Yuffu-d Arrif iḍennaḍ x uneɣmis n tmettant n Prof. Dr. Hassan Benɛaqiya, Lexbar-a yejja ij n uxeyyeq d ameqqran deg imeddukal d imeḥḍaren-nnes.
Benɛaqiya i yellan d aselmad n tsekla Tafransist di tesdawit n Selwan, mamec i t-tuɣa zeg yewdan i yessersen ddsas i tebridt n tɣuriwin Timaziɣin di tesdawit n Wejda aseggas n 2007. Aked uyenni, issers ddsas i tebridt n tɣuriwin Timaziɣin di tesdawit n Selwan deg iseggusa imeggura. Ɛawed, ibedd ad yili x yixef n umaster n tutlayt Tamaziɣt di tɣiwant-a s ixef-nnes.
Prof. Dr. Hasan Benɛaqiya, yettwaḥsab zeg ipilaren n Tmaziɣt di Arif, la s trezzutin-nnes, la s tira-nnes. Amek yettwassen deg iger n tussna Tamaziɣt s ufus-nnes yessiɣen lebda ad iɛawen imeḥḍaren-nnes, d qaε wi icerken amnus.
Zeg uɣezdis-nniḍen, Benɛaqiya ttuɣa-t maci zeg iselmaden-nni i yeqqimen ɣer daxer i leswar n tesdawit waha. Maca zeg iwdan i yeggin fus-nnsen deg umenɣi n Tmaziɣt. Twasit-nnes deg umussu n Tmaziɣt ttuɣa-tt d tameqqrant, la s tira-nnes i ttuɣa ifesser di jjurnal n Twiza kul yur di 13 iseggusa n tudert-nnes. La s imesagaren i yegga d imelqiten i di yeḥḍer. Aked uyenni, zeg iwdan i d-iffɣen zeg usinag ageldan n tussna Tamaziɣt IRCAM, zegga i yuca ila asinag-a wer ittwagg maḥend ad ixdem Tmaziɣt nican.
Ḥasan, amassan ameqqran n tsekla Tamaziɣt, d netta i tt-iḍefren s tira d wefran, ibedd aked merra izlawiyen d imariten n Tmaziɣt, ittseggam tira, ittseggam la d lxezrat ɣer tyumi n tsekla-ya Tarifit i di yumen.
X manaya, ibedd x waṭṭas n trezzutin n dduktura, issufeɣ-d xirebbi n imegraden x tsekla d umezruy n tsekla. Mamec i tt-tuɣa la d netta zeg iwdan umezgun d wungal. Ittari s Tmaziɣt la s Tefransist aked tacemmust n idlisen-nnes i d-yeffɣen di taddart n wefsar Harmattan.
Ḥasan, ameɣnas n Tmaziɣt, ameɣnas i yeksin amnus n Arrif, d netta ittsinya aseggas n 2007 x uṭunumi n Arrif, zeg iwdan i yellan lebda di qabisa melmi mma hejmen-d x Tmaziɣt d melmi mma ttexsen ad ḥadan zi tseqqar n Irifiyen d Imaziɣen.
Ḥasan zeg iselmaden i yumnen di Tmaziɣt, d tcummɛet i ikemḍen maḥend ad issreɣ abrid n Tmaziɣt.