Aqqa-yi usiɣ-dd ɛawed, twalat-a ɛeḍleɣ cwayt. Aseggʷas d wezgen wer ssa dd-kkiɣ. Twalat-a kkiɣ min wer ggiɣ ɛemmars, usiɣ-dd ɛad wer yeffiɣ unebdu, ḥerteɣ-dd x yenni xef ttwaḥsabeɣ, ḥerteɣ-dd x sḥab lxarij, Ama la d necc ḥessben-ayi zeg-sen, waxxa necc ɛad ɣer-i taɛejjajt n ibarraqen x imeẓẓuɣen. Maca xm-i ttessnen, qqaren-ayi “kenniw ɣer-wem diha”.
Aqqa-yi usiɣ-dd, am lebda telqa-yi-dd temdint-inu iɛizzen, telqa-yi-dd am lebda s wudem urid-nnes, s yiles urid-nnes. Tessawal-dd kid-i deg webyasyun s taɛraft, necc ssneɣ-as, maca wenni zzat-i yexleq diha, ittseqsa-t udiwani: “fin saken”, ixeẓẓer-dd deg-i isɣata a x-as turjmeɣ, minzi yessawal akid-s s yiles d midden x-as, telqa-t-idd mamek dayi dd-telqa s wudem d midden.
Aqqa-yi usiɣ-dd ɛawed, ɣer temdint mani ttenqammant tmeɣriwin s melyun d aliman, mani wer yufi unewji nsen melyun d ameɣrabi i useggʷas. Da di ttaksi d ṭṭubis, awal ɣir s imelyunen, 12 yegga-tt uyeccul, 60 yeksi-tt lmiludi, tlata tegga-tt tmurt _ i Lmiṭru _. Da yeqḍa wawal x Ɛebbas lfasi d benkiran. Iwdan ssawalen x Musa, Xsen ad dewlen qaɛ d imusawiyyen. Ad ggen timeɣriwin d timusawiyyin, ad nedhen iqedduḥen s matrikulat deg-sent “Moussa”, ad asen smuyemnen tameɣra s “d amusa d amesɛud urar i teggid”, xwansu ɣa naf ca n wi ɣa nerr deg wemkan n Mesɛud!
Aqqa-yi usiɣ-dd ɛawed, ufiɣ qaɛ tecca qaɛ teswa, qaɛ telluẓ qaɛ teffud, leqhawi ccurent d iḥemmasen amenneɣni, ccurent a daxel s yenni ittɣasṭarn, ɣer berra s yenni ittettren. Ɛlamenkul aklasi n macca, d yewdan. Ca yeḥḍa ca, ca ixezzer di ca, maca ggin x-aneɣ da marra iɛessasen. Ḥḍan ijdi ad yerwel. Ḥḍan bitelmat ibellɛen, Ḥḍan ibidawen n wefraḍ i yexwan. Ɛessen x temdint zi tarwa-nnes, Ɛessen x tarwa n temdint wer ttrikkʷilen qbel qḍan tinɛacin i kid-sen dd-iwyen.
Aqqa-yi usiɣ-dd ɛawed, tweḍḍer-ayi tekli ɛawed, am axmi wer xliqeɣ, am axmi wer da gmiɣ, am axmi wer lmideɣ la d necc ad ḥḍiɣ, wer lmideɣ ad ẓwiɣ abrid amen dd-yeḥmel s uqedduḥ isekkwan timusawin, xseɣ ad iniɣ aṭṭas tinɛacin. mala tnejmed i uqedduḥ ad tekked di bnadem. Nessuruf da ayawya maḥend wer nmeqqar, wer nmeqqar di lefɛayel d wagla, a neqqim marra d imeɛan, niɣ a nedwel d imusawiyyen, minzi da, lwest imun aked ayet bab-nnes. Neccin di min ma negga, nessen ẓelmeḍ, d yeffus waha. Inni n zik ggin-aneɣ: Buɛeddis ameqqran, ya yecca-tt qaɛ, ya yejja-tt qaɛ.
Aqqa-yi usiɣ-dd ɛawed, Ibeddel wudem-nnem ɛawed, tiwḍeḍ ẓiru-nneɣni ɛawed, Mkul ma nniɣ tiwḍed tammurt, tiwḍed ẓiru ḥuma a dd-tekkred ɛawed, ad dewleɣ ad afeɣ ternid tehwid, qa cem thekkʷid, tessitimed ij nhar ad tehrubbzed di tmurt ad tezgenfid, ad tesmuned tizemmar, ad tebdid ad talyed ɣer ujenna. Maca lla, ugin-am, ugin-am tarwa-nnem. Xsen cem lebda tudred, xsen a deg-m ilin imeẓẓlaḍ, imesɛan, imeṭṭawen, ifuraḍ, taɣyuli, lazaɣ d marra min ittciyynen udem n temdint. Minzi Ttajir (bu wagla) ittili d ttajir mintra llan imesɛan waha, mala qaɛ dduniyt am netta, wer ittwiḥsib d ttajir. Brabus ittraḥ-as ccan mani wer telli Fiat Punto d Peugot 205. Langostino ittedwal d aslem waha mani wer yelli sserdin. Ammu temsar i bnadem, ammu temsar i Nnaḍur. Xezzreɣ deg-s irenni ihekkʷa, ixezzer-dd deg-i, yeqqar-ayi: Xezzer niɣ wer xeẓẓer, necc ammu ɣa siɣiɣ a Ḥemza!