Ɛebdelwaḥed ḤENNU
Tamsirt 2 (Tamsirt 1)
Addad amaruz.
Addad amaruz n yisem di trifit ittili s ubeddel n yeɣri (voyelle) amezwaru deg yisem. Qbel a dd-nas a nalleɣ di melmi ittili, nesrusa tineqqiḍin-a timeqqranin:
- Mala yusa-dd yisem awarn i umezday (coordonnant):
Amedya: uccen d yensi
Addad ilelli: insi
Addad amaruz: yensi
- Mala isem i yellan d ameggay (sujet), ittas-dd awarn i wemyag (verbe).
Amedya: Irabeɛ wesnus
Addad ilelli: asnus.
Addad amaruz: wesnus.
- Mala isem d asemmud amessefru (Complément explicatif):
Amedya: ixecc-dd wenẓar
Addad ilelli: anẓar
Addad amaruz: wenẓar
- Mala isem tizwar-as tenzeɣt (préposition):
Amedya: yuzzel ɣer wexxam
Addad ilelli: axxam
Addad amaruz: wexxam
- Mala isem izwaren-as imurfimen-a: “bu, m, ayt, suyt”
Amedya 1: bu temɣarin
Addad ilelli: timɣarin
Addad amaruz: temɣarin.
Amedya 2: m yinjan
Addad ilelli: injan
Addad amaruz: yinjan
Amedya 3: Ayt uḍewwar
Addad ilelli: aḍewwar
Addad amaruz: uḍewwar
Amedya 4: Suyt uliman
Addad ilelli: aliman
Addad amaruz: uliman
Aqqa mamek i yettili waddad amaruz:
I. Deg yisem amay (nom masculin):
- Tamerniwt n weznaɣri (Semi-voyelle) “w” qbel i weɣri “a” deg yisem amay (masculin):
Isem amay: addad ilelli a…… → addad amaruz wa….
| Addad ilelli | Addad amaruz |
| anu ass aman aduf adan | wanu wass waman waduf wadan |
- Asfaḍ n weɣri amezwaru “a” deg yisem amay, d ubeddel-nnes s weɣri “u”, ta tettemsara xmi ittili yisem deg waddad-nnes ilelli, rrimet-nnes ammu i tegga: “VCVC…”, niɣ mala rrimet-nnes deg-s iɣri tḍeffer-it-idd tergalt, awarn-as dinni acfa “e”, awarn-as ɛawed targalt (VCeC) :
Isem amay: addad ilelli: a…… → addad amaruz u….
| Addad ilelli | Addad amaruz |
| afus aberkan ajeḥmum abilaj aberran | ufus uberkan ujeḥmum ubilaj uberran |
- Asfaḍ n weɣri amezwaru “a”, d ubeddel-nnes s “we”. Manaya ittemsara xmi i yettili yisem deg waddad-nnes ilelli ibadda s yeɣri “a”, ḍeffrent-t-idd tnayen n tergalin mseḍfarent, amen wer dd-ittekk bu wecfa “e” jer-asent:
Isem amay: addad ilelli: a…… → addad amaruz we….
| Addad ilelli | Addad amaruz |
| asqif amjar afsar aqmarji azɛuq | wesqif wemjar wefsar weqmarji wezɛuq |
- Tamerniwt n weznaɣri (Semi-voyelle) “w” qbel i weɣri “a” deg yisem amay:
Isem amay: addad ilelli: u…… → addad amaruz wu….
| Addad ilelli | Addad amaruz |
| udem uccen uxsas uzzal | wudem wuccen wuxsas wuzzal |
- Tamerniwt n weznaɣri (Semi-voyelle) “y” qbel i weɣri “i” deg yisem amay:
Isem amay: addad ilelli: i…… → addad amaruz yi….
| Addad ilelli | Addad amaruz |
| ilem ilef izmawen ijjen ixef | yilem yilef yizmawen yijjen yixef |
- Asfaḍ n weɣri amezwaru “i”, d ubeddel-nnes s “ye”, manaya ittemsara xmi i yettili yisem deg waddad-nnes ilelli ibadda s yeɣri “i”, ḍeffrent-t-idd tnayen n tergalin mseḍfarent, amen wer dd-ittekk bu wecfa “e” jer-asent:
Isem amay: addad ilelli: i…… → addad amaruz ye….
| Addad ilelli | Addad amaruz |
| irgazen insi iɣyal izmer iḥramen | yergazen yensi yeɣyal yezmer yeḥramen |
- Aɣri amezwaru “i” i dd-ittasen deg umezwar n yisem amay amagut (nmp) ittɣima d wenni d wenni (xmi ittili yeɣri amezwaru iḍeffer-it-idd tergalt, awarn-as igɣri niɣ d acfa, awarn-as ɛawd targalt):
Isem amay: addad ilelli: i…… → addad amaruz i….
| Addad ilelli | Addad amaruz |
| Imaziɣen ifassen imarizen iberkanen | Imaziɣen ifassen imarizen iberkanen |
II. Deg yisem unti (nom féminin):
- Asfaḍ n weɣri amezwaru “a” i dd-ittasen awarn i tmatart n wunt tamezwarut “t” (marque de féminin), ittɛaqqab deg wemkan-nnes wecfa “e”:
Isem unti: addad ilelli: ta…… → addad amaruz te….
| Addad ilelli | Addad amaruz |
| tamɣart tafqunt takmamt taɣyult tasɣart | temɣart tefqunt tekmamt teɣyult tesɣart |
- Asfaḍ n weɣri amezwaru “a” i dd-ittasen i tmatart n wunti “t”:
Isem unti: addad ilelli: ta…… → addad amaruz t….
| Addad ilelli | Addad amaruz |
| takiḍart talimant tamaziɣt taqendurt | tkiḍart tlimant tmaziɣt tqendurt |
- Aɣri amezwaru “a” i dd-ittasen awarn i tmatart n wunti “t”, ittɣima d wenni d wenni:
Isem unti: addad ilelli: ta…… → addad amaruz ta….
| Addad ilelli | Addad amaruz |
| taddart tala tammemt tawmat | taddart tala tammemt tawmat |
- Aɣri amezwaru “u” i dd-ittasen awarn i tmatart n wunti “t”, ittɣima lebda amenni d netta d netta.
Isem unti: addad ilelli: tu…… → addad amaruz tu….
| Addad ilelli | Addad amaruz |
| tusut tudert tuɣbayt tuɣɣubja | tusut tudert tuɣbayt tuɣɣubja |
- Asfaḍ n weɣri amezwaru “i” i dd-ittasen awarn i tmatart n wunti “t”, ittɛaqqab deg wemkan-nnes wecfa “e”:
Isem unti: addad ilelli: ti…… → addad amaruz te….
| Addad ilelli | Addad amaruz |
| tismeɣt timɣarin tifraz tinfart timessi | tesmeɣt temɣarin tefraz tenfart tmessi |
- Asfaḍ n weɣri amezwaru “i” i dd-ittasen awarn i tmatart n wunti “t”:
Isem unti: addad ilelli: ti…… → addad amaruz t….
| Addad ilelli | Addad amaruz |
| timejmert tiɣaydin tizubayin tiseppunya | tmejmert tɣaydin tzubayin tseppunya |
- Aɣri amezwaru “i” i dd-ittasen awarn i tmatart n wunti “t”, ittɣima lebda amenni d netta d netta:
Isem unti: addad ilelli: ti…… → addad amaruz ti….
| Addad ilelli | Addad amaruz |
| tisit ticcart tiqqedt tikkest | tisit ticcart tiqqedt tikkest |
Maca ca n yismawen di trifit, nettaf-iten beddan s tergalin. Ameknaw:
Laẓ, fad, beṭṭu, beddu…
Ismawen-a ttɣiman d nitni d nitni am waddad ilelli am waddad amaruz.
Dinni ɛawed ismawen i dd-yudfen ɣer trifit zeg yilsawen nneɣni, uca rrimet-nsen wer tbeddel ca bac ad tili am yismawen n trifit, ameknaw:
Lebḥer, jjuf, lmuss, nneɛnaɛ…
Ismawen-a ula d nitni ttɣiman d nitni d nitni.
Dinni ɛawed ijjen weklasi nneɣni n yismawen wer ttbeddilen deg waddad amaruz, nitni d ismawen n iterrasen niɣ n imukan.
ɣer ɛawed: Tajerrumt n trifit (1)