Yura-t: Ridouan pakhrou
Yegga tɣuyyit-nnes tamezwarut wami yerẓem tittawin di temdint n Utrixt (Hulanda) ass n 2 zeg wayur n abril 1986. Netta d amirar n tcamma n uḍar « BRAHIM Afellay » i yejjin rimart temɣar deg iyyar n tcamma di Hulanda wara d Uruppa tekmer.
Afellay memmis n tasatc tis trata n Irifiyen yteddren deg Uruppa, baba-s zeg ixddamen iruḥen lxarij deg ineggura n 60 maḥend ad rzun xef yimar icena i tarwa- nsen. Brahim netta d ijjen zeg waṭṭas iḥudriyen yecḍaren, zi tarwa n imetlaε yiwḍen ad arcmen tudart-nsen s waṭṭas n tmegga deg iyyaren n tunnunt (sport), tasertit (politique), tademsa (économie), taɣemsa (journalisme) d tẓuri (Art)…
Aebqquy (memmis n teqblit n ibeqquyen) zi temẓi-nnes taynit tekka-as ɣer iyar n tcamma, ttuɣa ɣer-s 4 n iseggasn wami tsjjel twacunt-nnes di takadimit n USV Elinkwijk i tcamma n uḍar, mani yrmed timezwura n tcamma, maca aseggas n 1996 ad yemmutti ɣer klup n PSV Eindhoven, i yedjan zi tseḍmiwin n tcamma timeqqranin di hulanda, taseḍma mani tarjan merra iḥudriyen akid-s iraren.
Aseggas n 2003, Brahim ad yeṭṭef amcan-nnes ag tseḍma n Eindhoven d ijjen umirar prufisyunel, afellay yettexs ad yirar rebda di anammas n unedrar (milieu terrain), yefsus ɣer-s min ɣa yini di teɣmart-a, aseggas awareni wnneɣni tasklut n ufellay tarenni tneεniε.
War dini min yekka yedwer d awar ɣer marra tɣemsa n tunnunt di hulanda, d ijjen uḥudri ɣer-s min ɣa yini deg iyya- nnes, manaya ad tyejj a xaf-s rzun ḥuma ad icarec aked tseḍma tanamurt n hulanda deg useggas n 2007. Waxxa netta yenna ttuɣa yettraja a xaf-s rzun Imeɣrabiyen ad yirar aked tseḍma tnamurt n Lmeɣrib.
S tzemmar timeqqranin i yetteg xef unedrar azegza d iswiyen (buts) ittmarka yiwweḍ Afellay ɣer tqiccet deg iyyar n rirart n tcamma. Waxxa war ittirar ca ɣer zzat yiweḍ ad izemmem 38 n iɣulen, d mammec ɣer-s fus di min tewwi tseḍma n Eindhoven n tkupatin d tsemɣurin, zzay-sent takust n hulanda (ligue) deg iseggasn n 2004-05, 2005-06, 2006-07,2007-08. Mamec yewwi ag tseḍma s ixef-nnes takust n tgeldit tahulandit aseggas n 2004-05. Mammec yewwi tasemɣurt n Yuhan Kruyf di 2008.
Marra manaya yejji-it ad xaf-s terzu tseḍma n Fc Barceluna ḥuma ad t-tseɣ aseggas n 2010, barceluna ɣer yedja umezruy yulleɣ di tcamma n Uruppa. Umaḥend ad tegged amcan di kamp nu txessa cek ad tirid d itri yemɣar.
Waxxa war yeggi bu umcan-nnes deɣya ag yesmawn iyedjan d ipilaren n barceluna amecnaw Tcabi, Inyista, Missi.. maca mermi ma yudef-d ɣer arbiε azegza yetteg min xaf-s. Zeg uɣezdis n tsemɣurin yiweḍ mmis n Arrif ad yawi attas d takusin di mmg imḥizwaren mindi icarec kipu n Fc barceluna, zzag-sent tkupat n liga 2011, super urupa 2011, super n spanya, d kuppa n array 2011-12, war nttetu tcampiyunzlig 2011 .
Yecca ict tecti deg ufud-nes, tejj-it ad as-iruḥ umcan nnes aked imeddukar n Missi, manaya ad yejj barceluna ad tarḍel i tseḍma talimant shalke 04 ɣer di 2012, senni ad ymmutti ɣer oulmpiakus ayunani di 2014. Aseggas xaf-s d-yusin ad ymmuti di twalat nneɣni ɣer primrlig zi tewwart n Stoks sity. Ayur n 07 zeg useggas n 2019 ad isinya aked tseḍma taymmat psv Eindhoven, mani ɣa yeg surif-nnes ameggaru di tudart am yej umirar prufisyunal. Iḍennat yffeɣ-d ɣer ssaḥafa ḥuma ad yini belli safi yegga icfa yrirat n tkurt, ḥuma ad yar taynit ktar i tudart-nes d twacunt-nes tamayant awaren ma yeggur ad yeffeɣ aseggas wiss 34 di tudert-nes.
Min yedjan d asebḥan di Brahim afellay, d min t-yejjin ad yeqqim yεiz xef tarwa n temdint-nes Lhusima, d tarwa n Arrif d imaziɣen marra.
Tamzwarut, afellay εemmars yeqreε iẓuran das-icarcen ag tmurt n rejdud-nnes, waxxa netta ilul di tmurt n Irumiyen , mceḥal ma yttemɣar deg iseggasn yttemɣar kid-s Arrif di titwain, zi rebda ittas-d ad yesseεdu anebdu-nnes di tmurt n Arrif jar twacunt d tarwa n tmurt, yetteεjib-as ad ysseεdu kunji-nnes jar playat n biyya ad yecc tiracwin n iselman.
Ktar zi manaya, ass umi yewwi tasemɣurt n yuhan kruyf (100 mlyun santim) mindi ixarres amzwar d iḥnjiren n temdint-nes, refrus n tsemɣurt-a marra yuci-tent ḥuma ad yetwwag ijn unedrra (terrain mini foot) i tarwa n tendint, twalat nneɣni aseggas n 2009 rami tgeεεed tseḍma n Lhusima ɣer tbadut tamezwarut (premier division) igga-as fus-nnes di twalat nneɣni s 100 mlyun aked ukipu n CRA.
Maca min war yzmmer ca n Umaziɣ ad t-yettu xef ufellay ass umi terbeḥ barceluna tcampyunzlig yeffeɣ-d Ufellay yarḍed xaf-s bandu Amaziɣ, ḥuma ad yssemɣar s tussena n rejdud-nes, ad yini i wmaḍal ykmmer nec d Amaziɣ, kuntra i ssaḥafa n tmizar Tiεrabin xaf-s yessawalen am ijen yitri d Aεrab. Tiwlafin-nnes s ubandu Amaziɣ kkint-id tribizyu niɣ d xef uεrur n tesɣunin n tunnunt di marra timura n ddunect.
S marra manaya ad yeqqim isem n Brahim Afellay yercem deg umezruy n tcamma deg Uruppa mammec yercem di twengint n Imaziɣen.
