Ij n wass, yeɛdu wuccen x yij n uɛelɛul, yexzer deg-s, yenna-s:
“Baba-c ttuɣ-t yecna, ɣer-s ij n tmijja wer telli wer texliq! Ttuɣa xmi ɣa iqeyyeḥ, ad yedden, a dac-yeqqar yexf-nnec sḥess-as waha!”
Iɛjeb-as lḥal i uyaẓiḍ, yenna-s:
“Ula d necc ɣer-i tmijja tesseɛciq, ssneɣ ad ddneɣ am baba niɣ xir.”
yerra x-as wuccen:
“Iwa ssken-ayi (mel-ayi), ad xemmeɣ ma d tidet trewsed baba-c.”
Yeqqen tiṭṭawin uyaziḍ bac ad yedden, uca d wuccen a x-as yeḥret, yeksi-t deg uqemmum. Amen zeg-s yeggur a t-yesṭurfi, ad iraḥ a t-yecc, Lqan-ten-dd deg webrid ca n yiṭan. Lexdenni, ixarres uyaẓiḍ, yenna-s i wuccen:
“Mala texsed ad tnejmed, ini-asen aqa ayaẓiḍ-a walli bu n ddcar-nwem.”
Amenni nnit
Yerẓem aqemmum wuccen ad yessiwel aked yiṭan, d uyaẓiḍ ad yennufsel, yerwel. Yedwel xenni wuccen rid-nnes ad yazzel x uyaẓiḍ, rid-nnes ad yerwel zeg yiṭan. Yexzar mliḥ deg uyaẓiḍ, yenna-s:
“D ta d tiyti (ticti) n wenni wer itteqqnen aqemmum di lweqt i di t-ixess a t-yeqqen.”
Yerra-dd x-as uyaẓiḍ zegga i ibedd x yij n weɣbar qibal nnes:“Seqsa-yi necc, uca a dac-iniɣ ɛad x wenni itteqqnen tiṭṭawin di lweqt i di t-ixess wer tent-itteqqen!”