uninufar, ttreẓẓan tiɣmest.
—Ddunnit temmeḍren—inna ijj n wejru.—tuka xzaret wa ma d akurẓemmiw ma d nnec i iḍḍehwren, xayellah.
—Walu, ur iqqim uweqqar! Inna ijj n wejru nneɣni.
—Mana lmunkar-a! Mana lmunkar-a! Inna wis tlata.
Maca akurẓemmiw ur t-idd-icqi lḥal, ikemmel abrid ar dat, amuk tetteslam. Wami iwweḍ ar ijj n umkan, ittesla ttlaɣan-as-dd.
D ijj n wejru d awessar, udem-ines ixiyyeq, iqqim weḥḥdes ag ijj n teẓrut.
—Tifawin—inna as ukurẓemmiw ameẓẓyan.
Ixzer deg-s mliḥ uwessar-nni, isseqsa-t:
—Ini-ay xayellah min dak-ittɣil qa tettegged? Qa ula d necc, wami ila lliɣ anect inek, ila zɣil-ay a desen-slemdeɣ i ayetma ikurẓmmiwen muk ɣa uguren ar dat. Iwa xzer min dd-wwiɣ zi manayenni: ttiɛiceɣ weḥhdi, iwdan ad sseɣlin iles-nsen ula ma ssiwlen akid-i. Sell i min dak-ɣa-iniɣ: dwel ar tikli inek maḥend ɛad zik, a dd-yas ijj n wass ad ay-treḥmed x-as.
Ur yufi min das-ɣa-yini ukurẓemmiw-nni ameẓẓyan, issɣed waha. Maca deg ixef-ines, iqqar: “Nec aqa-yi x ubrid”.
Imsafaḍ x uwessar-nni s ijj n ṣṣwab d ameqqran, indeh ixef-ines ar dat.
Ad yaweḍ mani iggʷej? Ad igg agla? Ad isegged qqaɛ min ifferyḍen gi ddunnit? Iqseḥ a nessen, mizi netta ɛad iggur, s targzat-nni n wass amezgaru. Maca nzemmar ad as-netter s wul nneɣ:
– Yak ad telqid ttisir!