Ila din tlata n igenduzen, ijj d acemlal, ijj d azeggʷaɣ, ijj d aberkan, d yij n yizem, ila ttɛicen deg yij n lɣabet merra. Mani ma raḥen, ila ttmunen. Ij n nnhar, yeẓẓuɣer yizem agenduz azeggʷaɣ d wenni acemlal, yenna-sen:
- “mli ur kid-neɣ agenduz aberkan ili nettɛic mliḥ. Luxa netteffeɣ s llilet waha. Ur nzemmer a neffeɣ s uzil. Melmi ma neffeɣ s uzil, ad ẓren ifellaḥen agenduz aberkan, a dd-asen a daneɣ-nɣen.”
Nnan-as: “mani ɣa negg agenduz aberkan?”
Yenna-sen: “jjem-ayi a t-cceɣ.”
Nnan-as: “ecc-it.”
Iraḥ ɣer-s, yecca-t.
Qqimen gi tlata.
Ij n nnhar, yeẓẓuɣer agenduz azeggʷaɣ, yenna-s:
- “mli ur kid-neɣ ci agenduz acemlal, ili mala nexs a neffeɣ, s uzil niɣ s llilet. Maca lux ur nzemmar ci a neffeɣ s llilet, melmi ma neffeɣ s llilet, a daneɣ-ẓren ifellaḥen, a daneɣ-nɣen.”
Yenna-s ugenduz azeggʷaɣ : “muk a das-negg ?”
Yenna-s yizem: “ejj-ayi a t-cceɣ.”
Yenna-s ugenduz : “ecc-it.”
Iraḥ ɣer-s, yecca-t.
Qqimen gi tnayen.
Ij n nnhar, yenna-s yizem: “xseɣ a c-cceɣ. Min teqqared lux cekk ?”
Yenna-s ugenduz: “nedmeɣ maɣar ur mmecceɣ ci wami yemmecc ugenduz aberkan!”.
Izemmem-itt Williams Ellis, Lessons for beginning tarifit, 2008. P. 259