Isnekker ufilem ahindi “tudert n iɣayden” i yellan x Netflix ijjen ẓẓga d ameqqran x isiten n traccwin tinamunin, minzi issiwel x ijjen tḥajit isɛessben aṭṭas n Isaɛudiyen, ɛlaxaṭer isruɣa tifawin x usistim n lkafil.
Asistim n Lkafil di ssaɛudiya; ixes ad yini ad d-yawi bab ca n lxedmet ca n uxeddam ad yili d lkafil-nnes, ad x-as ibedd x tmeẓẓyant d tmeqqrant ula x tzeddiɣt-nnes.
Amssufeɣ n ufilem ttuɣa yessen ila afilem-a yeggur ad isnekker arrwina aked Ssaɛudiya, uca yessers ijjen wawal di beddu n ufilem iqqar dag-s “afilem-a wer nxes bu ad zzag-s neɣḍel zi ca n tmurt, zi ca n wegdud, zi ca n wamun niɣ zi ca n waẓur”
Xelli amenni, afilem-a isnekker ijjen tesfift n umherwaḍ jer imkritiken, d ixalijiyen i yellan x isiten n traccwin tinamunin, jer inni illan kunṭra maḥend ad issiwel ufilem-a x usistim n lkafala di Ssaɛudiya, d inniḍen i yettwalan belli d ijjen lxedmet dag-s tilelli, wer issawal ca nican x tilawt.
Afilem-a yessawal x tḥajit n ijjen uterras qqaren-as (Najeeb), d ijjen uḥudri d ahindi isafer ɣer Ssaɛudiya maḥend ad yerzu x ijjen lxedmet ɣer uneggaru yufa ixef-nnes zzat i ijjen usaɛudi yegga ixef-nnes axmi d lkafil-nnes, yewwi-t ɣer sseḥra maḥend ad as-irwes din wulli, mani i din idder ca n iseggusa zi sseḥra s uɣil, wer izemmer ad yerwel.
Tḥajit n ufilem-a tugem-d zeg ijjen tḥajit n ijjen uterras d ahindawi, i yettɛawaden x tamara d ukerfes i x-as ikkin wami i ttuɣa ixeddem di Ssaɛudiya x ufus n umi qqaren asistim n Lkafil i yirar unaẓur Aɛummani Ṭalib Lbelluci.
Ijjen tḥajit tugem-d zi tudert n tidett
Aadujeevitham d ijjen ufilem s tutlayt tamalaylamit tahindawit, ittɛawad x ikerfes i yekkin x imeẓlaḍ ihindawiyen i irezzun x uleqquz n weɣrum di tmura n Lxalij, afilem-a ijbed-d taynit n lɣaci.
Awal n Aadujeevitham ixes ad yini “tudert n iɣayden” iqqars-d zeg udlis amalaylami immenzen s waṭṭas deg useggʷas n 2008, yirar tilalt n “Najeeb” anaẓur Prithviraj Sukumaran, Najeeb-a i ttuɣa yellan d ametluɛ ɣer Ssaɛudiya, xeḍfen-t, errin-t d ismeɣ ḥma ad yili d ameksa n wulli di sseḥra.
Tḥajit-a tugem-d zeg ijjen ukerfes n ijjen uterras qqaren-as “Najeeb” nit, ittwaxḍef di tmurt-nni deg iseggusa n ttesɛin, iwweḍ ad yerwel zegga isseɛda ɛamayen. Yedwel ungal-nni i yura d aẓru n llsas adelsan di twilayt n Kerala deg yeffus n Lhend i yessawalen tutlayt tamalaylamit, mani aseggʷas ssufɣen-d zzag-s aḍbaɛ-nnes wis 250, ungal-a yessiwel x ukerfes i ittekkes x tudert n imetlaɛ di tmura n Lxalij.
Afilem-a i yekkin ca n tlata n tseɛɛatin issidef-d di simana tamezwarut n 870 melyun rubiya (10,4 melyun dular) deg umaḍal amen yekmel.
Min teɛna tḥajit n ufilem?
Deg ufilem, ittban-d “Najeeb” ɛezlen-t x umaḍal, weḥḥdes aked bab-nnes d wulli-nnes, tirɣi n sseḥra tezzerf-it, d netta yeggʷej s ca n ikilumiṭren x webrid i yudsen, bla ma ad yaweḍ ɣer ca n ttilifun, tawriqt niɣ d stilu n tira, bla ameddukel, iwarred aman ameknaw wulli-nnes.
Ittzawag (Najeeb) deg ijjen tmuɣlit ittqessas wul, d imeṭṭawen iɣeṭṭel-iten-d x tgelluɣin-nnes d netta yettɛawad mamec izzenez kulci, iffeɣ twacunt-nnes, ataɣ ad yaf ca n lxedmet, maca iwalen-nnes tamalaylamit wer ufin abrid ɣer wul n bab-nnes i wer ifehhmen ḥa taɛrabt.
Ad neydar ila tnayen n imelyunen ihindawiyen d 100 alef zi twilayt n Kerala zeddɣen di berra, 90% zzag-sen telɛen ɣer tmura n Lxalij, nettaf ca zzag-sen aqqa-ten di Lbeḥrayen, Lkuwayet, Qaṭar d Ssaɛudiya…
Aṭṭas zeg imetlaɛ-a qqarsen-d zi ca n twacunin d timeẓlaḍ, xeddmen tarwa-nnsent sadu i usistim n lkafala, mani lkafil d netta ibedden x tmeẓẓyant d tmeqqrant n uxeddam-nnes, s uya aṭṭas zzag-sen ttkerfisen x-asen.
Iqqar Najeeb n tidett: “ffɣeɣ Kerala deg useggʷas n 1991 d nec rbuɣ akid-i aṭṭas n turja; maca mayen xaf-i ikkin amenni dinni, d uɛeffan-nni n bab-inu d tudert jer tɣaydin, yejja-ayi wer qqimeɣ ttaciɣ s ixef-inu, yeffeɣ-ayi leɛqel-inu”.
Deg ufilem; yedwel Najeeb wer yessiwil qaɛ tutlayt-nnes, zeg ijjen wakud ɣer wenniḍen issufuɣ-d ẓẓga i d-ssufuɣen wulli i di yetthella, al mani tedwel tabnadmit-nnes tessur aked wulli, manaya ɛemmers ma ɣriɣ-t niɣ ẓriɣ-t mani ca, i d-yenna umessufeɣ n ufilem-a.