![](https://tifray.com/wp-content/aggaj/3343227729.jpg)
Yesmun-itt, izemmem-itt: Ɛebdelwaḥed ḤENNU
Ḥajitkum, Yekker di min yeɛdun, ttuɣa din ij n yekfer, lebda iḍeffer ij n tzizwit, ittgabar-itt. Kul ass, a dd-tekker tzizwit ad tehda zi tnewwacin, al ɣa taf ikfer ihekkʷel-itt.
Nhar-a tiwecca, igeɛɛed-as zzɛaf i tzizwit ɣer uzellif, uca tejjull ya mala iɛawed yehnunni x-as, ya ḥama teqqes-as.
Amenni nnit, deg yij n wass d asemmaḍ, teffeɣ tzizwit amen tettegg lebda, tneggez zi tnewwact ɣer tenniḍen. Maca ɛawed tettwala ikfer yeggur-dd ɣer-s, ineṭṭer-as-dd awalen.
Tekɛa tzizwit, truḥ ɣer-s ggur tettazzel, uca teqqes-as di tenyart.
Llilet llilet, yesmeḍ lḥal mseqqem, yews yekfer ad yadef deg weqcur-nnes ḥuma ad yeddurri, maca wer izemmar. Minzi yuff-as uzellif s tiqqest n tzizwit.
Yeqqim yekfer di berra, tezzelf-it tesmeḍ. Ula d iḍes wer das-dd-yusi, Uca yenna aked yexf-nnes: “Wenni i ɣa iḍefren timɣarin ad ines di berra!”.