Wwḍen ad ggen Imarikaniyen Joe Biden d amɣar d jjdid x-asen. Di Washington tettwagg ficta n umutti n tenbaḍt ɣer 17.00 s lweqt n grinitc. Qbel ma ad ggen ficta-ya ttuɣa sswejden-as mliḥ, s waṭṭas n uḥeṭṭu maḥend wer ittuqiɛ ca n lfuyun. Ula kṭer zeg inni ittexsen ɛad aselway Donald Trump. Di Setta zi Yennayer i yeɛdan ttuɣa udfen x lebni n ukapitul – ansa n uberlaman- mmuten x-as xemsa n midden.
Lux, drus n yiwdan i ɣa jjen ad ḥeḍren, urid luluf n midden amec i ttuɣa ɛada qbel. Trump netta yugi ad yeḥḍer, iraḥ ɣer Florida. Manaya ɛemmers wer yuqiɛ deg umezruy n Umarikan, ca n 150 iseggusa zeg wami.
Trump deg wawal n umsafaḍ-nnes : Negga min xef d-nusa
Biden d temɣart-nnes Jile uyuren-d zi twilayt n Dilawer ɣer Washington. Biden ikka ca n 16 iseggusa netta d agmam (membre) deg useqqim iwessura qbel ma ad yili d nnayeb n uselway n Barack Obama zi 2008 ar 2016.
Deg uɛecci-nni i di t ɣa rren d rrayes, ttuɣa-t x yixef n ficta ig issemɣaran s Imarikaniyen ig immuten s Covid 19. Mala walu wwḍen ɣer ca n 400 alef mala walu qaɛ.
Ass-a n larbeɛ ad iraḥ netta ɣer taddart tacemlalt zi senni ɣer Ukapitul. Mamec ittwaxedmen 200 alef n ibanduten n Marikan deg wazzareg n « National Mall » i yellan arendat i lebni n Ukapitul, ḥuma ad ṭṭfen amkan i midden i ttuɣa xsen ad d-asen.