Iruḥ yij n wergaz ɣer weḍbib, yenna-s : xseɣ a dayi-tesseɛdud x uɛeddis-inu, aqa ɣer-i din ajru. Yenna-s weḍbib: manis dac-dd-yekka wejru-ya alami i dac-yudef deg uɛeddis? Yenna-s umehluk: wer ssineɣ, lmuhim necc ttakiɣ zeg-s.
Yesseɛdu-as weḍbib rraḍyu, yexzar-it kulci, yenna-s: wer deg-k walu, ittawey-ak-dd rebbi amenni waha.
Wer yeqbil, yenna-s: ruḥ ad tirared mana weḍbib i teggid cekk. Ibeddel aḍbib nneɣni, ula d wenni wer deg-s yufi walu. Maca netta yeqqar-asen; yeffuk aqreqriw aqqa-t deg uɛeddis-inu. Wer yejji aḍbib wer ɣer iruḥ, walu. Qeṭṭɛen-as-dd layas, qqaren-as wer din la aqreqriw la walu.
Yettwaqeyyed-as ij n weḍbib d ameqqran deg yij n temdint tiggʷej cwayt. Yeṭṭef ɣer-s abrid, lami i ɣer-s yudef, yenna-s: Aqqa-c nnan-ayi aqa d cekk i yellan d ameqqran n yeḍbiben, usiɣ-dd ɣer-k, zegga i ufiɣ aqa merra inni i ɣer sseɛduɣ ssuq-nsen yexwa. Lexxu ssitimɣ cekk wer tettilid am nitni, a dayi tfekked amxumbel-a.
Yenna-s weḍbib : min deg-k ?
Yerra x-as, yenna-s: deg-i aqreqriw deg uɛeddis, necc ttakiɣ zeg-s, nitni qqaren-ayi ammu rid ammu.
Yexzar-it weḍbib-nni, ula d netta wer yufi walu. Maca yenna-s: wah, ajru aqqa-t din, anict n min t-iqedden. Ittxessa-c a t-tekksed ass-a.
Yeẓẓel umehluk, yegga-s weḍbib ssekran, yenna-s i yij n ufirmiru: ruḥ ḍebber-ayi-dd deg yij n wejru lexxu.
Amenni nnit, yiwey-as-t-idd. Wami dd-yekker, yessken-as-t.
Yenna-s ufirmiru i weḍbib-nni: mayemmi wer das-tennid tidet am yeḍbiben nneɣni?
Yenna-s weḍbib: d necc i das-yennan tidet, aqreqriw ttuɣa-t ɣer-s deg uzellif, walli deg uɛeddis, lexxu aqa kkseɣ-as-t, ssehniɣ-t, ssehniɣ ula d ixf-inu.
Ammu i tettemsara i bnadem i yessadafen lḥajet ɣer uzellif-nnes, ittagi a x-as yedwel s minzi ma…
Ɣer-i ajru g uɛeddis
