Ijjen wass, isewweq jeḥḥa, yesɣa-dd ijjen weɣyul, Igewwed-it-idd aked webrid. Ẓrin-t ijjen tnayen n iceffaren, uca ggin x-as awal bac a das-t-awyen.
Iruḥ yijjen zeg iceffaren, yekkes-as ssrimet i weɣyul, yegga-tt deg yiri-nnes. Wenneɣni yendeh aɣyul. Yedwel jeḥḥa yeẓẓuɣɣara aceffar, ittɣil-as d aɣyul. Melmi ma yeɛdu x ca n yewdan, ttɣiman ttbehḍen. Netta jeḥḥa yeqqar aked yexf-nnes: Sɣiɣ-dd aɣyul wer yelli wer yexliq, merra wenni i xef ɣa ɛduɣ ittɣima yerẓem deg-s aqemmum.
Umi yiweḍ ɣer taddart, yenneqleb awarn-as, yufa ssrimet deg yiri n uceffar. Lexdenni yebda uceffar-nni yettru, ittnixsis. Iseqsa-t Jeḥḥa, yenna-s: “Min cekk-yuɣin tettrud? Manis i dd-tekkid?”
Lexdenni, Yebda uceffar ittzur azellif i Jeḥḥa. Yenna-s : “Aqqa-c sɛessbeɣ yemma, wer das-ggiɣ rray, tedɛa xaf-i, uca ttmesxeɣ, dewleɣ d aɣyul. Umi yufa amenni uma, indeh-ayi ɣer ssuq, yezzenz-ayi. Lexxu s lbarak-nnec, dewleɣ d bnadem mamek dayi-ttuɣa”.
Yugur uceffar. Iwessa-t jeḥḥa bac zi ssa d usawen ad ittegg rray i yemma-s.
Di ssuq nneɣni, isewweq ɛawed Jeḥhɛ bac a dd-iseɣ aɣyul. Yufa dinni aɣyul-nni i ttuɣa yesɣa s imant-nnes. Yudar-as ɣer umeẓẓuɣ, yenna-s: “Nniɣ-ac ttegg rray i yemma-c tugid, lexxu i ma a c-sɣeɣ!”.
Ɣer ɛawed: A dak-dd-yeqḍu s uḥenneḍ