19.1 C
Nador
Ttlat 21 Mayyu 2024

S ugernez-nnes, Basim Yusef yejja Murgan yeqqar: εlik ɣir wer dass-dd-liɣiɣ

S tmamekt n ugernez i zi yettwassen lebda Basim Yusef, deg yijj n wemsager atelfaz d aglanziy, yesmuttey-dd s tiɣist-nnes tidet-nni i wer iwiḍen ad wcen isiyasiyen d tefray d liεlam n waεraben d qaε yenni yeksin amnus i min ittemsaren di Filsṭin. Yewca Basim Yusef mamek ittwaxess ad yili liεlam n tidet deg umenɣi-ya.

Yeεdu-dd εlayen deg wezyen n tseεεet aked yijj n lmunecciṭ yemɣar deg uglanzi, qqaren-as Birss Murgan, yiweḍ dag-s Basim Yusef ad yesseεdu aṭṭas n tebratin x umenɣi i ittemsaran di Ɣazza, di tiffugna d umezruy-nnes, ula di tefras-nnes tijyu-siyasiyin s yijjt n tiɣist d tussna tasertant d zzerba di twarrit d ukalmi xmi ittxes lmunecciṭ-a ad t-iεesseb s iseqsan-nnes.
Iwḍen imfarjen deg ubidyu-ya ɣer ujar zi melyun di qell i 24 n tsaεεatin. Am wer yeggʷid xef twacunt-nnes d temkant i ɣer-s deg umarikan (mani i yettεic), yenna min wer nnin qaε lebwaq n liεlam aεrab, ibeddel axemmem i ttuɣa ɣer yiwdan deg umirikan, deg uglanzi d qaε yenni i yezrin amsagar-a, mamek aṭṭas n ayt-yutub ssawalen x uya.
Amsagar-a, ixess ad yettwasɣer i yimeḥḍaren n umsawaḍ asiyasi d yisiyyasiyen iḥudriyen, mamek zemmrent qaε lidaεat d liεlamiyen i yeqqaren aqqa ksin amnus n usiweḍ i min ittemsaran di Ɣazza, ad zzag-s ksin, εla-llah ad sbedden cway zi tɣuyyit n baṭel d uzawar d lidana…

Soufian Darraz

Timaynutin

Fser-itt