15.1 C
Nador
Letnayen 4 Mars 2024

Wami teḍḍuqqeẓ ṭeyyara s ileɛɛaben n Zambya

Iḥudriyen n yiḍa, wer ɛqilen ca x jjil n ileɛɛaben n Zambya deg ineggura n iseggusa n tmanyin, ar imelwusa n iseggusa n tesɛin zi lqern yeɛdun.

Jjil n ileɛɛaben n wureɣ, i yewtin tarfiqt n Uṭalyan s 4-0 di twalat n turarin tulampiyin aseggas n 1988, tarfiqt-a n Zambya, i dd-yusin ɛawed wiss tlata deg wemḥizwar n lkas n tmura n tefriqt aseggas n 1994, ttuɣa deg-s ileɛɛaben ɣer-sen min ɣa inin, ttiraren deg ikipputen d imeqqranen deg Wuruppa.
S uya, deg usifi i ttuɣa tteggen di tefriqt x wi ɣa yalyen ɣer lkas n umaḍal, tarfiqt-a n Zambya ttuɣa merra ccaten-as leḥsab, ttreccaḥen-tt ad taley ɣer wemḥizwar n lkas n umaḍal i ɣa yettwaggen di tmurt n Umarikan aseggas n 1994.
Maca, ass n 27 zeg wabril aseggas n 1993, yemsar min ttuɣa wer ittriji ḥedd. Udfen ileɛɛaben n Zambya ɣer ṭeyyara, gguren ɣer Dakar ḥuma ad iraren aked terfiqt n tmurt n Sanigal, ṭeyyara-nni, teḍṛa deg webyasyun n Libruvil di tmurt n Ugabun, awern-i cwayt, zi teḍwa, tewḍa-dd di lebḥer, wi ttuɣa deg-s iruḥ.

Kalusha Bwalya, aleɛɛab n Zambya i inejmen zeg uḍuqqeẓ n ṭeyyara


Mmuten merra yetran n tcamma n uḍar n tmurt n Zambya, i ttuɣa yessaggʷaden, yenjem illa yetri n PSV Indhoven; Kalusha Bwalya, minzi ttuɣa wer kid-sen yelli di ṭeyyara, ttuɣa yegga a dd-yas weḥd-s zi Hulanda ɣer Dakar.
Bwalya, yeḍfer-dd lexber n ɣezzu-ya zi Hulanda deg utilibizyun, wer yumin min yemsaren.
Maca wer din min yekka, yesmun-dd ij terfiqt d tamaynut, awern i tnayen n iyuren, iraren aked Lmeɣrib, rebḥen-as s 1-0.
Yeɛdu yij useggas, carken deg wemḥizwar n lkas n Tefriqt i yettwaggen di Tunes, iwḍen ar aneggaru n wemḥizwar-a, iraren tfust taneggarut aked tmurt n Nijirya, xesren deg-s s 2-1, usin-dd wiss tnayen deg wemḥizwar-a, x ubunt ili iwyen lkas.
Walli d ta d tamsart tamezwarut i di ttmettan ileɛɛaben di ṭeyyara, ttuɣa tizwar ij n ṭeyyara teḍḍuqqeẓ s ileɛɛaben n Mancister di tmurt n Uliman aseggas n 1958, mmuten deg-s 23 nejmen 6.

Tala: Alaraby.com


Timaynutin

Ɛebdelwaḥid
Ɛebdelwaḥid
Abdelouahid Hennu

Fser-itt