Nnan imerzuten belli xmi bnadem itteqqes-as uzellif d wanzaren-nnes ttazzlen manaya zeg izumal i yufin s waṭṭas ɣer midden i yuɣa ubirus n Covid-19 di Briṭaniya.
Yerni yenna Tim Spector, i yellan d ameqqran x tɣuri n « Zoe » i yeqqnen ɣer izumal n lehlak n « Covid » ila mala ca n ijjen d aḥudri; izemmer ad yaca s « Delta » axmi d ij n « arrwaḥ » yeqqseḥ. Waxxa nitni -iḥudriyen zeɛma- wer dag-sen ittegg walu. Maca zemmren ad smuttyen lehlak-a i yenniḍen. Yeqqar belli wenni yettwalan ixef-nnes ila yehlek ixess-as ad igg ifessayen i das-ixess ɣer weḍbib.
Teqqar tayemmunt tanamurt Tabriṭanit belli izumal n Covid n lebda nitni d : Tusut, leḥmu n arrimet, aqasi d ucemmi ttraḥen.
Maca Spector yettwekked ila izumal-nni wer qqimen ca s merra alaḥsab tirezzutin i tegga tseḍma n « Zoe » x luluf n midden i izemmemn izumal-nnsen n lehlak x ijjen app.
Yeqqar « Zi beddu n wayyur n Mayyu, d neccin nxezzer izumal-a ɣer imehlak di app. Izumal-nni wer mserwisen ca jar-asen ».
Amsebḍi-ya deg izumal ad yili yeqqen umi aṭṭas n yewdan lexxu ileqf-iten « Delta » i d-ibanen di Lhend twalat tamezwarut. Lexxu azgen ameqqran n imehlak s Covid di Briṭaniya, helken s « Delta ». Mamec yeqqar Spector aqqa leḥmu yettɣima zeg izumal imeqqranen, maca xminni i yettraḥ ucemmi wer yeqqim ca zeg izumal imezwura.
Yerni yenna : « Ad tili ttasilet-a n Covid txeddem s ij n tebridt-nniḍen ».
Yeqqar : « Midden ttuɣa ttɣilen dag-sen ddemɛun waha, qqimen ttraḥen ɣer fictat, uca fessren lehlak-a ɣer setta n midden nniḍen. D manaya i nettwala issemɣer zeg wemxumbel ».
Yerni « Tabrat teqqar mala cekk d ameẓẓyan, tmeḥḍed, ataf wer x-ak tettekk ca aṭṭas ». Yenna : « Ad tacid axmi d ddemɛun niɣ axmi d ij n teycit tegga ca n ddegg. Maca waxxa amenni qqim di taddart, gg ifessayen n weḍbib ».
Ahruri n yexsan
Ɛawed amenni, ij n tɣuri i tegga « Imperial College London » i yewwḍen ɣer ca n melyun n bnadem deg Wangliz, umi ttuɣa ttasilet n « Alpha » d nettat i yellan s waṭṭas. Tɣuri-ya ttuɣa tufa xenni izumal-nniḍen qqnen ɣer Covid.
Allpha ttuɣa tettegg ticukkaḍ, bnadem tettraḥ-as ɣana ɣer macca, tiqqest uzellif, ixsan hruran, d tmeslayin nniḍen.
Izumal nniḍen nitni :
- Tusut isiɣan
- Leḥmu
- Abeddel niɣ acemmi d uqasi ad raḥen qaɛ
Maca waxxa amenni aqqa din aṭṭas n izumal i yeqqnen ɣer Covid-19. Mala bnadem icekk deg ixef-nnes, ixess uɣil ad iraḥ ɣer weḍbib.