ḥajit majit, seksu d tyaẓit
Ij n nnhar, ɛemmi yeḥya ttuɣa yelluz, ɛdan aṭṭas n wussan wer t-yeqqis, ttuɣa yedwel-as uɛeddis yelseq, cwayt, yeẓra aɣyul yeggur a dd-yawi areyyeq i ifellaḥen ɣer wemkan mani mejjren, yexzar deg-s uca yenna-s : “kuɛ! d wa i dayi-ɣa-yesseccen ar ɣa jjawneɣ”.
uca iraḥ yeẓẓel deg webrid, yesneɛmil wer izemmar ad yekker, lami ɣer-s yexḍel weɣyul, yenna-s : “min cek-yuɣin a ɛemmi yeḥya, teẓẓled deg webrid?”,
yenna-s ɛemmi yeḥya: “iwa mamec ɣa negg ay aɣyul? aqa ggamiɣ ad ugureɣ, itteqqs-ayi uḍar!
yeqqes-as i weɣyul, uca yenna-s : “zid a c-rbuɣ a cek-ssiwḍeɣ ɣer taddart-nnec,
yenna-s ɛemmi yeḥya : “a tqad-ac ay aɣyul, a c-yejj rebbi lebda d miɣis”,
yerbu weɣyul ɛemmi yeḥya, ḥima a t-yessiwed ɣer taddart-nnes, senni ad yedwel ɣer ifellahen, maca deg webrid yekker ɛemmi yeḥya ad yecc min yufa deg iɣergnen* n weɣyul, issenta s uɣi, yeqqim x-as ḥlu ḥlu, alami t-yessuddem x weɣyul i das-dd-yennan : “min xaf-i dd-tessuddmed a ɛemmi yeḥya? yak ma tḥellwed aɣi-nni i ɣer-i deg iɣergnen?”, Yenna-s ɛemmi yeḥya : “lla ay aɣyul, aqa wenni d lgiḥ i x-ak dd-yuddumen, teḍḍuqqeẓ-ayi tḥebbuyt-nni deg uḍar.
Yumen-it weɣyul, uca yesɣed, gguren cihaja, uca yekker ɛemmi Yeḥya ɛawed ad yerzu deg iɣergnen, yufa din tamment, yiqmat x-as lseḥ lseḥ, alami tt-yessuddem x weɣyul, yenna-s :“a min tettegged a ɛemmi Yeḥya? yak ma tlesḥed tamment-nni?”, yenna-s netta :”lla ay aɣyul, aqa d idammen n tḥebbuyet-nni,
aɣyul ttuɣa irezzu ad yegg lxir, maca ɛemmi Yeḥya imelleɣ x-as, yecca-s lefḍur n ifellahen, wer zeg-s yejji walu, lami yexḍel ɣer ifellaḥen, rzun-as deg iɣergnen maca ufin lefḍur walu, nnan-as :”manaya ay aɣyul mani teggid lefḍur?”, yenna-sen : “aḥ aḥ, imelleɣ xaf-i ɛemmi Yeḥya, ufiɣ-t yeẓẓel deg webrid, yuɣa-t ca deg uḍar, uca nniɣ-as a t-rbuɣ, a t-ssiwdeɣ ɣer taddart-nnes, maca netta yegga taḥraymit, yecca-yi lefḍur”,
Qbel ad ikemmel awal-nnes lami kid-s ɣa kkren ifellaḥen s uẓellaḍ, aɣa-k aɣa-k, ssuffen-t s uqabu, rrin-t anict n tiriwt anict n tuzeggart, — nnan-as a daneɣ-dd-tawyed uccen-nni niɣ a cek-nenḍer ɣer lexla, uca yejjull a t-idd-yawi minzi ma, yekkar ij n twalat zik, iraḥ yeẓẓel ṭṭerf n taddart n ɛemmi Yeḥya, yesniɛmil yemmut, lami tessijj temɣart n ɛemmi Yeḥya ɣer berra tufa-t din yeẓẓel, uca tuzzel a dd-tessekker argaz-nnes zeg yiḍes :
“kkar ay argaz-a a c-iniɣ min urjiɣ,
‑Ejj-ayi ad ṭṭseɣ aqa ɛad zik “xeccexecc,
‑nniɣ-ak kker aqa urjiɣ ɣer-neɣ murḍus ɣer tewwurt,
-min teqqared ?
– d aya i dac-nniɣ, kker xzer min yellan
_ hah ! ma necc d abuhali a cem-seɛɛfeɣ cem ?!!
_ nniɣ-ak kker aqa atiɣ d tidet aqa sliɣ i ddriz ɣer tuffut!
_ sliɣ-t ra d necc ! teqqared cem atiɣ d netta ira ittemrulluyen ?
_ yyih, nniɣ-ak kker!…
_ aqqa-yi kkreɣ !
Umi yessijj, yufa din aɣyul yeẓẓel ttzebziben x-as yizan ! uca yuzzel ɣer temɣart-nnes yenna-s:
_ cem d tamimunt, yemma-m d tamimunt, baba-m ra d netta d amimun
tenna-s nettat : _ yak nniɣ-ak-tt, ma necc ttcettiḥeɣ ?! lexxu kker a t-idd-nessidef ɣer daxel n wexxam-nneɣ, uca a t-necc
Yenna-s : _ maca yedqel mamec ɣa negg ?
tenna-s : cek ɣa ḍfer-ayi-dd waha,
Uḥḥlen s tnayen (2) idsen ma ad jerren maca walu wer zemmren, uca tenna-s:
_ raja ay argaz-a, qqen acuwwaḍ-nnec ɣer ucewwaḍ-ines, uca ẓẓuɣɣer-it-idd
Yenna-s netta:
_ qqen-dd la d cem acewwaḍ-inem ɣer-i ḥuma a t-idd-neẓẓuɣɣer merra
Tenna-s:
_ Lla ay argaz-a ! necc ɣer-i ddiset, ma trezzud ad nnuriɣ ma ?
Yekker yeḍfer awal-nnes, yeqqen anewwar-ines ɣer unewwar n weɣyul i das-ittɣil aqa yemmut, uca yessenta yeẓẓuɣɣur-it s min ɣer-s d tizemmar
maca qbel ma a t-yessidef zi tewwurt yekker-dd weɣyul ad yesḥunder, ḥma a ɣer-s dd-asen ifellahen.
qqimen aked wayawya ẓẓuɣɣer aɣir-a, ẓẓuɣɣer aɣirin
tamɣert n ɛemmi Yeḥya teqqim teḍḍuqquẓ x-asen s tḍeḥḥayt, ɛemmi Yeḥya, yeqqar as :
“waxxa tɛebred xaf-i ! cem d tamcumt, yemma-m d tamcumt ra d baba-m d amcum
tenna-s nettat :
_ ṭṭef gi tseṭṭa n uzir.
Yenna-s:
_ min ɣa ṭṭfeɣ ?! mamec ɣa ṭṭfeɣ di ta ammen i ṭṭfeɣ deg wa, uyak a m-yeqḍu rebbi iẓuran n yiri
qbel ma ad ikemmel wawal-nnes ttuɣa yenneqḍu-as uɛennab, uca yenna-s weɣyul:
_ luxa tiwey-ic-dd a kid-i, ur ɣer-k mani ɣa trewled ula mani ɣa tennuffred, manis ma tekkid a c-afeɣ deɣya minzi tdewled d agerṭiṭ.
yerwel ɛemmi Yeḥya, yiweḍ ɣer yij umkan uca yessenta ittxemmam mamec ɣa yeg.
arami yufa mamec
irah s tazzla ɣer temɣart-ines, yenna-s:
_ kker ad traḥed grew-dd ɣer-i qqaɛ uccanen a negg tawiza i lmacul-nneɣ
tekker nettat tegrew-dd mani ma yella ci n wuccen
umi dd-xeḍlen wuccanen ɣer ɛemmi yeḥya, yenna-sen :
_ Saḥḥit i kenniw ay aytma uccanen x twasit-nwem ɣer-i, necc aqa tettwalam-ayi wer ttnekkireɣ zi tassut, ula d tamɣart-inu luxa d ayur-nnes wiss setta, luxa rezzuɣ a kid-i teswizem ḥuma ad ssrewteɣ lmacul-inu
nnan-as :
_ aqqa-neɣ da a ɛemmi Yeḥya, necnin d awmaten
Kkren wuccanen ad ssarewten, kul ijjen mani ineṭṭu ttekken deg wayawya
uca yenna-sen ɛemmi Yeḥya :
_ kenniw mala teqqimem amya ur tetteggem walu, qqnet icuwwaḍen-nwem ɣer wayawya ḥuma ad tesmunem tizemmar
ggin-as rray i ɛemmi Yeḥya, uca qqnen ixf-nsen ɣer wayawya zeg icewwaden, maca lami ɣa kkren ad ssarewten, kul ijjen mani ijebbed uca nqeḍwen-asn icewwaḍen ra d netnin am ɛemmi yeḥya, uca yennasen :
_ kuɛ ḥciɣ-awemt!!! luxa tdewlem d igerṭiṭen am necc, qa uccen mala wer yelli am ayetmas ad immet ḥsen
Uca teqqim d awal: “uccen agerṭiṭ mli yufa ataf merra uccanen d igertat”.
Nekka-dd ssa d ssa, wer daneɣ iseḥḥ ca, tseḥḥ-aneɣ yij n tleqquzt n weɣrum, a tt-nebḍa jer-aneɣ.