Lqubbet-nnes deg ayt tuzin deg ayt belɛayz n wedrar. Ila (dja) yella iḥekkem di Arrif marra.
Ikker iḥerc ɣer-s Mulay Sliman ajellid n lɣerb. Iraḥ a t-yecc a t-yeṭṭef. Umi ɣa yaweḍ ɣer gert (Ya:t) ikker Bujeddain ijmeɛ lemḥelled ag wedrar.
Nnan-as ayet Arrif: a t-nelqa. Inna-asen Bujeddayn: lla ad raḥeɣ weḥḥdi, necc d yesmeɣ-inu. Nnan-as: ac-yeṭṭef; inna-asen: necc wer lliɣ d aɣuwwaɣ.
Ikker yugur, yelqa ajellid; umi ɣa yaweḍ ɣer lwest n webrid, inna-as i yismeɣ-nnes: xzer ɣer jjihet n lɣerbma wer tettwilid ḥedd. Inna-as: a sidi ttwaliɣ ij n tɛejjajt teggur-dd. Inna-as ugur cwayt n webrid.
Qerrben ṭṭerf i lemḥellet, inna-as: xzer mani teffeɣ tɛjjajt-nni. Inna-as: a Sidi ttwaliɣ ca iggur-dd ittedhar-ayi am bnadem am tbaɣra. Inna-as: a wlidi qim ɣer tmurt, al ddɣa yexḍer xaf-neɣ. Inna-as: aqqa wenni idd-yegguren – yenna-as bujeddayn- wenni d uma Sidi Ɛali idd-yusin zi Taza, Aqqa isḥuss zeg-neɣ, min yexs ijellid a t-yexdem deg-neɣ.
Yeggʷed yesmeɣ inna: aqqa a t-yeṭṭef ujellid. Innas: wer yezmir a t-yeṭṭerf aqqa ɣer-neɣ lmuɛawana. Sidi Ɛali iḥḍar-dd xaf-sen; munen marra ɣer lemḥellet. Xeḍren, wtin taxzant.
A lami d ssbaḥ, ssekken areqqas, ɛelmen ajellid.
Inna-asen mreḥba zeg-wem, kenniw aqqa d inewjiwen telt-yyam. Ikker ujellid issekk-asen ad ccen aɣrum d weksum. Igga-asen ssem di ṬṬajin, ijja aɣrum wer s-yeggi ca.
Umi ɣa Xeḍren imxazniyyen ssersen-asen.
Ikker sidi Ɛali yerẓa-sen aɣrum, ijja ṭṭajin inna-asen: Rret ṭṭajin-a ɣer ufus ujellid, wer t-tticcet i ḥedd, ḥetta ad tucem agg ufus n ujellid-
Tiwecca issekk-asen-dd ɛawed ṭṭajin d weɣrum, igga-asen ssem di ṭṭajin ijja aɣrum, Umi ɣa xeḍren imxazniyyen, ssersen-asen, ksin aɣrum ṭṭfen ttajin rẓin-t zellɛen-t. Raḥen imxazniyyen, rrin lexbar x ujellid. Issek ɣer-sen inna-asen areḥettiw.
Kkren nitni raḥen, a lami Xeḍren ɣer ujellid, inna-asen maɣar terẓim leqcuɛ dawem-dd ssekkiɣ macca. Inna-as Bujeddayn ma iɛizz x-ak ṭṭajin ucal zzat i ṭṭeyn (abellaɛ) n Sidi rebbi?
Netta ajellid illa iwessa ismeɣ-nnes inna-as: lexminni ɣa berrḥeɣ ya Fattaḥ! ṭṭfet ina, aqqa itteḍhar-ayi d aseḥḥar.
Ikker netta lexdenni iberreḥ: ya Fattaḥ! Sidi Ɛali icreḍ s uɛekkaz-nnes, inna-as: ya Fattaḥ!
Innufsel uxenduq, lxleq lfiraq jer-asen d ujellid.
Isellem-asen ujellid, itter-asen ssmaḥet.
Qa din Axenduq luxa di Gert mani mmelqan, qqaren-as axenduq n Sidi Ɛali utuzin.
Sidi Ɛali Qa yemḍel di Taza.
A.RENISIO, “Etudes sur les dialectes Berbères des Beni Iznasen, du Rif et des Senhaja de Srair, grammair, textes et lexique” 1932. Tafart 236.
Yessufeɣ-it-idd, iɛwed-as tira: Majid Aqelɛi