Tanfust n imeẓẓyanen zi 8 al 15 n iseggʷusa
Yura-tt: Ɛebdelwaḥed ḤENNU
Ttuɣa dinn ijj n uyarẓiẓ qqaren-as Zuzu, yejja-s-dd baba-s aṭṭas n igelwan. Ttuɣa itteqqen ɣir tisila isekkʷan, ittirḍ ɣir arruḍ yiɣlan…
Maca ikfer, ameddukkel-nnes, ttuɣa-t d ameẓluḍ, wer ɣer-s ca, ttuɣa ittirḍ ixerṭaṭ, itteqqen ifeɣras. S uya, ttuɣa ittgernez x-as umeddukkel-nnes Zuzu, yeqqar-as : min umi tudert-nnec umi wer tettirḍed mliḥ, wer ttetted mliḥ, wer tsessed mliḥ ?…
Ikfer, ttuɣa melmi ma irewweḥ ɣer taddart, yeqqar-as i baba-s:
- Maɣar a baba necc wer tteddreɣ tudert-inu am umeddukkel-inu Zuzu?
Maca baba-s, ttuɣa yeqqar-as:
- Mala texsed ad tessned maɣar, mḥeḍ ixf-nnec. ɣer mliḥ, xmi ɣa tmeɣred uca ad tessned mayemmi. Lexxu min ma nniɣ-ac wer dayi-tfehhmed.
Yesla yekfer ɣer min das-yenna baba-s, yedwel iḍeffer mliḥ min as-yeqqar uselmad-nnes. Yedwel itticc lweqt i tɣuri-nnes amen tenna.
Maca Zuzu yeqqim amenni deg ugernez-nnes, ttuɣa yeqqar-as i yekfer:
- Ameẓluḍ d ameẓluḍ waha, ɣer niɣ qqim, ɛemmi-c Zuzu tudert iḍemn-as-tt baba-s.
Yelha Zuzu aked itilifunen d imuturen d merra min ttuɣa das-dd-yessaɣ baba-s. maca ikfer yewca-tt i teɣri s ca wer yelli. Ttuɣa deg-s tafqeɛt, yexs ad yessen tidet xmi ɣa yemɣar amen das-yenna baba-s.
ɛdun wussan usin-dd, baba-s n yekfer yemmut, baba-s n Zuzu yettebla s leqmer. Yedwel kul tameddit ad yessers aberru n tenɛacin uca a dd-yedwel ɣer taddart ḥtat.
Isiɣi amenni, teṭṭef-it tɣennant aked leqmer, yedwel yeqqar-as: wer das-ttḥeyyideɣ al dd-ɣa-rreɣ merra tinɛacin i xesreɣ.
Ass-a tiwecca, ass-a tiwecca… al ami iṭebb di merra min ɣer-s n wagla. Yedwel yezzenz merra tudrin d tḥuna d tmura d tbeḥḥar… kulci ixesr-it di leqmer. Yeqqim wer ɣer-s ula d minzi ɣa yemmunsu.
Yedwel xenni Zuzu ḥalen zeg-s wussan, tisila qqarsent-as, arruḍ merra imarweg x-as, ccin-t yinjan…
Ij n wass, ffɣent-idd dag-s tleffixin deg iḍaren s tekli s leḥfa. Iruḥ ɣer seppiṭar , yudef ɣer weḍbib ḥuma a das-yegg ddwa, umi i dag-s ɣa yenṭeḥ, yettebheḍ. Yufa ameddukkel-nnes ikfer i xef ttuɣa ittgarnez, d netta i yellan d aḍbib!
Lexdenni yuder-as ɣer ifadden, yeqqim yettru ittnixsis. Yenna-s:
- Wadem-ayi ay ameddukkel-inu, aṭṭas i x-ak garenzeɣ, ttuɣa wer ssineɣ illa a zag-i ḥalen wussan ammu!
Lexdenni, yerra x-as yekfer yenna-s:
- meɛlik yeqqim baba yedder al lexxu ḥuma ad yessen aqqa fehmeɣ min ttuɣa dayi-yeqqar umi ttuɣa t-ttseqsiɣ. Minzi ttuɣa yeqqar-ayi: ẓeyyer ixf-nnec ɣer mliḥ, xmi ɣa tmeɣred ad tessned. Ili tehnid a baba-inu, lexxu fehmeɣ.
Yewca yekfer ddwa i umeddukel-nnes Zuzu, yesgenfa-t. awarn i manayenni, ireḍl-as minzi yerẓem ijjt n tḥemmast yeḍmen zag-s imal-nnes.