Icrek José Miguel Tasende i yellan d amessiwel s yisem n tseḍma taberlamant n “Vox Melilla”, jjemɛa i yeɛdun di ṭṭabla tamezwarut n “Campus’I SUR n tmerselt DENAES (abeddi x tmurt Taspanyut): timegga d tasertant, tadelsant d tamsawaḍant. Abeddi asertan x tidett-nneɣ tasertant” i yettwaggen di Sivilliya.
Deg wawal-nnes, yenna: « Aqqa jjin Mlilet weḥḥd-s zegga i teɛlem uṭunumiya-nnes, wer tt-ssidfen ca deg Wandalus. Nettat [zeɛma Mlilet] wer tzemmer ad tili s waṭṭas n tdelsiwin.» Yessiwel Tasende mani yenna ila « ḥma a ndafeɛ x tidett tamezruyant n tmurt Taspanyut di temdint-a zzat i uzewwer n umezruy ittreddajen tidett n Mlilet.»
Yeffeɣ ɣer-s nican, mani iwekked ila « Tadelsa Tamaziɣt ɛemmers ma tettwaẓẓu.» di temdint-a.
Tameskant n zzat i usinagug
Di tmeskant i yettwaggen ass n 18 Kṭuber zzat i ijjen usinagug di Mlilet, usin-d ca n midden ḥma ad din bedden aked Falesṭin alaḥsab girra-nni ittemsaren aked Israyil.
Iɛawed umessiwel-a mamec lexxu udayen zeɛma “wer zemmren ad yerḍen kippa-nnsen di berra minzi tekkʷren-ten midden.”
Adwal ɣer tidett
Lexbar-a ila tewi-t-id Melilla Hoy x umessiwel-a i yellan deg ijjen umulli aqqa-t kunṭra i imetlaɛ d iberraniyen. Yettwaḥsab zeg ifusiyen iradikaliyen di Spaniya.
Ad d-neydar ila aṭṭas n tarwa n Mlilet bdan deg iseggusa imeggura tteggen aseggʷas amaynu, mamec i yebda din wawal x uselmed n Tmaziɣt i Imaziɣen i yetteggen kṭer zeg uzgen n imezdaɣ n temdint-a Tarifit.