Le Rifain
Tbedd ssandika n FNE aked yemselmden i xef tettwabezzez kunṭraṭa, ass n larbeɛ 7 zi kṭuber ɣer tewwurt n tmehla n uselmed di Nnaḍur.
Abeddi-ya, ttuɣa tlaɣa ɣer-s ssandika n FNE di Nnaḍur, ttuɣa deg-s ca n 200 n temselmdin d yemselmden , yus-dd aked wass amaḍlan n wemselmed. Ksin deg-s yinni d tinni i ttuɣa iḥeḍren di tmijjawin-nsen ḥuma ad inin lla i tsertit n uselmed i yeccaten tiseqqar n merra wi ixeddmen deg yiger n uselmed.
Amen sɣuyyen deg ubeddi-ya x uqabu i dd-ihekkʷan x yemselmden i yesɣuyyun x tseqqar-nsen, amen bedden deg wudem n tirart d ixerwiḍen ittemsaren di tmehla n Nnaḍur deg waṭṭas n ḍḍwasa.
FNE, d ijjen ssandika i yennan awal-nnes di Nnaḍur, tettwassen s imeɣnasen bedden x iḍaren-nsen amen tenna ḥuma a dd-rren tfawt deg wudem n tɣensa n ssandikat i ttuɣa yewḍan x uɣembub di min yeɛdun, kter ɛad di temdint n Nnaḍur.
