Tenna ijjen tɣuri d jjdid ila mala beddlen aksum azeggʷaɣ s iselman ameknaw sserdin d buqrunis, ataf izemmer ad issenjem tudert n 750 alef n yewdan kul aseggʷas, ad yegg fus-nnes deg usbeddi n wemxumbel n uklima.
Din ijjen tɣuni d tameqqrant i yetteqqnen jer aɣastar n uksum azeggʷag d lehlakat ittelqafen midden, bla ttaḍeyyuɛ i yettejja di twennaḍt.
Zeg ijjen uɣezdis-nniḍen, nettaf sserdin d buqrunis d ca n marka n iselman-nniḍen i dag-sen irewsen, llan s waṭṭas di lebhurat.
Xelli imerzuten ttuɣa ssnen lfaydet tameqqrant n ddegg-a n iselman x seḥḥet n yewdan, maca ila wer ssinen ca anict i zemmren ad sneqsen zi lehlakat mala qqimen iwdan ttetten-ten deg wemkan n weksum azeggʷaɣ; d manaya i di rzun aṭṭas n imussnawen iwstraliyen d ijappuniyen.
Imussnawen-a xedmen x ca n 130 n tmura, xenni ufin mala beddlen aksum azeggʷaɣ s iselman-a, izemmer aya ad issenjem 750 alef n yewdan i yettmettan s lahlakat i yeqqnen ɣer macca i yeccuren s weksum.
Imerzuten-a ufin belli mala yewdan di tmura i wer yegmint ca aṭṭas, bdan ttetten iselman-a ataf ad ibeddel deg waṭṭas n tmeslayin, am usenqes zi lehlakat i yeqqnen ɣer wul.
Xenni uran di tesɣunt n “BMJ Global health”: “Maḥend ad itif sseḥḥet n bnadem d seḥḥet n tmurt min xef nettɛic, ixess ad nessenqes zi weksum azeggʷag, ad nraḥ ɣer macca isebḥen, tameddukelt n twennaḍt”.
Nnan ɛawed : “iselman ccuren s omega 3, i isbeddan lehlakat n wul, i di yella aṭṭas n yeswiren n ukalsyum d ubitamin B12”.