Korrika d ijjen wemḥizwar (ixes ad yini tazzla, karira) awal-a s tutlayt n Tbaskut (zi ssa d usawen ad as-nsemma: “Tuskart”). Amḥizwar-a, tettbedda x-as tmesmunt n AEK i uselmed n Tuskart n imeqqranen; i d-ijemmɛen ttmenyat i zi tettɛawan ḥma ad ggen iprugramen n weslmed n Tuskart.
Tettwaḥsab Korrika, d tamsart tameqqrant i yettwaggen deg umaḍal maḥend ad swizan akked ca n tutlayt.
Deg useggʷas n 2017, uzzlen imazzalen ca n 2 557 Kilumiter. Amḥizwar ittekk llilet d uzil bla abeddi i 11 n wussan.
Bla min iqqnen ɣer uselmed n Tuskart, nettaf amḥizwar-a yettwagg maḥend ad ɛernen ibaskuten ad qqimen ssawalen iles-nnsen.
Amek nessen ila iwdan i yessersen ddsas i wemḥizwar-a d nitni s ixef-nnes i yeggin tamesmunt n AEK n uselmed n imeqqranen.
Tiweḍ korrika wis 23 n twalatin x zeg wami yettwagg wemḥizwar-a i twalat tamezwarut deg useggʷas n 1980.
Mamec ggin ibaskuten fekkren di “Korrika”?
Lḥal n tutlayt Tuskart, lebda ttuɣa wer yelli di ca. Ɛlaḥsab ijjen uneqqis i yegga UNESCO, ssersen iles-a ila yeggur ad yenqaḍa deg waṭṭas n imukan di tmurt n Bask.
Nessen ila tamurt n ibaskuten tebḍa x tnayen, tenn n yeffus i iḍeffren i Spanya, mani Tuskart d iles d amaddud. Maca jjihet n ẓelmeḍ, i iḍeffren i Fransa, Tuskart maci d ijjen yiles d amaddud.
Amḥizwar-a n Korrika, icellex tamurt n ibaskuten zeg yeffus-nnes ar ẓelmeḍ-nnes, ttekken-id merra. Uca melmi mma ttekken x ca n ubilaj niɣ x ca n temdint, tteggen din ficta, ssemɣaran imezdaɣ s imḥizwaren d imazzalen.
Ixess ad dd-neydar, ila amḥizwar-a, wer ittwagg ca ḥuma ad yerbeḥ ca n ijjen karira, anict i t-tteggen d asfaqqi i midden s lhimmet n yiles n tyemmat-nnsen, ɛawed ssemɣaran zzag-s ca n ijjen i yewcin aṭṭas n tutlayt-nnsen deg umeggaru n korrika.
Deg wakud wami Franku ila yeṭṭef leḥkam di Spanya (1939-1975), yedwel iles-a deɣya deɣya ɣer deffer. Ttuɣa ipulisen Ispunya tteggen ibrusiten x ibaskuten i yessawalen iles-minzi ila tteḥsaben x-as d ijjen “iles kunṭra i merra min illan mudirnu”.
Bla ma a nettu ila di ssekwilat, ttuɣa geddlen x-asen ad ssiwlen Tuskart, ila ccaten-ten mala regben-d x-asen ssawalen-tt, tteggen x-asen bazzez ad harrden s Tespanyut.
Aṭṭas n imesnilsen qqaren belli tasertit tasenilest i yettwaggen di Fransa d Spanya d nettat i yejjin iles-a ad iqqim itteɛqab ɣer deffer s waṭṭas.
Amnus n yiles-a yuɣa aṭṭas n imeɣnas, uca bdan tteggen timesmunin s tnuffra maḥend ad slemden iles-a wa. Xenni, yus-d umussu Abaskiw ḥuma ad yegg tamesmunt n AEK i tikkest n tqubbanit di tutlayt-a.
Ɣir tsala tadiktaturit, bdan ca n imeɣnas xeddmen x ijjen usenfar. Iwdan deg umezwaru, ila ittawi-asen-d rebbi asenfar-nni ɛemmers ad yili d tidett. Asenfar-a d : “Korrika“.
Axarres-nnsen amezwaru ttuɣa-t d asiweḍ n tutriwin-nnsen i merra tamurt n Ibaskuten, maci ad qqimen ḥa deg ijjen wemkan waha.
Tunɣilt tamezwarut, tebda deg ijjen ubilaj qqaren-as Oñati deg wass n 29 nufember 1980, aya isala deg wass 7 dujembir zeg useggʷas-nni di Bilbo (bilbaw).
Mamec tettraḥ Korrika?
Deg wass wami fekkren maḥend ad ggen Korrika, ila xsen a tt-ggen di 10 n wussan. Twalat tamezwarut tettwagg di 1980. Melmi mma usin-d ad tt-ggen, ttixḍaren ibriden n tazzla msebḍan.
Awettas n umḥizwar ad yekkes igmiren i yebḍan tamurt n Ibaskuten. Ca n twalatin ttakkʷaḍen iwdan icerrken deg wemḥizwar-a ar 600 000 n midden.
Ḥma ad gerwen ttmenyat i usemɣer n tutlayt Tuskart, znuzan kul Kilumiter i ca n ijjen niɣ i ca n tmesmunt, inni i yessaɣen akilumiter-nni, ssemɣaran zzag-s deg ukilumiter-nni i ɣa azzlen midden.
Wenni i yettazzlen deg umezwaru n umḥizwar, ikessi ijjen ukeccuḍ, ittili ittwaḥḍa, ileḥḥef s ubandu abaskiw niɣ Ikurriña amek das-qqaren.
Axarres n ukeccuḍ-nni ikessin deg umḥizwar, ttuɣa-t n ijjen qqaren-as Juan Gorriti. Uca di mkul amḥizwar i yetteggen, ssadafen ijjen tebrat s wufur deg ukeccuḍ. Xenni, xemi ttakkwaḍen ɣer umeggaru n Karira, qqaren tabrat-nni deg ufistival ameqqran i yetteggen deg umeggaru.
Akeccuḍ-nni min xef nessiwel, tticen-t zeg ufus ɣer wenniḍen, tteggen amenni, zeɛma maḥend ad inin ila ixes iles-nnsen ad immutti zi tsatalt ɣer tenniḍen.
Wenn “yesɣin” ikilumitren, tteggen-as ccan d ameqqran, axmi tteggen-as wardi, ḥma ad jjen inneɣni ula d nitni ad sɣen ikilumitren. Ttmenyat-nni i dd-jemɛen, ttraḥent ɣer uselmed n yiles-a wa.
Awerni i wemɣar n wemḥizwar (wenni i yettilin di kabisa), tettemsar ficta, iwdan ttɣennjen, ttqessaren, tteggen dag-s ijjen musika min xef ttbeddan inaẓuren mkul aseggʷas.
Uca melmi mma bedden di ca n ubilaj, niɣ ca n temdint, ttafen din imḥizwaren iwdan ttrajan-ten, ttbeddan din cwayt s uɣennej d liraret d ccḍiḥ.
Merra manaya ttɛawanen-t ca n isinagen d tkadimiyin am tkadimit tageldant n tutlayt tuskart i yessiɣan fus ḥuma ad teḍhar tutlayt di berra kṭer ukṭer.
I xenni, melmi ɣa negg “Korrika”-nneɣ di Arrif?
Axarres n Korrika, ksin-t aṭṭas n wegduden, mani iles-nnsen aqqa-t x tma. Ad zzag-sen neydar amḥizwar n : “Ar Redadeg” di tmurt n Bretagne (ittwagg zi 2008), “Correllegnua” di Kaṭalunya zi (ittwagg zi 1993), “Correlingua” di Ɣalisya (ittwagg zi 1997), “Korsa n Aran” deg yeɣzer n Aran (ittwagg zi 1993), “Ras an Iaith” di tmurt n Galles (ittwagg zi 2014), “Rith” di Irlanda (ittwagg zi 2010).
Aseqsi i nesrusa: melmi i ɣa negg neccin Irifiyen amḥizwar-nneɣ, ḥma a nemḥizwar x usedder n tutlayt tarifit?