Kul aseggʷas, imelyunen n imselmen ttẓumman zeg wenqar n tfukt ar uɣelluy-nnes i tlatin n wussan deg wayyur n remḍan.
Deg iseggusa i yeɛdan, ttuɣa ittas-d wayyur-a deg unebdu deg yeẓẓelmeḍ n tmurt.
Maca remḍan n useggʷas-a yus-d di tefsut, mani i yebda di tmurt-nneɣ deg wass n 12 mars.
Aya ixes ad yini, azil ad yili d aquḍaḍ, xenni izemmer aẓummi ad yili zi lefjer ar lmeɣreb zi 12 ar 17 n tseɛɛatin kul ass di ca n tmura, alaḥsab man-t amkan i di tellid deg umaḍal.
Maca, ma manaya izemmer ad yili yessbeḥ i ṣeḥḥet-nnem/nnec? D aya i ɣa nessefhem min ittemsaren i arrimet n bnadem xmi ittẓumma tlatin n wussan.
Di tidett, ussan imezwura n remḍan ttasen-d qesḥen.
Zeg uɣezdis amassan, wer nzemmer a neḥseb x arrimet ila tẓumm, ar ɣa teɛda tmenya n tseɛɛtin x macca tameggarut.
Akud-a ittemqudda aked wakud i ittekken wadan d nitni ttẓemman-d zi macca min teḥwaj ddat n bnadem.
Xmi ɣa ɛdant tseɛɛatin-a, tettraḥ arrimet-nnes ḥma ad tẓemm glukuz i yellan di tsa d teksumin maḥend ad zzag-sen d-tettawi yinirji.
Awern-as deg uẓummi, yettraḥ glukuz-nni, tettas-d tadunt deg wemkan-nnes ḥma ad tili d aɣbal n yinirji i tetteḥdaja arrimet.
Uca xminni i tbedda arrimet tessekmaḍ tadunt, aya ittɛawan ḥuma a nekkes aɛeddis, a nessenqes zeg ukulistirul, maḥend wer daneɣ-ittaɣ ssekkʷar.
Xelli amenni, xmi ihekkʷa sekkʷar deg idammen, manaya ittejja anaẓum yerxu.
Xenni izemmer bnadem ad as-iqqes, a teṭṭfent timlullay, ad yensel…
Manaya wer ittuqiɛ ar ɣa yaweḍ bnadem wer yecci aṭṭas zi mani.
Zi 3 ar 7 n wussan : Ɣer-k a x-ak yeɛber lazaɣ d tzawa n arrimet!
Xminni i ɣa tebda arrimet ad tennam aked uẓummi, tettreẓẓa tadunt, tetteɛqab d sekkʷar deg idammen.
Maca, ixess bnadem ad yerr taynit i waman deg uẓummi-nnes, minzi mala bnadem yedded aṭṭas xenni izemmer ad as-yemsar lazaɣ.
Maca, ula d “macca”-nneɣ ixess ad dag-s yili ikarbuhidraten d tadunt.
Ɛawed ad yili ijjen usistim n macca i di yella iprutinen, tisent d waman.
Zi 08 ar 15 n wussan: Tnamit!
Ɣir ad tawḍed da, xenni, ad tilid mliḥ. Arrimet ad tebda tettnama aked uẓummi.
Yenna Razin Meḥruf, i yellan d aḍbib di Cambridge ila qa din tisebḥanin-nniḍen n uẓummi.
Yerni yenna: “deg ussan bla remḍan, nennum nettett macca i di yella aṭṭas n ikaluriten, manaya ittejja arrimet wer tzemmer ad teɛdel ixef-nnes s ixef-nnes”.
Isiɣa yenna: “Maca manaya, nzemmer ad t-neɛdel deg wussan n uẓummi-nneɣ; xenni taynit n arrimet tettraḥ ɣer ca n tmeslayin-nniḍen”.
S uya, izemmer uẓummi ad iɛawen ɣer ugenfi n ca n lehlakat.
Zi 16 ar 30 n wussan: Arrimet tessufuɣ ssem-nni dag-s.
Deg uzgen wis tnayen n remḍan, xenni arrimet tettnama nican aked uẓummi.
Uca ittekkes adan ameqqran, tsa, tiyeẓẓal d tilemt merra tuɛeffna-nni dag-sen.
Yenna Meḥruf: “Da, igmamen n arrimet-nneɣ ixess ad dd-erren tizemmar-nnsen, mamec tili ad taf tettilid mliḥ deg ufekkar-nnec d taynit-nnec, ɛawed ad ɣer-k tili yinirji isebḥen.”
Yerni yenna: “ixess ddat wer tettɛeqqib ɣer iprutinen ḥuma ad zzag-sen teksi inirji. Manaya ittuqiɛ xmi n ca n ijjen ittlaẓa aṭṭas, uca ad tebda ddat-nnes tettraḥ ɣer teksumin ḥuma ad d-tẓemm inirji, d aya i yettemsaren xminni bnadem ittẓumma zi ca n wussan ar imalasen.”
“Xmi i netteẓẓumma zi lefjer ar lmeɣreb, xenni i nettic i arrimet-nneɣ inirji s macca d waman. Manaya ittɛawan ḥuma a neḥda tiksumin-nneɣ, maca ittɛawan ḥuma a nessenqes zeg uɛeddis.” I yenna weḍbib-a.
I xenni, aẓummi d asebḥan i seḥḥet-nneɣ?
Yenna Meḥruf aqqa aẓummi d asebḥan i seḥḥet-nneɣ, maca s ccerṭ.
Yerni yenna: “Aẓummi d asebḥan i seḥḥet minzi ittɛawan-aneɣ a nessen min nettett d melmi. Xelli amenni, ixess wer nrenni ca kṭer zi cher n uẓummi.
Mala nẓumm kṭer zi manaya, ataf arrimet ad tbedd ad terr tadunt ɣer yinirji, xenni ad tedwel d tiksumin.
“Iwa manaya maci d asebḥan i seḥḥet-nneɣ, minzi ataf nettlaẓa amenni waha”.
Maca mala nettẓumma, nettreẓẓa aẓummi-nneɣ s macca, netteɛqab nettẓumma… Xenni manaya ḥsen zi mala neṭṭef-d aẓummi s laṭac.
Ɣer umeggaru qaɛ, yenna “aẓummi n Remḍan, ixess-as ad yili s tebridt iseggmen, iqaden. Aya ittawi ɣer usenqes n uɛeddis bla ma ad issekmeḍ min tetteḥwaja arrimet.”
Tala: BBC