D ij n tenfust n yegriken iqdimen, tettɛawad x wakucen i iweddben Sizif, wami i x-as ḥekmen ad yessiley tasḍart ɣer tqiccit n wedrar. Kulma yiweḍ, a zeg-s dd-teqnunney, ad yedwel a tt-yessiley zi jjdid.
Tesrusa tenfust-a aḍaḍ x tudert-a i di ittemxetway bnadem, xmi ittadef deg yij n tqulareyt ittenneḍ deg-s amenni waha, minzi, wer yelli min wer yeḍbiɛen qeɛ, anict n uterras ixeddmen, maca lxedmet-nnes wer tettbin, yeḍḍuqquẓ waha.
Tambirt n Sizif :
Sizif ; ttuɣa-t d ijjen zeg ijelliden igriken, maca ttuɣa wer yeḍbiɛ, wer t-iḥemmel ula d ijjen. Merra tinni n cciṭan yegga-tent, rni x manaya, ttuɣa wer ɣer-s ittejji lexburat n wakucen, kulci yessufuɣ-it. Ij n twala, yeɛreḍ x inewjiwen-nnes ɣer yij n temdint, uca iṭeḥḥa-ten merra. Manaya ttuɣa wer yelli di leɛwayed n yegriken, yeffuk bnadem ad yessefreḥ inewjiwen, wer ten-yesxeyyiq, mani ɛad a ten-ineɣ. Wer ibedd ca da waha, yerni yexdeɛ ula d tamettant.
Ziyus d Sizif :
Wer tt-yejji ca Sizif din waha, yerni yegga-tt ula zi tmettant. Wami i x-as yumer Ziyus a t-kerfen s ssnasel deg wadu-tmurt, ttuɣa din Hadis, d netta i ttuɣa din iḥekkmen deg wadu-tmurt. Wami i ɣer-s iruḥ a t-yekref, yenna-s Sizif : raja cwayt, xseɣ a c-iniɣ ; qelleb beɛda ssnasel-a deg yexf-nnec, a txemmed ma zemmrent a dayi-ṭṭfent, niɣ wer zeg-i ttiwyent walu, ḥuma wer ttrikkʷileɣ.
D tenni i yegga Hadis, yessunneḍ ssnasel-nni i yexf-nnes ad iqelleb ma metnent ca, lexdenni, iqebbeḍ x-as Sizif, ikerf-it dinni mliḥ, uca yennufsel-dd, yeffeɣ-dd zeg wadu-tmurt.
Madam Hadis, ttuɣa-t d akuc n tmettant, zeggami i t-yekref Sizif, wer yemmut ḥedd, dewlen yewdan xenni wer tticcen ttedbayeḥ i Ziyus ; ameqqran n wakucen. Wami ɣa yerzu maɣar, yufa aqa akuc n tmettant yettwakref deg wadu-tmurt.
Yumer Ziyus bac ad ḍelqen i wakuc n tmettant, lexdenni, wami yessen Sizif aqa teggur-dd ɣer-s, yumer tamɣart-nnes, yenna-s wer dayi-ttegg bu legnazet, ejj rrimet-inu ad temmenḍar waha. Wami i t-ssehwan ɛawed ɣer wadu tmurt, yeɛber x-asen amur nniḍen, minzi yenna-sen aqa tamɣart-nnes wer tweqqer ca tamettant-nnes, tugi a das-tegg legnazet. Lexdenni, rrin-t-idd ɛawed ɣer tudert, mac awami yexzer Ziyus, yufa yeɛber x-asen twalat nniḍen.
Lexdenni, yumer Ziyus bac a t-iweddeb s yij n lḥajet nniḍen ; a t-yejj ad ittegg ij n lxedmet wer t-neffeɛ, ad ittmerrat bla lfaydet. Yumer-it bac ad yessalay tasḍart ɣer tqiccit n wedrar, kulma teḥdudder-dd, a tt-yerr twalat nniḍen.
D ta d tanfust n Sizif, tesrusa aḍaḍ x uneqreḍ i daneɣ-ittemsaran di tudert-a, x wunuḍ deg yij n tqulareyt wer zeg-s netteffeɣ… x lxedmet wer ittbeddilen bnadem, x tɣuyya wer dd-ittiwyen walu… Sizif, d ij n uterras i wer yeḥmilen tamettant, maca yedder deg yij n tudert tif-itt tmettant…