18.1 C
Nador
Larbeɛ 22 Mayyu 2024

Mamek yegga ddellaḥ, yedwel d azamul n tlelli!

Di Filistin, mani d muntif mala teksid bandira tafalistint, ttmeysint bandirat deg-sent izgenan n ddellaḥ. Azeggʷaɣ, abarkan, acemlal, d warrbiɛ.

Iwalen-a tura-ten tezlawiyt tamarikant Aracelis Girmay, di tqessist-nnes “Ode to the Watermelon”, deg-s i tessiwel x lmeɛna n ddellaḥ, di tɣawsa tafalistint. Azeggʷaɣ, aberkan, acemlal d warbiɛ, ina urid d ikuluren n ddellaḥ waha, maca d ikuluren ula n ubandu Afalistin. Suya i yedwel deg umaḍal amen yekmel, d azamul (Symbol) ixessi-t marra wi yexsen ad ibedd aked tɣawsa tafalistint. X uneggar-a ɛad kṭer, zegga tewta yisrayil di ɣezza, nedwel nẓerr tadellaḥt aṭṭas di Susyal midya.

Man tḥajit i ɣer-s ɣa ddellaḥ?

Deg 1967, mani tḥewwez Yisrayil leḥdada n ɣezza, d lɣerb n Lurdun, tegga Yisrayil memnuɛ ad ssidfen ca n uzamul n Filistin niɣ min di llan ikuluren n ubandu ɣer imukan yettwaḥewwsen.

Lami yedwel ubandu d muntif, xerrsen Ifilistiniyyen di ddellaḥ, dewlen kessin iqatcuten n ddellaḥ deg iɣewwiɣen-nsen. Maca mani firman kuntratar 1993, tenɛem Yisrayil s ubandu Afalistin.

GETTY IMAGES

“Di ɣezza, mani ttwaṭṭafen iḥenjien x izgenan n ddellaḥ. Xezzren deg-sen iɛskariyyen am axmi ksin bandu Afalistin” yenna usaḥafi John Kifner n New York Times deg 1993.
cwayt awarn-as, tenna New york Times, belli John kifner yesxarreq, Waxxa Yisrayil simant-nnes tenɛem!

Di tẓuri d wamunen n wemsawaḍ

Zi senni ar iḍa, bdan artistat xellqen-dd mkul twalat ij n tẓuri d jdid s ddellaḥ. Zi min yettwassnen aṭṭas, lxedmet n Khalid Hourani. Yegga-tt deg 2007, yersem ij n tezgent n ddellaḥ i yij n wedlis. Tawlaft-a umi yegga “The Story of the Watermelon” tekka amaḍal amen yekmel. Terni tettwassen awarni umenɣi i tegga Ḥamas aked Yisrayil di Mayyu n 2021.

NSTAGRAM/KHALED HOURANI

Aseggʷas-a amenni beɛda. Mani yummar Awzir n ḥeṭṭu n tmeslayin n daxel n Yisrayil, ad ttwaksent bandirat n Filistin. Minzi yenna qa bandira tafalastint d azamul n lirhab. Dinni bdan ad ttwaksin izgenan n ddellaḥ ɛawed. Di lqanun n Yisrayil, ibanduten n Filistin wer llin ca memnuɛ, maca ipulisen d iɛskariyyen, ɣer-sen lḥeq a tent-ksen i yewdan.

Deg ij n uɣewweɣ di Lquds, yirḍen imɣewwɣen d Yisrayiliyen arruḍ deg-s azgen n ddellaḥt, yura x-as Tilelli.

Di TikTok, tegga Shumirun Nessa, takumudit taglenziyt ij n ufilter n ddellaḥ, tenna i yewdan i tt-iḍeffaren ad ggen afilter-a, amen tjemmaɛ tinɛacin maḥend a zeg-sent tɛawen iwdan di ɣezza.

GETTY IMAGES – Wa urid d Bandu n Filistin

Deg wamunen n wemsawaḍ (Social Media) Aṭṭas n yewdan xmi ttarin ca n tmeslayt, x Filistin, ssexdamen Emoji n ddellaḥ deg wemkan n ubandu Afilistin, minzi alguritmat n isiten-a messḥen niɣ sdurruyen marra mindi yella wawal n Filistin, niɣ d abandu-nnes.

Ddellaḥ lesnin zeg wami yebda ad yettwaksi deg wemkan Ubandu. D Azamul n pulitik, kṭer ɛad zi lintifaḍa wiss tnayen (anhezzi afilistin). Nhar-a, ddellaḥ urid d ij n macca tetteɛjib-asen i yewdan din yeddren waha. maca d ij n tareccint xeẓẓren ɣer-s ifilistiniyyen, lux s tsatalin, d tenni dd-ɣa-yasen. Ttwalan-tet i netnin d azamul n tlelli. I Yisrayil, ittbedda-yas di tmijja!

Timaynutin

Aqelɛi
Aqelɛi
Abdelmajid Akalai

Fser-itt