Le Rifain
CHACHA. ⵛⴰⵛⴰ
Ilul di Qabuyawa (Ixf n Cebdan), yixḍar ad yerwel zi tmurt-nnes mamek i ggin waṭṭas n yirifiyen, awarn i umi x-as uzzlen zi tɣuri, (Asinan n Ccrif Muḥemmed Amẓẓyan). Minzi umi ttuɣa-t d aḥudri, ttuɣa ittwassen s wenhezzi-nnes d weɣnas-nnes, ttuɣa-t d ijj zeg yimeɣnasen n “Ɣer zzat” (ila l’amam). Min yejjin lmexzen n Lmerruk ittmunistar-it.
Di 1977, yeɛreq ɣer tmurt n Hulanda, dinn i yufa ixf-nnes, yufa tilelli-nnes. Min t-yejjin a dd-yezḍuqqez min deg-s yufsen di tira d tmuzikt d yezlan…
Yura CHACHA kter zi 20 n yidlisen jer usefru d tullisin d wungal. zeg-sen: “Rez ṭṭabu a dd-teffeɣ tfukt”, “Ajḍiḍ umi yettwagg celwaw”, “Cway zi tibbuhelya ɛad wer tiwid”, “tarwa n umaḍal”, “Abrid ɣer yezran”….
CHACHA ittwassen s tewdanit-nnes (tafganit) d ubeddi-nnes aked uɣezdis n yinni i umi ttwakksent tseqqar. Yennewju ɣer waṭṭas n tmura di Uruppa d Umarikan n yeffus n Tefriqt.
Ttuɣa deg-s ijj n lehlak yeqseḥ, maca waxxa amenni, wer yessehwi ifassen-nnes, waxxa amenni yeqqim lebda isnejbad ɣer wesbeddi n tsekla-nnes d tdelsa-nnes tarifit…
Ass n 29 yunyu 2016, yeffeɣ buḥbel amezdag n CHACHA awarn i umuɣẓel d azegrar aked lehlak.
Yemḍel di tmeḍlin n “Yixf n Cebdan” ass n 3 yulyuz 2016, yejjull al umi yerẓa ṭṭabu, umi udfent temɣarin aked yergazen i twala tamezwarut ad t-meḍlent. munen-dd x umḍel-nnes aṭṭas n yimeɣnasen zi mkul amkan. CHACHA yessiggʷed lmexzen umi ttuɣa yedder, yessiggʷed-it ula amen yemmut!…
Ad yedder yiman-nnek deg wefra ay argaz! Wer c-nettettu…
Ɣer ɛawed: Musṭafa LBUƐEZZATI (Amesrem); tacumɛet n wesfirnen i tessexsi temnawt