Le Rifain
Saɛid ZIzawi, ijjen zeg imeffɣen n tseddawit aseggas n 96, d ijjen wudem n tɣensa d ubeddi x uḍar d wenhezzi g umussu amaziɣ. Zeg yinni i yessersen ddsas n tmesmunt n Buya di Benṭeyyeb , amen yeksi deg uḍar deg waṭṭas n isuraf n umussu amaziɣ, am tyemmunt n Qaḍi Qeddur…
Deg yijjen wemsawal-nnes aked Nadorcity, yesserɣ Saɛid Zizawi tifawin x mamek temsar alami yeqqim 8 n iseggusa netta ixeddem bla ma a t-xellsen. Di 2011, zegga i tekker lɣuɣet n wegdud, tudef tmesmunt n yinni i ɣer llan idipplumen n tseddawit i iqqimen bla lxedmet, -tudef- di ca n isurifen n tɣensa d tɣuyyit x tseqqar n lxedmet, am merra timesmunin nneɣni i ttuɣa yellan di Driwec d Miḍar d Nnaḍur… Yeqqar Zizawi, belli yusa-dd wemsawal, kksen akid-neɣ awal bac a nadef di lxedmet. ḍḍwasa n imeɣnasen n Miḍar d Driwec dewlen-dd zi Rbaṭ, maca ḍḍusi-inu walu. Arayes yusa-s-dd warḍi zi ssulṭa bac ad ɛemmren imukan yexwan. Yetter zeg-neɣ a nraḥ a nexdem. Nkumasa di cher n yennayer 2012. Zi ssenni neqqim nxeddem, nettraja. Lexxu 8 n iseggusa, aqqa-yi ɛad xeddmeɣ di tɣiwant (lbaladiyya) n Benṭeyyeb amenni waha amen wer dd-yusi lqarar, amen wer dayi-xellsen.
Zizawi yesqerqeb deg waṭṭas n twura bac a das wcen tiseqqar-nnes, a t-ḥesben am netta am merra wi ixeddmen di tɣiwant n Benṭeyyeb , maca walu. Iruḥ al Arbaṭ, umi ɣa yesseqsa x ddusi-nnes, ṭṭfen x uzellif. Yeɛqeb-dd ssenni, yedɛa-ten di lmeḥkama di Wejda. ɣer umezwaru wcin-as lḥeqq, di listinaf wtin-as kulci di ẓiru.
Manaya d ijjen lmunker d ameqqran, d ijjen ḍḍariba n weɣnas d ubeddi x tseqqar n tmaziɣt, d ubeddi x tseqqar n wegdud. Saɛid Zizawi, wer yeqqim ca d ijjen uterras zeg-s ɣer lmeḥkama, Saɛid d ijjen tɣawsa n wegdud ttemrusan-dd x-as waṭṭas n iseqsan. D ijje tɣawsa n lḥeq teḥdaj a das-dd-yedwel lḥeqq.
