Vulva, d icten zeg yegmamen n tarrawt ɣer twetmin, min xef wer nessiwil aṭṭas, maca mala nessen mamec tegga vulva, min ɛnan iḍeffusen-nnes, ikuluriten-nnes d waradummi-nnes (irrégularité) ataf ad aneɣ-iɛawen uya ḥuma a nessen deɣya ma day-s ca n umxumbel ma lla.
« Aqqa ittemsar ijjen useɣdi x vulva deg wamun. Nesxeddam awalen iɛeffanen. “Iwdan qqaren ‘abeccun’ xmi ttexsen ad inin vulva”, D aya i teqqar Sophie Rees i BBC Mundo, nettat d tamesdawit di tesdawit n Bristol (Tagelda-imunen) i yelhan di teɣri-nnes x “useɣdi d tusurt-nnes (impact)”.
“Aɛenkrif yella xmi ṭabu ittejja-d taqubbanit di min izemmren ad as-yegg i vulva d seḥḥet-nnes.”
Ameknaw n uya, xmi nessawal x: axenzir (kunsir) n vulva, d ijjen lehlak yudrus, deg uzgen ameqqran n twalatin ar ɣa yeɛda lḥal ɛad i x-as sɛeddant temɣarin, xenni mala ittwagg x-as uparasyu ittejja later ɣer daxel-nnes.
Ixess beɛda a nebḍa jar urganen-nnes
Tettwala Rees belli xminni tettili taqubbanit ɣer midden, wer ssinen walu x vulva, manaya ixes ad yini ila wer sxeddiment ca iwalen i ilaqen ḥuma ad snumlent (décrire) min dasent-yemsaren d mani xmi tettili ca n ḥajet maci ar din.
Ɛawed, alaḥsab tibuda (définitions) i yettwaggen zɣer Mayo Clinic d NHS, i yellan d tanafut n seḥḥet di tgelda-imunen, ixess a nebḍa jar:
Vulva: d azgen i d-ittbanen berra zeg wurganen (organes) n tarrawt ɣer twetmin, zzag-sen ancucen imeqqranen, ancucen imeẓẓyanen d uzgen-nni n berra i d-ittbanen zi tilest n ubeccun (aklituris), d tnurẓam n ibeccicen d ubeccun, tisi n uḥeḍḍan (périnée), d wemkan mani llan ipursuten d yilem i yellan jar texna d ubeccun.
Abeccun: D mayen yellan ɣer daxel i wurganen n tarrawt ɣer twetmin dag-s asaru (canal) n upursu i yeggun am ulastik; ittnejbaden zeg warẓam n ubeccun ar usirew (utérus).
Am mamec kul bnadem d tefras n wudem i ɣer-s, kul vulva weḥḥed-s di furma-nnes, di tiddi d ukulur.
Maca manaya wer d-itteqqim ca xmi wer tettessned izegnan d wurganeny-nnes waha.
Aqqa din aṭṭas n ḥcuma, min xef ixess a x-as nessiwel.
Teqqar Sophie Rees i BBC Mundo: « D lḥajet tamezwarut mani timɣarin ihelken wer tettrent bu lmuɛawana d twiza; d leḥcumiyyet. Kter zeg uya, wer zemmren ad inint min dasent-yemsaren minzi tili ttsedḥant xmi ttilint ɣer weḍbib.
Manaya isɛeṭṭara deg udiyagnustik n uxenzir n vulva.
Min iɛna axenzir n vulva?
Issdabu-t uklinik n Mayo am ijjen uklasi n uxenzir ittḥadan wudem n berra n wurganen n tarrawin n twetmin, ixes ad yini izegnan n wancucen d uraq i nettwala zi tilest n ubeccun (aklituris).
Ittban-d uxenzir n vulva ameknaw ca n uɛebbuẓ niɣ xminni vulva igerreḥ mani ittegg aḥekki. Mamec mma yegga ca n lɛumur ad ɣer temɣart izemmer ad as-d-iban, maca deg uzgen ameqqran, ittban-d ɣer tinni innumɣaren.
Abani-nnes yudrus. Ameknaw, di tgelda-imunen, ittegg ca n 1% zeg ixenziren i d-ittbanen ɣer temɣarin.
Ɛad wer nessin mayemmi i d-ittban uxenzir n vulva ɣer temɣarin, maca aklinik n Mayo iqqar ila izemmar lehlak-a aɛeffan ad d-iban s imentilen-a:
- Xmi tili temɣart tennumɣar. Waxxa netta lehlak-a izemmer ad yelqef tamɣart mamec mma yegga lɛumur-nnes, maca xmi tettnumɣur ittili lxaṭar. Tamɣart xmi i ɣa taweḍ 65 useggʷas, ḥsen ad tesseɛda x vulva-nnes.
- Lehlak s VPH. Wa d ijjen lehlak ittili xmi temɣart teṭṭes aked ḥedd uca iɛedda s wemsawaḍ asiksi, lehlak-a ittegg ca n ixenziren ameknaw wenni n vulva d wenni n yiri n usirew.
- Tenn ittkeyyafen.
- Asistim n tiqqilt (immunité) i yudrusen. Am inni isessen ddwawat maḥend ad sgeɛɛden zeg usistim n tiqqilt-nnsen, am inni umi yettwakkes ca n wurgan zi arrimet-nnsen. Niɣ inni i di yella lehlak n tiqqilt i yudrusen ameknaw ssida.
- Ca n lehlak n yilem ittḥadan vulva. Deg yiger-a, din lehlak n lichen (ijjen marka n iḥebbuyen) d ijjen marka n lehlak i yettɣiman lebda akked bab-nnes, ittejja bnadem ittḥekka, ittejja awern-as ibeqqiḍen d icemlalen d iḥercawen x yiles n vulva.
Asgenfi d uḥeṭṭu
Maḥend ad tgenfa ca n icten zeg uxenzir n vulva ixess-as ad tegg aparasyu i zi ɣa tekkes mani illa uxenzir-nni d ijjen cwayt zeg yilem i di wer illi walu, raq-nni i das-d-yunuḍen. Ca n twalatin, aparasyu ittejja uɣil ad temmekkes vulva amen tekmel.
Melmi mma adyagnustik d useɛdi ittili zik, cḥal mma ttili nettekkes x-aneɣ ad yili ca n uparasyu i yullɣen cwayt.
Mala lehlak iwta iẓewran, ataf ixess amkan-nni amen yekmel ad imekkes.
Mala, iwweḍ ɣer ijjen lḥal yeqseḥ, teqqar Rees belli aparasyu ad yili “iqseḥ” alaḥsab amkan uḥbub-nni d tiddi-nnes, xenni ataf izemmer ad imekkes ijjen uzgen niɣ ancucen imeẓẓyanen merra, amenni ula d wancucen imeqqranen, rni ɣer-s tilest n ubeccun.
“Ataf xenni wer nzemmer a neqqim nbedd. Ixess-aneɣ a neẓẓel. Maḥend a neggenfa zeg wemkan-a iqqseḥ, ittegg leḥriq aṭṭas”. I teqqar Rees.
Anatumiya n wemkan-nni ittbeddal, xenni nzemmer ataf wer nesḥissi aked wemkan-nni zi arrimet, uca ttraḥen-aneɣ imezran iseksiyen.
“Xenni ataf wer ɣer-m ittili qaɛ mezri ula deg ijjen lḥajet, di mamec mma yegga ca n usikes. S uya ixess a neṭṭef lehlak-a zik, mala nessen izumal-nnes.”
Mux ɣa negg a neḥḍa ixef-nneɣ?
Bla ṭabu-nni i yeqqnen ɣer vulva, din timeslayin-nneɣni isɛeṭṭaran aseɛdi x uxenzir-a.
Deg wartikel-nnes i tefser Sophie Rees di The Conversation, teqqar belli din ijjen tɣuri d tadanmarkit ismquddan lmijar n useɛdi n lehlak-a akked ca n markat-nneḍni n uxenzir mani lmijar ikessint temɣarin maḥend ad raḥent ad sseɛdant x vulva-nnsen, d azegrar bezzaf.
Imussnawen qqaren ila manaya itteɛqab ɣer izumal wer x-asen nessin walu deg umezwaru.
Maca ɛawed, teqqar Rees, aṭṭas wer tterrin bu taynit i uzgen-a zi arrimet-nneɣ xmi tili nesɛedda.
“Taynit tettraḥ d amezwaru ɣer useɛdi x yiri n usirew (lwalda); bla ca n ḥajet-nneḍni. Ɛad i d-tfekkren aqa din ijjen ḥajet qqaren-as vulva”. I tenna i BBC Mundo.
Teqqar, ixess bnadem ad iwekked x wawal-nnes deg useɛdi bac ad x-as sseɛdan dinni.
Maca aqqa din aṭṭas n izumal i daneɣ-d-iɛellmen belli izemmer ad din yili ijjen uxenzir n vulva:
- aḥekki i yettilin lebda.
- Leḥriq s waṭṭas di jjihet-nni.
- Iḥebbuyen x yilem i d-ittbanen axmi d izeggʷaɣen, d icemlalen niɣ ḥedqen.
- Ijjen uḥebbuy d ameqqran i yeggin ameknaw afiḍriw.
- Ageyyeḥ n vulva niɣ tamɣart txessar aṭṭas n ddem di cher-nnes.
- Ijjen uyezzim innurẓem x vulva.
- Leḥriq itteqqsen xmi tettbeccac temɣart
- Taquqit n waẓẓli ittbeddalen di furma-nnes d ukulur-nnes.
Izumal-a zemmren ad d-awin lehlakat-nneḍni, waxxa inni isebḥen zzag-sen, s uya ixess bnadem melmi yusa-as-d ddegg-a ad iraḥ ad isseɛda ɣer weḍbib, melmi temsar ca n ḥajet maci ar din di vulva-nneɣ.
Mamec i ɣa tegged ad tessned axenzir-nni nnit ?
Maḥend ad teẓred uyenni, ixess ad tqellbed ixef-nnem.
Nesseqsa Sophie Rees min ɛnant tebridin i zi tzemmred ad tqellbed ixef-nnem.
Maḥend a nebda, ixess ad tilid deg ijjen puzisyu mani tzemmred ad teysid ca n tisit niɣ ad tegged ca n selfie s ttilifun niɣ qaɛ ad as-tegged fuṭu.
Ɛawed tzemmred ad as-tinid i wergaz-nnem/acrik-nnem ad am-yegg tisit zzat-m niɣ ad ad am-yegg fuṭu niɣ d ca n uvidyu.
Malla din tisit, tzemmred ad teẓred ca n tisit issemɣaren maḥend ad teẓred nican min ibeddlen di vulva-nnem.
Niɣ ad tegged axmi tekmummced, d tisit aqqa-tt x tmurt, uca ad tekmummced d cem tsennded x lḥiḍ niɣ ad teẓẓled x qama x waṭṭas n tsumta.
Ixḍar ca n wakud wer x-am d-yusi ca dag-s char-nnem. Zi senni, di twalat tis tnayen, gg-itt xmi ittili x-am cher maḥend ad teẓred min ibeddlen di vulva-nnem deg wakud-a.
Wer sxeddimet kirmat ar ɣa teẓrent manayenni.
Min ɣa teẓred beɛda?
- Ancucen n berra d inni n daxel n vulva, ittsemma inni imeqqranen d imeẓẓaynen. Sexdem iḍuḍan-nnem maḥend ad tfitcard, ad tebḍiḍ ijjen aked wenneḍni, xzer min din jar-asen.
- Akilturis niɣ tilest n ubeccun, i yellan d s nnej i wancucen s tnayen.
- Arẓam n ubeccun, manis d-hekkʷan ibeccicen, ula d arẓam n texna.
- Fitcar amkan-nni illan jar tnuqqibt n texna d ubeccun.
Amek nenna, kul bnadem d mamec tegga, temsebḍa. Am vulva kifkif: kul icten temsebḍa.
Min dam-ixessen ad teẓred vulva-nnem zi lweqt ɣer tenniḍen ad takzed, ad tessned min dag-s illan nurmal.
Tessplika Sophia Rees manaya: “Nec ttwaliɣ zi tmeslayin timeqqrani i ɣa ibeddlen mamec nfehhem min illan nurmal ɣer-kent. Tzemmred mala teẓrid ixef-nnem twalat tamezwarut ad yili uyenni axmi ca n ddegg. Maca, d llemliḥ mala tennumed txezzred ixef-nnem”.
Tura-t: Alicia Hernández i BBC Mundo.