Deg yij n useggʷas, Buḥmara, i ttuɣa yeggin ixf-nnes d Mḥemmed, mmis n sselṭan Lḥasan, yessekk ɣer Ayt Temsaman ad zerɛen xemsin n txuncay n imendi, a t-yessecc i yeksan-nnes, x manayenni, yeɛfa-ten wer ttxellisen walu.
Umi i dd-yiweḍ unebdu, yessekk buḥmara Jjilali Mul Luḍu, akid-s lɛesker-nnes, ad raḥen a dd-smunen lɣillet i dasen-dd-tewca tmurt-nni i zerɛen. Lami iwḍen, ufin walu, igran deg-sen ɣir tazeggʷart.
Nnan-as yemɣaren n teqbilt, ttuɣa-ten rebɛa idsen : « aqa tettwalid, anẓar walu aseggʷas-a, kulci yuẓeɣ, tamurt tesseɣmi-dd illa tazeggʷart d usekkum. »
Yerra x-asen lexdenni Jjilali mu Luḍu : « maɛlic, ammu i yektab,wer ɣer-neɣ min ɣa negg. »
Jjilali, yenna-sen amenni bac a ten-yessuḍes deg ulum waha, yewca lweqt i lɛesker-nnes ad berdɛen i yeksan, ad smunen iqeyḍan d leḥlas-nnsen. Lexdenni, kksen-dd lesnaḥ ɣer rebɛa-nni n yemɣaren n teqbilt, qebsen-ten din. Yenna-sen Mul Luḍu : « ta qa d lbaraka n sselṭan, wer da ɣir ad tmejrem min dd-tewca tmurt, a t-tesserwtem s leḥfa, lexdenni a nejmeɛ lɣillet. »
Ggin min asen-yenna. Zi ssenni, yessekk Mul Luḍu lɛesker-nnes ɣer ledcur, iḥewwes-dd timɣarin d iḥenjiren imeẓẓyanen, syedden-dd 120 n txuncay n imendi x yeɣyal d ikiḍaren, ukrent-tent-idd zi ledcur, zi ssenni, ṭṭfen abrid ɣe Buḥmara.
Tala : Le radical Algérien, 24ème année. N* 299, dimanche 12 juin 1910
