Mamec tettegg tamɣart tettawi-t-id? Aya, ittemsebḍa zi temɣart ɣer tenniḍen. Ca zzag-sen wer ɣer-sent d-ittbin melmi i t-id-ttawyent, maca tinniḍen ɛawed ittban-d s waṭṭas. Tinni min ɣer d-ittban, axmi ittegg-asent leḥcumiyet ca n twalatin.
Manaya, yettwaḥsab d ṭṭabu. Ula kṭer ɣer imselmen, ula d ijjen ma izemmer ad x-as issiwel s “jjehd”. Ɛawed, awal x tsikswalit d uqlil aṭṭas di twacunin tfrikanin. Mamec yudrus mala nufa ca n temɣart tessawal x tsikswalit-nnes d wufuren imeẓẓyanen i x-as d-innḍen.
Maca Faṭima, wa d isem i das-newca maḥend ad neḥḍa lxususiya-nnes, d ijjen temɣart m 38 n iseggusa, temsawaḍ akid-s BBC zi Togo. Tettban-d axmi tekkes iceddan deg imehrwuḍa-nnes. Ɣer-s nettat, iklicciten-a wer llin bu n wakud-a.
Wer din min ɣa nesnuffer, xmi i netteṭṭes aked ḥedd; bnadem itteḥwaja ad yaweḍ ɣer plizir-nnes, amya i daneɣ-tenna s ijjen ṣṣewt i d-immalen mamec tegga nettat.
Tenna-aneɣ-d tayemmat-a iɛelmen ijjen uḥenjir: “a ssi asuḥufi, nec d tamɣart, rexxuɣ-d i waman xmi ttakkʷaḍeɣ urgazem-inu, manaya qqareɣ-t nican”
“S tidett deg umezwaru, ttuɣa yeqqseḥ lḥal, wer fhimeɣ ca mi, kidi ittuqiɛen, ula kṭer wami ca n yergazen ila ttɛiffan niɣ wer ssinen ca plizir ad tili ijjen tamɣart ameknaw nec akid-sen”.
Maca aked lweqt, tekkes x-as iceddan-a merra, minzi “iḍbiben sfehmen-ayi deg umeggaru ila min ɣer-i d ijjen lḥajet tessbeḥ, aṭṭas n temɣarin-nneḍni wer ɣer-sent ca”.
Maca nzemmer a nḥada ijjen tassast di ssewt-nnes wami tessiwel x mamec fehhmen ca n yergazen plizir-nnes.
Tettsiɣa teqqar “Ar ass-a, din yergazen i yettɣilen ila nec ttbeccaceɣ x qama. Tteqqsent ddegg-nni n lxezrat i dag-i xezzren awerni i yiḍes-nneɣ, minzi tili neksi plizir-nneɣ s tnayen”.
Waxxa amenni, Faṭima tenɛem ila tettaf arraḥet-nnes jer iɣallen n ca zeg yergazen-nneḍni i “ittexsen aṭṭas ad ayi-ttwalan wwḍeɣ ad t-id-awyeɣ, d nnec neṭṭreɣ-d aman i zzag-i d-itteffɣen, waxxa qama-nnsen ad tuff”.
“Ca zzag-sen, xmi i d-ittas wakud-a, ttaggʷjen cwayt maḥend ad ẓren mliḥ manayenni. Xseɣ ad neɛmeɣ ila itteɛjib-asen lḥal xmi ttwalan manayenni, uca plizir-nneɣ s tnayen idneɣ ittkemmal”.
Din aṭṭas n temɣarin i yeggint ameknaw Faṭima, maca wer zeɛɛment ad x-as ssiwlen-tt minzi din iklicciten d lxezrat n inniḍen. Ɛad neccin, yus-d x-aneɣ yeqqseḥ ḥuma ad naf ca n temɣart tzemmer ad tessiwel x manaya.
Ijjen wezgen d ameqqran n isiksulugen min ked nemsawaḍ deg yiger n wartikel-a maḥend ad aneɣ-d-ḍebbren ca n imehlak, wer sqneɛen ula d ijjen izemmer ad issiwel.
Maca min qqaren imussnawen n iger-a x ufinumin-a?
Min teɛna tamɣart i t-id-ittawin s unḍar n waman?
Ad yili ca zzag-wem ɛad wer t-tettssinem. Timɣarin zemmrent ad nḍarent ula d nitenti. Imenḍaren n twetmin netta d anɣal n waman ɣer temɣart xmi yeggur ad taweḍ ɣer urgazem.
Qqaren imerzuten di sseḥḥet n twetmin ila ɣer wezgen ameqqran n temɣarin, anḍar n waman-a ittili yudrus, ijjen cwayt waha. Maca ɣer tenniḍen, ‘ssfayent-id’, manaya ittraḥ akid-s ijjen wenḍar izemmren ad yaweḍ ar 300 ml (ɛlaḥal min tkessi lbula).
Iwa ssanita i d-yusa wawal “tamɣart i yeggin am tala”. Teqqar Dr. Adrienne Kouatchouang Njewel, i yellan d tasiksulugt, d taḍbibt n seḥḥet ixeddmen di Douala (Kamirun) ila “tamɣart i yeggin am tala” txes ad tini “tamɣart-nni, xmi i yeggur ad tt-id-tawi, tḍelleqq i waman”.
Tesskan-d taḍbibt-a ila manaya axmi arrimet-nnsent iqqar “Ɣer-k, aqqa itteffi-d!” amen ili tteggent ssikes, ttakkʷaḍent ɣer ijjen uplizir d ameqqran.
Trenni teqqar ila aqqa taycit-a, tettemsebḍa zi temɣart ɣer tenniḍen, minzi mkul arrimet d mamec i kid-s ittemsurruf, uca aqqa afinumin-a, ameknaw ifinuminen nniḍen n tsikswalit-nneɣ, ttɣiman qqnen ɣer mkul tamɣart.
Iwa s uya, ca n yergzen wer fehhmen ca mliḥ manaya, s minzi nzemmer a naf inni i ittexsen ad x-as ssnen kṭer, din inniḍen i wer ten-yecqi.
Twafit, amnus, zi senni d plizir
Imerzuten ttmestfaqen ila qa anɣal n waman maci d ijjen lḥajet i d-ittlulan aked temɣart. Maca aked lweqt, tbedda tmeṭṭut tettessen afinumin-a, s uyenni, ttafent timɣarin, deg umezwaru, ca n imxumbal maḥend ad t-qeblent.
Teqqar Dr Kouatchouang Njewel ila “aṭṭas n temɣarin zemmrent ad awḍent ad ssnent manaya aked lweqt di tudert-nnsent tasikswalit […] maci d ijjen ufinumin i yeqqnen ɣer ijjen uklasi n temɣarin waha; maca iqqen ɣer mamec tella temɣart, ma tzgenfa, ma teḥḥma ca niɣ la”.
Faṭima, i yellan d taxeddamt n usikes, wer t-tiwiḍ ar mani d 30 n useggʷas, waxxa nettat ila txeddem qbel. Waxxa ila tetteṭṭes aked yergazen zi temẓi-nnes maca ɛemmers ma ttuɣa tessen ila tneɣɣel aman.